Sanlaha ma dmaku ta ɗawa pla ghəŋ
5
1 « Ka lagha mndu ka gatá dmaku ma kwalaghuta pslaftá wi manda snaŋta ni ta hgatá hgu ŋa ga masləmtsək baŋluwa ta ghəŋa sana skwi nghaŋ tsi, ka ya snaŋ tsi a tsi, tsaya ná, dguv ta ghəŋa ni dmaku ni.2 Ka lagha sana mndu ka ksaŋtá inda skwi ta tsaɗ lu, ka mbla sana nimtak ta tsaɗ lu a tsi, dər mbla rina fisik ta tsaɗ lu a tsi, dər skwiha ta gigɗa vgha ta tsaɗ lu a tsi, dər má sna a tsi wu ná, nda nza tsatsi guli ka mndu ta tsaɗ lu, dguv ta ghəŋa ni dmaku ni.
3 Ka lagha sana mndu, ka ksaŋtá sana skwi ta tsaɗ lu ta sab ma mndu, dər nu tsi, dər má nda snaŋta ni a tsi wu ná, dzaʼa niŋ na ka mndu ta tsaɗ lu. Baɗ snaŋta ni, dguv ta ghəŋa ni dmaku ni.
4 Ka lagha sana mndu gi ka waɗatá waɗu kul ndanapta, ŋa maga skwi ɗina ka skwi kul ɗinaku a tsi, baɗ snaŋta ni, dguv ta ghəŋa ni dmaku ni.
5 Ka ksaf ksa dmakwa sani ma tsa skwiha ya ta mndu katsi, dzaʼa mnigiŋ mna ta dmakwa ni. 6 Ka klanakta tsi ta skwa paya tvi ta Yawe, dabga tsa dmaku ga tsi ya. Ka klagaghata tsi ta rina fisik, dər mana tuwak, ka mana gu a tsi mataba bra rina fisik ŋa pla ghəŋ ŋa ɗawa pla dmakwa tsa mndu ya. Manda tsa dzaʼa magata mnda dra skwi ŋa Lazglafta ta skwa pla ghəŋ ŋa slərɓanaptá zughu ma dmaku ga tsi. »
Pla ghəŋa gwal ka pɗu
7 « Ka haɗ mbrakwa mndu ŋa mutsaftá rina fisik wu, klanakta ni ta Yawe ta kukuha his ka zwana ghərbuʼha his a tsi ŋa paya tvi, dabga dmakwa ni. Turtuk ya, ŋa pla ghəŋ ŋa ɗawa pla dmaku, turtuk ya guli, ŋa pla ghəŋ ŋa dray tsuh tsuh. 8 Dzaʼa hlanak hla ta mnda dra skwi ŋa Lazglafta, ŋa vlata mnda dra skwi ŋa Lazglafta ta tsa ɗyak ŋa pla ghəŋa ɗawa pla dmaku ya karaku ya. Dzaʼa tsanaf tsa ta ŋurzluŋ nda ɗahəŋ nda ma warga, ama haɗ dzaʼa ghudíŋtá ghəŋa ni wa. 9 Ka wutsikanavata tsi ta vata gwir ta usa ni. Pghidiŋha ta pɗakwa tsa usa ya dista tsa gwir ya. Tsaya skwa pla ghəŋ ŋa ɗawa pla dmaku. 10 Tahula tsa, ŋa drafta mnda dra skwi ŋa Lazglafta ta tsa sana ɗyak ya ka skwa pla ghəŋ ŋa dray tsuh tsuh manda ya mnaf zlahu. Manda tsaya dzaʼa magata mnda dra skwi ŋa Lazglafta slərɓanaptá zughu ma dmaku ga tsi. Dzaʼa plaku dmakwa ni.
11 Ka haɗ mbrakwa mndu ŋa mutsaftá kukuha his ka zwana ghərbuʼha his a tsi wu katsi, laviŋ lava ta kladaghata ta hpu kəzlitit ka kiluʼ hkən ka skwa mbəha pla ghəŋ ŋa ɗawa pla dmakwa ni. Yaha magaftá rɗi tida, yaha sganaghatá urdi guli, kabga tsaya skwa pla ghəŋ ŋa ɗawa pla dmaku. 12 Ka kladaghata tsa mndu ya ta tsa hpu ya da mnda dra skwi ŋa Lazglafta, ŋa tsəɗaʼata mnda dra skwi ŋa Lazglafta ta tsa hpu ya ɗuk ma dzvu ka havu, ŋa drafta ni ta gwir kawadaga nda skwa pla ghəŋ ŋa dray ta vu ŋa Yawe. Tsaya skwa pla ghəŋ ŋa ɗawa pla dmaku. 13 Mantsa ya dzaʼa magata mnda dra skwi ŋa Lazglafta ŋa slərɓa zughu ŋa ɗawa pla dmakwa tsa mndu ya ma dər wati maga tsi ma tsa skwiha. Dzaʼa plaku dmakwa ni. Pɗakwa tsa hpu ya ná, nzakwa ni ŋa gwal ta dra skwi ŋa Lazglafta manda ŋa mbəha nimaya ya, » kaʼa.
Pla ghəŋ ŋa paya tvi
14 Ka Yawe nda Musa mantsa: 15 « Ka lagha mndu ka ga ta dmaku nda ɗvay ni a wu, nda ma dmanaftá skwiha nda fa ka ŋa Yawe katsi, dzaʼa klanak kla ta Yawe ta maŋazak kul haɗ maslivinza tida mataba bra rina fisik ka skwa pla ghəŋ ŋa paya tvi. Sgita tseda tsa maŋazak ya ná, taɓ ta ya ta grafta lu ta skwa gra skwi ma həga nda ghuɓa dzaʼa nzakwa tsi. Nda nza tsa maŋazak ya ka skwi ŋa pla ghəŋ ŋa paya tvi. 16 Ka plata tsa mndu ya ta inda skwiha nda fa ka ŋa Yawe dmanaf tsi ya, sganaghaha ta turtuk ma dgata sgita ni hutaf, ka vlaŋta demdem ta mnda dra skwi ŋa Lazglafta. Ka slərɓapta mnda dra skwi ŋa Lazglafta ta zughu nda tsa maŋazaka pla ghəŋ ŋa paya tvi ya. Dzaʼa plaku dmakwa ni.
17 Ka lagha sana mndu ka gatá dmaku, ka magatá skwi turtuk mataba zlahuha ya mnaf Yawe kazlay yaha kuni da magay kəʼa nda snaŋta ni a wu, tsaya ná, ksaf ksa dmaku, dguv ta ghəŋa ni dmakwa ni. 18 Ka klafta tsi ta maŋazak kul haɗ maslivinza tida mataba bra rina fisik, taɓta sgita skwi ya mnaf lu ka skwa pla ghəŋa paya tvi. Ka slərɓanapta mnda dra skwi ŋa Lazglafta ta zughu ŋa pla dmakwa tsa mndu ta magata ka palama ya a wu, nda snaŋta ni a wu ya. Dzaʼa plaku dmakwa ni. 19 Tsaya skwa pla ghəŋ ŋa paya tvi. Si ksu ksa dmaku ta tsa mndu ya da Yawe, » kaʼaª.
20 Ka Yawe nda Musa mantsa: 21 « Ka gaga mndu ta dmaku ka dmanaftá Yawe nda ma tsakalanata ni ta wi ta mnda ni ta ghəŋa skwi ya vlaŋ tsi ŋa fata a tsi, ka ta ghəŋa skwi tsanaf tsi ta nzawa ni a tsi, ka ta ghəŋa skwi ghalaf tsi a tsi, ka nənɓu a tsi, 22 ka ta ghəŋa skwi ta zwaɗuta klaf tsi ka mananata a tsi, ka ka waɗutá vli ka bətbət ŋa mananatá dər mndəra wati ma dmaku a tsi. 23 Ka maga maga mndu ta mndərga tsa dmakuha ya, graf gra kazlay ksaf ksa dmaku ta iʼi kəʼa, vradanaghata ni ta tsa skwi ghalaf tsi, ka tsa nənɓu ya a tsi, ka tsa skwi vlaŋ lu ŋa fata ya a tsi, ka tsa skwi ta zwaɗuta klaf tsi ya a tsi, 24 dər mndəra wati skwi waɗu tsi ta vli ka bətbət ta ghəŋa ni a tsi. Ma inda tsaha ya, vranavata ni ta skwa tsa mndu ya manda va nzakwa ni, ka sganaghata tsi ta faway turtuk ma dgatá dzva tsa skwi ya hutaf. Ka vranavata tsi ta mnda ni baɗ play ni ta ghəŋ ŋa paya tvi. 25 Tahula tsa, ŋa pla ghəŋ ŋa paya tvi ná, kladaghata ni da mnda dra skwi ŋa Lazglafta ta maŋazak kul haɗ maslivinza tida, kla a tsi mataba bra rina fisik taɓ ta sgita skwi ya mnaf lu ŋa pla ghəŋ ŋa Yawe ŋa paya tvi. 26 Dzaʼa slərɓanap slərɓa mnda dra skwi ŋa Lazglafta ta zughu ta kəma Yawe. Dzaʼa plaku dmakwa ni, dər wati ma dmaku ta ksafta, » kaʼa.