Pla ghəŋa zɗaku
3
1 « Ka ta kumay mndu ta mbəhatá Yawe nda skwa pla ghəŋa zɗaku katsi, kladaghata ni ta kəma Yawe ta lghəŋ ka mana sla a tsi kul haɗ maslivinza tida. 2 Ka fafta tsi ta dzva ni ta ghəŋa tsa mbəha ni ya, ka ghwanafta ta wa tsa tumpula guyaku ya. Ka klafta zwana Haruna, gwal ta dra skwi ŋa Lazglafta ta usa ni ka wutsikafta ta slərpuha gwir demdem. 3 Ma tsa skwa pla ghəŋa zɗaku ya, wya skwa pla ghəŋ dzaʼa kladaghata mnda dra skwi ŋa Lazglafta ŋa drafta ni ta vu ŋa Yawe: Ghwaviɗ ta mbsamtá nihuɗi nda inda ghwaviɗ ma huɗa ni demdem, 4 nda hulsisha his his, nda ghwaviɗ ta mbsamta, nda ŋa marɓa tani, nda zəʼala mnak dzaʼa klata lu kawadaga nda tsa hulsisha his ya tani. 5 Ka drafta zwana Haruna ta inda tsaha ya ta gwir kawadaga nda skwa pla ghəŋ ŋa dray tsuh tsuh faf lu ta hasuʼu vanagha lu ya. Tsaya skwa pla ghəŋ ta drə lu ta vu, zɗəgana həlata ni ta Yawe.6 Ka tsa pla ghəŋa zɗaku ya mataba rina fisik tsi vla mndu ka mbəha ni ŋa Yawe katsi, klakta ni ta zəʼala ni ka markwa ni a tsi ya kul haɗ maslivinza tida. 7 Ka tuwak mbəha tsa mndu ya katsi, kladaghata ni ta kəma Yawe. 8 Ka fafta ni ta dzva ni ta ghəŋa mbəha ni, ka ghwanafta ta kəma tumpula guyaku. Ka wutsikafta zwana Haruna ta usa ni ta slərpuha gwir demdem. 9 Ma tsa pla ghəŋa zɗaku ya, wya vliha dzaʼa hlafta lu ŋa drafta ta vu ŋa Yawe: Htur tsa lu ta vraghuta ghudzifa marɓa, nda ghwaviɗ ta mbsamtá nihuɗi, nda inda ghwaviɗ ma huɗa ni tani, 10 nda hulsisha his his, nda ghwaviɗ ta mbsamta, nda ŋa marɓa tani, nda zəʼala mnak dzaʼa klata lu kawadaga nda tsa hulsisha his ya tani. 11 Ka drafta mnda dra skwi ŋa Lazglafta ta inda ni ta gwir. Tsaya skwa zay draf lu ta vu ŋa Yawe.
12 Ka gu mbəha tsa mndu ya katsi, kladaghata ni ta kəma Yawe. 13 Ka fafta tsi ta dzva ni ta ghəŋa ni, ka ghwanafta ta wa tumpula guyaku. Tahula tsa, ŋa wutsikafta zwana Haruna ta usa ni ta slərpuha gwir demdem. 14 Ma tsa skwa pla ghəŋ ya, wya vliha dzaʼa hlafta lu ŋa drafta ta vu ŋa mbəhatá Yawe: Ghwaviɗ ta mbsamtá nihuɗi, nda inda ghwaviɗ ma huɗa ni, 15 nda hulsisha his his, nda ghwaviɗ ta mbsamta, nda ŋa marɓa tani, nda zəʼala mnak dzaʼa klata lu kawadaga nda tsa hulsisha his ya tani. 16 Ka drafta mnda dra skwi ŋa Lazglafta ta gwir. Tsaya skwa zay draf lu ta vu zɗəgana həlata ni ta Yawe.