Pla ghəŋ ŋa paya tvi
7
1 « Wya tva skwi ŋa magay nda skwa pla ghəŋ ŋa paya tvi, skwi ta ghuɓuta katakata ya. 2 Dzaʼa ghwanaf ghwa lu ta skwa pla ghəŋ ŋa paya tvi ma tsa vla ghwa skwa pla ghəŋ ŋa dray tsuh tsuh ya. Dzaʼa wutsikaf wutsika mnda dra skwi ŋa Lazglafta ta usa tsa skwi ya ta slərpuha gwir demdem. 3 Dzaʼa vla vla mnda dra skwi ŋa Lazglafta ta inda ghwaviɗa ni: Tsaya htur nda ghwaviɗ ta mbsamtá nihuɗi, 4 nda hulsisha his his, nda ghwaviɗ ta mbsamta, nda ŋa marɓa tani, nda zəʼala mnak dzaʼa klata lu kawadaga nda tsa hulsisha his his ya tani. 5 Ka drafta mnda dra skwi ŋa Lazglafta ta inda ni ta gwir. Tsaya skwiha draf lu ta vu ŋa Yawe, ka skwa pla ghəŋ ŋa paya tvi. 6 Inda zgun ta nzakway mataba mndəra gwal ta dra skwi ŋa Lazglafta dzaʼa laviŋtá za tsa sluʼi ya. Dzaʼa zay lu ma vli nda ghuɓa, skwi ta ghuɓuta katakata ya.7 Tsa tva skwi ŋa magay nda skwa pla ghəŋ ŋa paya tvi ya ná, manda va tsa tva skwi ŋa magay ŋa pla ghəŋ ŋa ɗawa pla dmaku ya nzakwa ni. Tsa mnda dra skwi ŋa Lazglafta ta magatá tsa slərɓa zughu ya dzaʼa kla sluʼa ni. »
Mayaka gwal dra skwi ŋa Lazglafta
8 « Tsa mnda dra skwi ŋa Lazglafta dzaʼa magatá tsa slna pla ghəŋa mndu ŋa dray tsuh tsuh ya, dzaʼa nzakw huta tsa skwa pla ghəŋ ŋa dray tsuh tsuh ya ka ŋa ni. 9 Inda mbəha nimaya da lu ma uvun, ta tasaʼuwa sula skwi, ka ta gədzeh a tsi ná, ŋa tsa mnda dra skwi ŋa Lazglafta ta magatá tsa slna pla ghəŋ ya tsaha ya. 10 Ama inda mbəhu nda nimaya hwaɗam lu nda rɗi, ka metsametsa a tsi ná, dzaʼa nzakway tsaya ŋa inda mndəra la Haruna, ŋa daguvta taŋ ka gragra. »
Pla ghəŋa zɗaku
11 « Wya tva skwi ŋa magay nda pla ghəŋa zɗaku ta vlaŋta lu ta Yawe. 12 Ka si ŋa zləzlva Lazglafta na pla ghəŋa mndu katsi, kladaghata ni ta skwi nda səla kawadaga nda gatuha kul haɗ is mida hwaɗam lu nda rɗi, nda biskwitha kul haɗ is mida masaf lu ta rɗi tida, nda ya nda gatuha magaf lu nda hpu kəzlitit hwaɗam lu ɗina nda rɗi. 13 Ta ghəŋa tsa gatuha ya, sganaghata ni ta buradi nda is mida ŋa mbəha ni, kawadaga nda skwa pla ghəŋa zɗaku ŋa zləzləva Lazglafta. 14 Ma inda tsa mbəhuha ya, dzaʼa hlaʼata kiʼa kiʼa ŋa vlaŋtá Yawe. Tsaya dzaʼa nzakway ŋa mnda dra skwi ŋa Lazglafta ta wutsikaftá usa pla ghəŋa zɗaku ta slərpuha gwir. 15 Sluʼa skwa pla ghəŋa zɗaku ŋa zləzlvu ya, dzaʼa zuta baɗ va tsa fitik vla lu ta tsa mbəhu ya lu, haɗ lu dzaʼa pɗanata ŋa ga mahtsima ni wa.
16 Ama skwa pla ghəŋ ta ghəŋa skwi waɗa tsi ta magay, ka mbəhu nda kumay ŋuɗuf a tsi ná, dzaʼa zuza lu ta sluʼa ni baɗ tsa fitik vla lu ya. Ama pɗakwa ni, laviŋ lava lu ta zay ga mahtsima ni. 17 Ka ta pɗəgla pɗa sluʼa tsa skwa pla ghəŋ ya ŋa baɗ mahkən katsi, driŋtá tsaya nda vu. 18 Ka ta zugəl za mndu ta tsa sluʼa pla ghəŋa zɗaku ya baɗ mahkəna fitik katsi, tsuʼafta a Lazglafta wu, ka bətbət tsa pla ghəŋa ni ya nda tsa. Nda ɓadza tsa sluʼi ya. Ka zuza mndu katsi, dguv ta ghəŋa ni dmakwa ni. 19 Ka ksaŋ ksa tsa sluʼi ya ta sana skwi ta tsaɗ lu katsi, zəgla a lu wu, dzaʼa driŋ dra lu nda vu.
Inda mndu ya kul haɗ skwa tsaɗa tida ná, dzaʼa laviŋ lava ta za sluʼa pla ghəŋ. 20 Ama ka zuza mndu ta sluʼa skwa pla ghəŋa zɗaku vla lu ŋa Yawe, tsaw ghuɓa a tsa mndu ya wu katsi, dzaʼa kliŋ kla lu mataba mnduha ni. 21 Manda tsaya guli, ka ksaŋ ksa mndu ta inda skwi ta tsaɗ lu, ka sana skwi ta tsaɗ lu ta sab ma mndu a tsi, dər nimtak a tsi ta tsaɗ lu, nda manzakɗawayha ta tsaɗ lu, ka zutá tsi ta sluʼa pla ghəŋa zɗaku vla lu ŋa Yawe katsi, dzaʼa kliŋ kla lu ta tsa mndu ya mataba mnduha ni, » kaʼa.
Tva skwi ŋa magay la Israʼila
22 Ka Yawe mnanatá Musa mantsa: 23 « Mnana mna ta la Israʼila: Yaha kuni da za ghwaviɗa dər ŋa sla, dər ŋa tuwak, dər ŋa gu. 24 Ka mtu mta skwi nda səla, ka tsuɗay a ta ksata, laviŋ lava kuni ta kla ghwaviɗa ni ŋa maga inda hamata slnaha ghuni, ama yaha yaha kuni da zay. 25 Kahwathwata, dər wati ma mndu ta zutá ghwaviɗa skwa pla ghəŋ ta vlata lu ka drafta ta vu ŋa Yawe ná, dzaʼa kliŋ kla lu ta tsa mndu ya mataba mnduha ni. 26 Dər ma vli ga nzata kuni, yaha kuni da za us, dər ŋa ɗyak, dər ŋa rini a tsi. 27 Dər wati ma mndu ta zutá us, dzaʼa kliŋ kla lu ta tsa mndu ya mataba mnduha ni, » kaʼa.
28 Ka Yawe nda Musa mantsa: 29 « Mnana mna ta la Israʼila: Inda mndu ya dzaʼa klanaktá skwa pla ghəŋa zɗaku ta Yawe ná, klapta ni mida ta mbəhu ŋa Yawe. 30 Vərɗa tsa mndu ya dzaʼa klakta nda dzva ni ta skwa pla ghəŋ ŋa dray ta vu ŋa Yawe. Tsaha ya ghwaviɗa ni, nda ghuva ni. Tsa ghuva ya mbəhu dzaʼa zukwanaŋta tsi ta Yawe. 31 Dzaʼa draf dra mnda dra skwi ŋa Lazglafta ta tsa ghwaviɗa ni ya ta gwir. Ama ghuva ni ná, ŋa i Haruna nda zwana ni tsa. 32 Ma tsa pla ghəŋa zɗaku ya, ka klapta kuni guli ta rkufa zeghwi ka mbəhatá mnda dra skwi ŋa Lazglafta. 33 Tsa rkufa ya, dzaʼa nzakway ka mayaka zwaŋa Haruna dzaʼa vlatá tsa us nda ghwaviɗa skwa pla ghəŋa zɗaku ya. 34 Nzakwa ni ná, Yawe ka ghəŋa ni ta mnaghunaftá kaghuni la Israʼila, ka faghuta kuni ta ghuva zukwaf lu, nda rkuf klap lu ma tsa skwa pla ghəŋa zɗaku ya, ŋa vlaŋtá i Haruna mnda dra skwi ŋa Lazglafta, nda zwana ni. Tsa fayha ya ná, nda nza ka mayaka taŋ, nda nza ka zlahu ŋa ɗekɗek, » kaʼa.
35 Tsaya mayaka i Haruna nda zwana ni mataba skwa pla ghəŋ ta drə lu ta vu ŋa Yawe, zlrafta baɗ tsa fitik pgham lu ta həŋ ŋa maga slna dra skwi ŋa Yawe ya. 36 Tsaya skwi mnanaf Yawe ta la Israʼila ŋa vlaŋtá gwal dra skwi ŋa Lazglafta, zlrafta daga baɗ tsa fitika pghamtá həŋ ya. Tsaya tva skwi ŋa magay ŋa ɗekɗek ha zivir zivira taŋ.
37 Tsaha ya tva skwi ŋa magay nda skwa pla ghəŋ ŋa dray tsuh tsuh, nda mbəha nimaya, nda skwa pla ghəŋ ŋa ɗawa pla dmaku, nda skwa pla ghəŋ ŋa paya tvi, nda ya baɗ famtá mndu ma slna, nda pla ghəŋa zɗaku, 38 mnanaf Yawe ta Musa ta ghwá Sinay, baɗ tsa fitik mnana tsi ta la Israʼila ŋa hlədanaghata taŋ ta Yawe ta mbəhuha taŋ ta mtaka Sinay ya.