Mbsak 1

Mbsak

Taŋtaŋa mbəɗaftá mbsaka la Israʼila

1 Baɗ taŋtaŋa fitik ma tila mahis, ta mahisa vaku tahula saba la Israʼila ma haɗika Masar, ka gwaɗganatá Yawe ta Musa ma tumpula guyaku ma mtaka Sinay. Kaʼa nda tsi mantsa: 2-3 « Kagha nda Haruna ka mbəɗafta kuni ta mbsaka inda guyatá ghəŋa la Israʼila ta uʼa taŋ ta uʼa taŋ, ta həga ta həga. Ka vivindafta kuni ta hga inda zgwana turtuk turtuk, sliʼafta ta imi hisambsak ka laghwi ta kəma, inda gwal prək ka vulu mataba la Israʼila. Ka mbəɗafta kuni ta həŋ ma bakwa gwal vula taŋ ma bakwa gwal vula taŋ. 4 Mamu ká tsi mataba ghuni na mndu turtuk turtuk ma inda mndəra mndu, mndu turtuk ta nzakway ka mala ga həga ŋa kataghunata ma mbəɗay. 5 Wya hga tsa mnduha dzaʼa kataghunata ya: Ma mndəra la Rubeŋ, Ilitsur zwaŋa Sədeʼur. 6 Ma mndəra la Simghuŋ, Səlumiʼel zwaŋa Tsurisadday. 7 Ma mndəra la Yahuda, Nahsuŋ zwaŋa Ghaminadav. 8 Ma mndəra la Yisakar, Nətanʼel zwaŋa Tsughwar. 9 Ma mndəra la Zəvuluŋ, Iliʼav zwaŋa Heluŋ. 10 Ma zwana Yusufu: Ma mndəra la Ifrayim, Ilisama zwaŋa Ghammihut. Ma mndəra la Mənase, Gamliʼel zwaŋa Pədatsur. 11 Ma mndəra la Biŋyamiŋ, Avidaŋ zwaŋa Gidʼuni. 12 Ma mndəra la Daŋ, Ahiʼezer zwaŋa Ammisadday. 13 Ma mndəra la Aser, Pagiʼel zwaŋa Uhraŋ. 14 Ma mndəra la Gat, Ilyasaf zwaŋa Dəʼuwel. 15 Ma mndəra la Naftali, Ahira zwaŋa Inaŋ, » kaʼa. 16 Tsaha ya gwal zabap lu ta həŋ mataba guyatá ghəŋ. Hahəŋ maliha mataba mndəra taŋ. Hahəŋ maliha dəmbuʼata la Israʼila guli.

17 Ka hlaftá i Musa nda Haruna ta tsa mnduha zabap lu ta həŋ ya nda hga taŋ nda hga taŋ. 18 Ka tskanatá həŋ ta guyatá ghəŋa mnduha demdem baɗ taŋtaŋa fitik ma mahisa tili. Ka vivindaftá lu ta mndəra taŋ ta uʼa taŋ ta uʼa taŋ, ta həga ta həga, ka mbəɗaftá mbsaka hga zgwana turtuk turtuk sliʼafta ta imi hisambsak ka laghwi ta kəma. 19 Manda ya mnanaf Yawe ta Musa, ka mbəɗaftá tsi ta həŋ ta mtaka Sinay.

20 Ta ghəŋa inda mndəra la Israʼila, ka vivindaftá lu ta mbsaka inda zgwana turtuk turtuk, sliʼafta ta imi hisambsak ka laghwi ta kəma, gwal prək ka vulu. Ka zlraftá lu nda mndəra la Rubeŋ zumala Israʼila ta uʼa taŋ ta uʼa taŋ, ta həga ta həga. 21 Ka klaftá mbsaka mndəra la Rubeŋ ta dəmbuʼ fwaɗ mbsak mkuʼ mida nda hutaf dərmək (46.500).

22-23 Ka klaftá mbsaka mndəra la Simghuŋ ta dəmbuʼ hutaf mbsak təmbay mida nda hkən dərmək (59.300).

24-25 Ka klaftá mbsaka ŋa mndəra la Gat ta dəmbuʼ fwaɗ mbsak hutaf mida nda mkuʼ dərmək nda hutaf mbsak (45.650).

26-27 Ka klaftá mbsaka ŋa mndəra la Yahuda ta dəmbuʼ ndəfáŋ mbsak fwaɗ mida nda mkuʼ dərmək (74.600).

28-29 Ka klaftá mbsaka ŋa mndəra la Yisakar ta dəmbuʼ hutaf mbsak fwaɗ mida nda fwaɗ dərmək (54.400).

30-31 Ka klaftá mbsaka ŋa mndəra la Zəvuluŋ ta dəmbuʼ hutaf mbsak ndəfáŋ mida nda fwaɗ dərmək (57.400).

32-33 Ma mndəra zwana Yusufu: Ka klaftá mbsaka ŋa mndəra la Ifrayim ta dəmbuʼ fwaɗ mbsak nda hutaf dərmək (40.500). 34-35 Ka klaftá mbsaka ŋa mndəra la Mənase ta dəmbuʼ hkən mbsak his mida nda his dərmək (32.200).

36-37 Ka klaftá mbsaka ŋa mndəra la Biŋyamiŋ ta dəmbuʼ hkən mbsak hutaf mida nda fwaɗ dərmək (35.400).

38-39 Ka klaftá mbsaka ŋa mndəra la Daŋ ta dəmbuʼ mkuʼ mbsak his mida nda ndəfáŋ dərmək (62.700).

40-41 Ka klaftá mbsaka ŋa mndəra la Aser ta dəmbuʼ fwaɗ mbsak ndeŋ mida nda hutaf dərmək (41.500).

42-43 Ka klaftá mbsaka ŋa mndəra la Naftali ta dəmbuʼ hutaf mbsak hkən mida nda fwaɗ dərmək (53.400).

44 Tsaha ya mbsakha vivindaf i Musa nda Haruna nda tsa maliha la Israʼila ghwaŋpəɗ his, mndu turtuk turtuk ma mndəra mndu ya. 45 Inda la Israʼila vivindaf lu ta həga ta həga, gwal sliʼafta ta imi hisambsak ka laghwi ta kəma, inda gwal prək ka vulu ma Israʼila ná, 46 ka klaftá mbsaka taŋ ta dəmbuʼ mkuʼ dərmək nda hkən nda hutaf dərmək nda hutaf mbsak (603.550).

Slna mndəra la Levi paɗak

47 Ama vindam a lu ta mbsaka mndəra la Levi mataba taŋ wu, 48 kabga ka Yawe nda Musa na: 49 « Mndəra la Levi yeya dzaʼa kwal ka da vindafta mbsaka taŋ. Ma mbəɗaf ka ta mbsaka taŋ kawadaga nda la Israʼila. 50 Kagha, ka fanaghata ka ta la Levi ta slna ma həga tumpula klamha dzratá wi ya, nda inda huzla ni, nda inda skwiha mida. Hahəŋ dzaʼa hla həga tumpul nda inda huzla ni. Hahəŋ dzaʼa ksa slna mida, ka fafatá ghuɓa taŋ ka wanafta tsa həga tumpul ya. 51 Ma sliʼaftá tsa həga tumpul ya, la Levi dzaʼa palata, ma sladata ni ya guli, la Levi dzaʼa dzagwata. Inda dzibata mndu dzaʼa gavadaghata ná, dzaʼa dza dza lu. 52 Inda la Israʼila dzaʼa fafatá ghuɓa taŋ ma vla taŋ, inda taŋ mista drapwa bakwa gwal vula taŋ. 53 La Levi ya, hahəŋ dzaʼa nzata ka wanaftá tsa həga tumpula klama dzratá wi ya, kada kwala gufatá ŋuɗuf ɗa dɗanaghatá guyatá ghəŋa la Israʼila. La Levi dzaʼa da nghapta ka tsa həga tumpul ya, » kaʼa.

54 Tsaya skwi maga la Israʼila. Ka magata həŋ manda va ya mnanaf Yawe ta Musa.