Tva skwi ŋa magay gwal dra skwi ŋa Lazglafta
Pla ghəŋ tsuh tsuh
6
1 Ka Yawe nda Musa mantsa: 2 « Mnanaf mna ta i Haruna nda zwana ni, kazlay na: Wya tva skwi ŋa magay nda skwa pla ghəŋ ŋa dray tsuh tsuh kəʼa. Dzaʼa han ta gwir tsa skwa pla ghəŋ ŋa dray tsuh tsuh ya ta zlghaku petsuweɗ vli ha ga sərɗək, mbaɗa lu ka ŋasa vu. 3 Ga sərɗək, ŋa suɗavata mnda dra skwi ŋa Lazglafta ta sɗakw ni ka liŋ, nda gedzera ni ka liŋ, ŋa hlapta ni ta hutiɗifa gwir ma vla skwa pla ghəŋ ŋa dray tsuh tsuh, ka pghata ta vata gwir. 4 Tahula tsa, ŋa suɗiŋta ni ta lgutha ni, ka suɗavatá sanlaha ma lgutha, ŋa klaghata ni ta tsa hutiɗif ya ta hula ghuɓu ma vli kul tsaɗ lu. 5 Dzaʼa gɗa gɗa vu ta zlghaku ta gwir, yaha da mtata ɗekɗek. Inda sərɗək, sərɓafta mnda dra skwi ŋa Lazglafta ta hasuʼu, ka sərɓafta ni ta skwa pla ghəŋ ŋa dray tsuh tsuh, drafha ta ghwaviɗa skwiha pla ghəŋa zɗaku tida guli. 6 Dzaʼa gɗa gɗa tsa vu ya ta zlghaku ta gwir, haɗ dzaʼa mtata ɗekɗek wa. »Mbəha nimaya
7 « Wya tva skwi ŋa magay nda mbəha nimaya: Zwana Haruna dzaʼa kladaghata ta kəma Yawe, ta wa gwir. 8 Dzaʼa tsəɗaʼa tsəɗa mndu turtuk mataba gwal ta dra skwi ŋa Lazglafta ta hpu kəzlitit ɗuk ma dzvu laɓata ni nda rɗi, nda inda urdi ŋa dray nda dra sganagha lu ta ghəŋa mbəhu, ka drafta ta gwir. Tsaya skwi ka havu zɗəgana həlata ni ta Yawe. 9 Pɗakwa tsa skwa pla ghəŋ ya, ŋa zuta i Haruna nda zwana ni, ŋa zuta taŋ dzeʼdzeʼ kul haɗ is mida ma sana vli nda ghuɓa ma daɓa tumpula guyaku. 10 Haɗ lu tama dzaʼa da tsa pɗakwa ni ya nda is wa. Tsaya mayak vlaŋ yu ta həŋ ma mbəhuha ta drafta lu ta vu ŋa ɗa. Skwi ta ghuɓuta katakata ya, manda skwa pla ghəŋ ŋa ɗawa pla dmaku, nda skwa pla ghəŋ ŋa paya tvi ya. 11 Zgwana kweŋkweŋ mataba mndəra la Haruna dzaʼa laviŋtá zay. Tsaya tva skwi ŋa gɗata taŋ ta magay ŋa ɗekɗek ha zivir zivira taŋ ma skwiha pla ghəŋ ŋa dray ta vu ŋa Yawe. Inda skwi dzaʼa ksaŋta ná, dzaʼa nza nza nda ghuɓa, » kaʼa.
12 Ka Yawe nda Musa mantsa: 13 « Wya mbəhu dzaʼa vlaŋta i Haruna nda zwana ni ta Yawe baɗ pghanaghatá rɗi ta həŋ: Hpu kəzlitit ka kiluʼ hkən inda fitik, rita ni ga sərɗək, rita ni ga hawu. 14 Dzaʼa hwaɗamta ɗina nda rɗi lu ta tsa hpu ya, ka data ta gədzeh. Dzaʼa ɗatsapta nda ɗatsa ka ta tsa mbəha nimaya ya, ka drafta ŋa zɗəganata həlata ni ta Yawe. 15 Dər wati ma mndəra la Haruna dzaʼa fata lu nda ma pghanaghatá rɗi ŋa nzakwa ni ka mali ta ghəŋa gwal ta dra skwi ŋa Lazglafta ná, magata ni mnda tsaya. Tsaya skwi ŋa gɗata ta magay ŋa Yawe ŋa ɗekɗek. Dzaʼa drafta nda dra lu nekwnekw. 16 Inda mbəha nimaya ya dzaʼa vlata mnda dra skwi ŋa Lazglafta ná, dzaʼa drafta nda dra lu nekwnekw, zəta a lu wu, » kaʼa.
Pla ghəŋ ŋa ɗawa pla dmaku
17 Ka Yawe nda Musa mantsa: 18 « Mnana mna ta i Haruna nda zwana ni: Wya tva skwi ŋa magay ta ghəŋa skwa pla ghəŋ ŋa ɗawa pla dmaku. Tsa skwa pla ghəŋ dzaʼa həŋ da ghway ya ná, ta kəma Yawe ma va tsa vli ta snuta lu ta ghwa skwa pla ghəŋ ŋa dray tsuh tsuh ya dzaʼa ghwanafta həŋ. Skwi ta ghuɓuta katakata ya.
19 Tsa mnda dra skwi ŋa Lazglafta dzaʼa maga slna tsa pla ghəŋ ya dzaʼa za sluʼa ni. Dzaʼa zuta ma vli nda ghuɓa, ma daɓa tumpula guyaku. 20 Inda skwi dzaʼa ksaŋtá sluʼa mndərga tsa skwa pla ghəŋ ya ná, dzaʼa nza nza nda ghuɓa. Ka wutsiraf wutsira usa ni ta lguta mndu, ghuɓiŋta ni ta tsa vli ksaŋ us ya ma sana vli nda ghuɓa. 21 Ka ta siga rɓisl data tsi, hunzuɓiŋta ni ta tsa siga ya. Ama ka ta siga ka ghuva tili data tsi, hədziŋta ni, ka ghuɓiŋta nda imi ŋulum. 22 Inda zgwana ma mndəra la gwal dra skwi ŋa Lazglafta ná, dzaʼa laviŋ lava həŋ ta za tsa sluʼi ya, skwi ta ghuɓuta katakata ya. 23 Ama inda skwa pla ghəŋ ŋa ɗawa pla dmaku ya kladam lu ta usa ni da tumpula guyaku ŋa slərɓaptá zughu ma vli nda ghuɓa ná, haɗ lu dzaʼa zay wu, dzaʼa driŋta nda vu lu. »