La Levi 2

Mbəha nimaya

1 « Ka ta kumay mndu ta mbəhatá Yawe nda nimaya katsi, tsəɗaʼata ni ta hpu kəzlitit, ka pghanaghatá rɗi tida, pghanaghaha guli ta urdi ŋa dray nda dra. 2 Ka kladaghata tsa mndu ya da zwana Haruna gwal ta dra skwi ŋa Lazglafta. Ka tsəɗaʼata mnda dra skwi ŋa Lazglafta ta tsa laɓatá hpu nda rɗi, nda ya nda inda urdi ɗuk ma dzvu, ka drafta ta gwir ta kuraghuta tsaya ka havu. Tsaya skwa pla ghəŋ draf lu ta vu zɗəgana həlata ni ta Yawe. 3 Pɗakwa tsa mbəha nimaya ya guli ná, dzaʼa nzakway ka ŋa i Haruna nda zwana ni. Nda nza tsaya ka skwi ta ghuɓuta katakata, kabga pɗakwa skwa pla ghəŋ ŋa dray ta vu ta kəma Yawe ya.

4 Ka si mbəhu nda skwi sulap lu ma uvun tsi katsi, kladaghata ni ta gatuha kul haɗ is mida, hwaɗam lu nda rɗi, ka biskwitha kul haɗ is mida masaf lu ta rɗi tida a tsi.

5 Ka si tsa mbəhu ya gatu da lu ta gədzeh tsi, dzaʼa hwaɗam hwaɗa lu ta hpu kəzlitit nda rɗi, haɗ lu dzaʼa magamtá is mida wa. 6 Ka ɓalanapta tsa mndu dzaʼa kladaghata ya, ka ɓeɓtsanaghatá rɗi. Mantsa ya dzaʼa paya lu ta mbəha nimaya.

7 Ka si mbəhu nda nimaya sula lu ta tasaʼuwa sula skwi tsi, magata nda hpu kəzlitit hwaɗam lu nda rɗi. 8 Tahula magata tsa mndu ya ta tsa mbəha ni mantsa ya, ŋa kladaghata ni ŋa Yawe, ka vlaŋtá mnda dra skwi ŋa Lazglafta, tsatsi dzaʼa kladaghata ta gwir. 9 Ma tsa mbəhu ya, ŋa klapta mnda dra skwi ŋa Lazglafta ta kuraghuta tsa ka havu ya, ka drafta ta gwir. Tsaya skwa pla ghəŋ draf lu ta vu zɗəgana həlata ni ta Yawe. 10 Pɗakwa tsa mbəha nimaya ya guli ná, dzaʼa nzakway ka ŋa i Haruna nda zwana ni. Nda nza tsaya ka skwi ta ghuɓuta katakata, kabga pɗakwa skwa pla ghəŋ draf lu ta vu ta kəma Yawe ya.

11 Haɗ kuni dzaʼa magamtá is ma inda mbəha nimaya dzaʼa kuni vlay ŋa Yawe wa. Haɗ lu dzaʼa magamtá is, dər zuɗum ma skwa pla ghəŋ ŋa dray ta vu ŋa Yawe wa. 12 Laviŋ lava kuni ta hlaktá tsa mbəha ndəhata taŋtaŋa nimaya ya ŋa Yawe, ama haɗ kuni dzaʼa drafta ta gwir manda skwi həlhəla ni wa. 13 Inda mbəhu ya ta nzakway ka nimaya ná, ka kuktafta kuni ta slughul tida. Yaha kuni zanapta kuktaftá slughul, kabga slughul ŋizla dzratá wi mataba ghuni nda Lazglafta ghuni. Tsaya tama dzaʼa kəl kuni ka gɗata ta maga slughul ta inda mbəhuha ghuni.

14 Ka ta klay kuni ta mbəhu ŋa Yawe ma taŋtaŋa ndəhata nimaya ghuni katsi, ka kladaghata kuni ta ghəŋa nimaya ka lfiɗ ya fsaŋ kuni nda fsa. Ka slihata kuni ta hənzila ni nda sliha, ka kladaghata kuni ka mbəha taŋtaŋa ndəhata nimaya ghuni. 15 Ka pghanaghata kuni ta rɗi, pghanaghaha kuni ta urdi ŋa dray nda dra guli. Tsaya mbəha nimaya. 16 Tahula tsa, ŋa drafta mnda dra skwi ŋa Lazglafta ta kuraghuta tsa kiʼa ka havu ya, ta nzakway ka hənzil sliha lu, nda rɗi, nda ya nda inda urdi ŋa dray nda dra ya. Tsaya skwa pla ghəŋ draf lu ta vu ŋa Yawe. »