La Levi 4

Pla ghəŋa ɗawa pla dmaku

Pla ghəŋa mali ta ghəŋa gwal ta dra skwi ŋa Lazglafta

1 Ka Yawe nda Musa mantsa: 2 « Mnana mna ta la Israʼila, ka ka dazlay nda həŋ ná, ka gaga mndu ta dmaku ka si ka palama a gata tsi wu, ka ɓlanaptá tsi ta ya turtuk ma inda zlahuha Yawe nda ma magatá skwi ya pyaf zlahu ta magay katsi, wya skwi ŋa magay ni:

3 Ka mali ta ghəŋa gwal dra skwi ŋa Lazglafta pghanagha lu ta rɗi ta gatá dmaku katsi, hlam hla ta mnduha da dmaku, tsaya ná, kladaghata ni ta lghəŋ dɓakwa kul haɗ maslivinza tida ŋa Yawe ŋa pla ghəŋ ŋa ɗawa pla dmaku. 4 Ka kladaghata tsi ta kəma Yawe ta lghəŋ ta wa tumpula guyaku, ka fafta tsi ta dzva ni ta ghəŋa ni, ka ghwanafta ta kəma Yawe. 5 Ka taʼata mnda dra skwi ŋa Lazglafta pghanagha lu ta rɗi ta usa tsa lghəŋ ya, ka kladamta da tumpula guyaku. 6 Ka ɗaʼata mnda dra skwi ŋa Lazglafta nda ndəfiŋ ta tsa us ta kəma Yawe ya, ka wutsikafta ndəfáŋ səla ta vata zlala nda ma vli nda ghuɓa. 7 Tahula tsa, ka ɗaɗafta mnda dra skwi ŋa Lazglafta ta us ta duliha gwira dra urdi zɗa ziʼakwa ni ta kəma Yawe ma tumpul guyaku. Saba ni ma tumpul ya, ka pghíŋtá tsi ta pɗakwa tsa usa lghəŋ ya demdem dista gwira pla ghəŋ ŋa dray tsuh tsuh ta wa tumpula guyaku. 8 Ka klapta tsi ta inda ghwaviɗa tsa lghəŋ ŋa pla ghəŋ ŋa ɗawa pla dmaku ya: Tsa ghwaviɗ ta mbsamta nihuɗi, nda inda ghwaviɗ ma huɗa ni, 9 nda hulsisha his his, nda ghwaviɗ ta mbsamta, nda ŋa marɓa tani, nda zəʼala mnak dzaʼa klata tsi kawadaga nda hulsisha tani ya, 10 manda va ya ta klapta lu ta ŋa lghəŋ ŋa pla ghəŋa zɗaku ya. Dzaʼa draf dra mnda dra skwi ŋa Lazglafta ta gwira pla ghəŋ ŋa dray tsuh tsuh. 11 Ama huta tsa lghəŋ ya, nda sluʼa ni demdem, nda ghəŋa ni, nda dagulamaha ni, nda nihuɗa ni, nda swiɗa ni tani, 12 nda inda pɗakwa tsa lghəŋ ya, ŋa hlaghata ni ta hula ghuɓu ma vli kul tsaɗ lu fa lu ŋa tska hutiɗifa gwir, ŋa driŋta ni ta vu vaf lu ta hasuʼu. Ta tsa tskata hutiɗif ya dzaʼa driŋta lu. »

Pla ghəŋa guyata ghəŋ

13 « Ka guyatá ghəŋa inda la Israʼila ta gatá dmaku, ka si ka palama a tsi wu, dər má sna a həŋ mndani wu, ka ɓlanaptá həŋ ta ya turtuk ma inda zlahuha Yawe nda ma magatá skwi ya pyaf zlahu ta magay katsi, ksaf ksa dmaku ta həŋ. 14 Na gi tsatsafta taŋ ta tsa dmaku ga həŋ ya, klagaghata guyatá ghəŋ ta lghəŋ dɓakwa ŋa pla ghəŋ ŋa ɗawa pla dmaku. Dzaʼa kladaghata ta wa tumpula guyaku həŋ. 15 Ɓhadaghata taŋ da hada, ka pghafta la galata mndu mataba guyatá ghəŋ ta dzva taŋ ta ghəŋa tsa lghəŋ ya ta kəma Yawe, ka ghwanafta hada ta kəma Yawe. 16 Ka taʼata mali ta ghəŋa gwal ta dra skwi ŋa Lazglafta pghanagha lu ta rɗi ta usa tsa lghəŋ ya, ka kladamta da tumpula guyaku. 17 Ka ɗaʼata mnda dra skwi ŋa Lazglafta ta ndəfiŋa ni ma tsa us ya, ka wutsikafta ndəfáŋ səla ta kəma Yawe, ta vata zlala. 18 Tahula tsa, ka ɗaɗafta tsi ta us ta duliha gwir ta kəma Yawe ma tumpula guyaku. Saba ni ma tumpul, ka pghíŋta tsi ta inda pɗakwa tsa us ya dista gwira pla ghəŋ ŋa dray tsuh tsuh ta wa tumpula guyaku ya. 19 Ka hlapta tsi ta inda vliha nda mala nda mala ma sluʼa tsa lghəŋ ya, ka drafta ta gwir. 20 Ka magata tsi nda tsa lghəŋ ya manda va tsa maga tsi nda lghəŋ ŋa ɗawa pla dmakwa vərɗa tsatsi ya. Manda tsaya dzaʼa slərɓanapta mali ta ghəŋa gwal dra skwi ŋa Lazglafta ta zughu ta həŋ. Dzaʼa plaku dmakwa taŋ. 21 Ka klaghata tsi ta tsa lghəŋ ya ta hula ghuɓu, ka driŋta manda tsa lghəŋ driŋ tsi taŋtaŋ ya. Tsaya skwa pla ghəŋ ŋa ɗawa pla dmakwa guyatá ghəŋ. »

Pla ghəŋa mgham

22 « Ka mali ta gatá dmaku katsi, ka si ka palama a tsi wu, ka ɓlanaptá tsi ta ya turtuk ma inda zlahuha Yawe, Lazglafta ni nda ma magatá skwi ya pyaf zlahu ta magay katsi, ksaf ksa dmaku. 23 Na gi grafta ni ta tsa dmakwa ni ya, kladaghata ni ta mbəha pla ghəŋ ka dugzum kul haɗ maslivinza tida. 24 Lagha ni da hada, ka fafta tsi ta dzvu ta ghəŋa tsa dugzum ya, ka ghwanafta ma vli ya ta gɗata lu ta ghwa skwa pla ghəŋ ŋa dray tsuh tsuh ta kəma Yawe. Tsaya skwa pla ghəŋ ŋa ɗawa pla dmaku. 25 Ka ɗaʼata mnda dra skwi ŋa Lazglafta nda ndəfiŋa ni ta usa tsa skwi ghwanaf tsi ya, ka magafta ta duliha gwira pla ghəŋ ŋa dray tsuh tsuh. Ka pghíŋta tsi ta inda pɗakwa tsa us ya dista tsa gwir ya. 26 Ka drafta tsi demdem ta ghwaviɗa tsa dugzum ya ta gwir, manda va ya ta magata tsi nda ghwaviɗa pla ghəŋa zɗaku ya. Mantsa ya dzaʼa maganata mnda dra skwi ŋa Lazglafta ta tsa mali ya ŋa slərɓanaptá zughu. Dzaʼa plaku dmakwa ni. »

Pla ghəŋa hamata mndu

27 « Ka sani ma hamata mndu mataba la Israʼila ta gatá dmaku, ka si ka palama a tsi wu, ka ɓlanaptá tsi ta ya turtuk ma inda zlahuha Yawe nda ma magatá skwi ya pyaf zlahu ta magay katsi, ksaf ksa dmaku. 28 Na gi grafta ni ta tsa dmakwa ni ya, kladaghata ni ta mbəha pla ghəŋ ka mana gu kul haɗ maslivinza tida, dabga tsa dmaku ga tsi ya. 29 Lagha ni da hada, ka fafta tsi ta dzvu ta ghəŋa tsa gu ŋa pla ghəŋ ŋa ɗawa pla dmaku ya, ka ghwanafta ta vata gwir ma vli ta gɗata lu ta ghwa skwa pla ghəŋ ŋa dray tsuh tsuh ya. 30 Ka ɗaʼata mnda dra skwi ŋa Lazglafta nda ndəfiŋa ni ta usa tsa skwi ghwanaf tsi ya, ka magafta ta duliha tsa gwira pla ghəŋ ŋa dray tsuh tsuh ya. Ka pghíŋta tsi ta inda pɗakwa tsa us ya dista tsa gwir ya. 31 Ka hlata tsi ta inda ghwaviɗa tsa gu ya, manda ya ta hlata lu ta ghwaviɗa skwa pla ghəŋa zɗaku, ka drafta ta gwir, ŋa zɗəganata həlata ni ta Yawe. Manda tsaya dzaʼa magata mnda dra skwi ŋa Lazglafta ŋa slərɓanaptá zughu ta tsa hamata mndu ya. Dzaʼa plaku dmakwa ni.

32 Ka tuwak kladagha tsa mndu ya ka vlata ŋa mbəha pla ghəŋa ɗawa pla dmaku katsi, kladaghata ni ta mana tuwak kul haɗ maslivinza tida. 33 Ka fafta tsi ta dzvu ta ghəŋa tsa tuwak ŋa ɗawa pla dmaku ya, ka ghwanafta ma vli ta gɗata lu ta ghwa skwa pla ghəŋ ŋa dray tsuh tsuh ya. 34 Ka ɗaʼata mnda dra skwi ŋa Lazglafta nda ndəfiŋa ni ta usa tsa skwi ghwanaf tsi ya, ka magafta ta duliha tsa gwira pla ghəŋ ŋa dray tsuh tsuh ya. Ka pghíŋta tsi ta inda pɗakwa tsa us ya dista tsa gwir ya. 35 Ka hlata tsi ta inda ghwaviɗa tsa tuwak ya, manda ya ta hlata lu ta ghwaviɗa skwa pla ghəŋa zɗaku. Ka drafta mnda dra skwi ŋa Lazglafta ta gwir kawadaga nda sanlaha ma skwa pla ghəŋ ŋa dray ta vu ŋa Yawe ya. Manda tsaya dzaʼa magata mnda dra skwi ŋa Lazglafta ŋa slərɓanaptá zughu ta tsa hamata mndu ta gata dmaku ya. Dzaʼa plaku dmakwa ni. »