Zba makwa ŋa Izak
24
1 Nda hala Abraham. Lula ima ni, tfanagha tfa Yawe ta wi ma inda skwiha ta mag tsi. 2 Ka Abraham nda galata mndu mataba kwalvaha ni, ya ta ga mgham ta ghəŋa inda skwa ni mantsa: « Fiŋ fa ta dzva gha mista rkufaª ɗa, 3 ka waɗihata ka nda hga Yawe, Lazglafta ta zlagigiŋtá luwa nda haɗik kazlay haɗ ka dzaʼa klanaftá marakw ta zwaŋa ɗa mataba kwagha la Kanʼana ta nzaku yu mataba taŋ na wu kəʼa. 4 Ama ka dzaʼa ka ta haɗika ɗa, da mndəra ini, da kləganaghatá marakw ta zwaŋa ɗa, ŋa Izak, » kaʼa.5 Ka tsa kwalva ya nda tsi mantsa: « A ka “La a yu mista gha ta tsa haɗik ya wu,” ka tsa makwa dzaʼa zbafta yu ya, dzaʼa vriŋ vra yu ta zwaŋa gha da tsa haɗik ya sab ka ya rki? » kaʼa. 6 Ka Abraham mantsa: « Kadzeŋkadzeŋ, yaha ka da vradanaptá zwaŋa ɗa da hada. 7 Yawe, Lazglafta ta luwa, ta klagaptá iʼi ma həga ga da ɗa, ta haɗika mndəra ini. Ka gwaɗgihata tsi, ka waɗihata vlaŋtá na haɗik na ta zivirha ɗa. Dzaʼa ghunaga ghuna vərɗa tsatsi ta duhwala ni ta kəma gha, Hada dzaʼa klanakta ka ta marakw ta zwaŋa ɗa. 8 Ala, ka “La a yu mista gha wu,” ka tsa makwa ya, ksəta a na waɗu waɗiha ka na ta kagha wu. Ama dər kinawu tsi, yaha ka vradanaptá zwaŋa ɗa da hada, » kaʼa. 9 Ka klaftá tsa kwalva ya ta dzva ni ka fiŋta mista rkufha Abraham mghama ni, ka waɗanata magatá tsa skwi ya mantsa ya.
10 Ka hlaʼatá tsa kwalva ya ta ŋalibwaha ghwaŋ mataba ŋalibwaha daŋahəga ni, ka laghwi tsi nda inda tsa skwiha daŋahəga ni ɗina ɗina ya. Ka ksaftá tsi ta tvi ta dzaʼa da luwa Nahur ta kwakwara Mesuputami. 11 Ɓhadaghata ni ta wa vavrəma imi ta hula luwa, ka tsəlɓanatá tsi ta ŋalibwaha ta fitik hawu, fitika saba miʼaha ka sliʼi da ta imi. 12 Kaʼa mantsa: « Yawe, Lazglafta daŋahəga ɗa Abraham, wya dzvu, payaɗif paya ta zɗaku ma na guya vgha na gita. Maranaŋ mara ta zɗakatahuɗa gha ta daŋahəga ɗa Abraham. 13 Wana yu ta sladu ta wa vavrəm, dzaʼa sliʼagap sliʼa kwagha mnduha ma na luwa na da ta imi. 14 Makwa ya dzaʼa ɗawaŋta yu da tsi kazlay hdzikiɗiŋ hdzika ta bəzleghwa gha, ka saʼata yu ta imi kəʼa nda tsi, ka kəʼa dzaʼazlay mantsa: “Saʼasa, ŋa sunusta ɗa ta ŋalibwaha gha guli kəʼa ya,” tsatsi tsa zbapta ka ŋa kwalva gha Izak. Mantsa ya dzaʼa snaŋta yu ta maranata gha ta zɗakatahuɗa gha ta daŋahəga ɗa, » kaʼa.
Ŋwafta duʼa kwalva Abraham
15 Ma kɗaku tsi ka kɗiŋtá gwaɗa ni, ka sagha Rebeka nda fatá bəzleghwa ta badzaga. Makwa Betwel ya. Betwel zwaŋa i Milka nda Nahur zwaŋama ni ma Abraham. 16 Ɗina tsa makwa ya, daghali ya, ta sna a ta zgun wa. Ka laha tsi ta wa vavrəm, ka ndəghanaftá tsi ta bəzleghwa ni, fafha. 17 Ka hwayadaghatá tsa kwalva ya da guyay kaʼa mantsa: « Kdəkkdək, taɗifta reuʼ ta imi ma bəzleghwa gha ka saʼata yu, » kaʼa. 18 Kaʼa nda tsi mantsa: « Sa a sa mghama ɗa, » kaʼa, ka gi dzaganatá bəzleghwa ni ŋanata ma dzvu, ŋa fuŋta ni ta wa ni ka saʼata. 19 Manda kɗakwa ni ta vlaŋta, ka saʼatá tsi, kaʼa mantsa: « Ka zakanaf zaka yu ta ŋalibwaha gha ha ka baghaghta inda taŋ, » kaʼa. 20 Ka gi mbəɗamtá tsi ta tsa imi ma bəzleghwa ni ya da tsughaŋ. Ka hwaygladatá tsi ta wa vavrəm da zakagaftá imi. Ka zakanaftá tsi ta inda tsa ŋalibwaha ni ya.
21 Ka nzatá tsa mndu ya ka nghay kul pəslaftá wi, ŋa nghay ka zɗanaf zɗa Yawe ta tsa mbaɗa ni ya tsi ka kinawu tsi. 22 Manda kɗiŋta tsa ŋalibwaha ya ta sutá imi, ka klaftá tsa mndu ya ta halagara dasu ŋa htsiŋ ta maga gram mkuʼ ndəgakwa ni, nda tsuhwala dzvu guli his, ta maga gram dərmək ndəgakwa ya turtuk. 23 Kaʼa nda tsi mantsa: « Makwa waká na? Mniha mna kdəkkdək, dzaʼa ŋatsay yu ta vli ma həga ga da gha ŋa hanata ɗa gita, nda na gwal kawadaga nda iʼi na tani ra? » kaʼa. 24 Kaʼa nda tsi mantsa: « Makwa Betwel yu, zwaŋa Milka ta yanatá Nahur, » kaʼa. 25 Kaʼa guli mantsa: « Mamu kuzuŋ nda mbamba dagala ga ini. Mamu vli ŋa hani guli, » kaʼa.
26 Ka dzatá tsa mndu ya ta ghəŋ ka tsəlɓatá ta kəma Yawe, 27 kaʼa mantsa: « Glaku na ŋa Yawe! Lazglafta daŋahəga ɗa Abraham, ta kwal kul tsanaptá nzaku tɗukwa, nda maga zɗaku ŋa daŋahəga ɗa. Ka kla Yawe ta səla ɗa da həga ga zwana ma ni ma daŋahəga ɗa, » kaʼa.
28 Ka hwayaftá tsa daghala makwa ya, ka laghu da mna tsa skwiha ya ga ma ni. 29 Tsaw mamu zwaŋama ni ma Rebeka, Lavaŋ hga ni. Ka hwayadaptá Lavaŋ slanaghatá tsa mndu ya ta wa vavrəm, 30 kabga nghaŋta ni ta halagar nda tsuhwalha ta dzva makuma ni, snanaha ta tsa gwaɗa ta mnə makuma ni Rebeka ŋa ni kazlay: « Mantsa ya ka tsa mndu ya nda iʼi, » kəʼa ya. Ka lagha tsi slanaghatá tsa mndu ya ta sladu ta vata ŋalibwaha ta wa vavrəm. 31 Kaʼa mantsa: « Sawi! Kagha tfaghagha Yawe ta wi. Nya ŋa sladaghuta gha mabli na? Iʼi, payaf paya yu ta vli ma həga, nda vli ŋa nzakwa ŋalibwaha gha guli, » kaʼa.
32 Ka sliʼaftá tsa kwalva Abraham ya ka lagha da Lavaŋ, ka palagatá lu ta huzla ta ŋalibwaha, ka vlaŋtá lu ta kuzuŋ nda mbamba ta ŋalibwaha, tanafha lu ta imi guli ŋa mbaza səlaha ni nda səlaha gwal kawadaga nda tsi. 33 Ka vlaŋtá lu ta skwa zay, ama kaʼa mantsa: « Haɗ yu ta zay ka ta mnaŋ a yu ta skwi ya dzaʼa yu mnay wa, » kaʼa. « Mna! » ka Lavaŋ nda tsi.
Rusay kwalva Abraham ta skwi ta kladaghata
34 Kaʼa mantsa: « Iʼi ná, kwalva Abraham yu. 35 Tsaw tfanagha tfa Yawe katakata ta wi ta daŋahəga ɗa, ka nutá tsi ka mndu dagala. Ka vlaŋtá tsi ta rina visik, nda slaha, nda tsedi, nda dasu, nda kwalvaha, nda kurɗuha, nda ŋalibwaha, nda kəɗihha. 36 Ka yanatá Sara markwa daŋahəga ɗa ta zwaŋ ma halaku. Ka vlaŋtá daŋahəga ɗa ta inda skwa ni ta tsa zwaŋa ni ya. 37 Ka famtá daŋahəga ɗa ta iʼi da waɗata kazlay: “Yaha ka klanaftá zwaŋa ɗa ŋa marakw ta makwa la Kanʼana, ta na haɗik ta nzaku yu na kəʼa. 38 Ama ka dzaʼa ka da mndəra ini, ma həga ga da ɗa, da klanaftá marakw ta zwaŋa ɗa,” kaʼa. 39 Ka yu nda mghama ɗa mantsa: “A ka la a yu mista gha wu, ka tsa makwa ya,” ka yu. 40 Kaʼa nda iʼi mantsa: “Dzaʼa ghunagagha ghuna Yawe nzu yu ta nzaku nda tsi ta duhwala ni ta kəma gha, ŋa klanakta gha ta makwa ta zwaŋa ɗa mataba mndəra ini ma həga ga da ɗa. 41 Ka ɓhadagha ɓha ka da taba mndəra ini, ksəta a na waɗu ta ɗawu yu ta waɗihata gha na ta kagha wa. Ka kwalaghu kwala həŋ ta vlaghata, haɗ tsəna waɗu na dzaʼa ksa kagha wu,” kaʼa. 42 Ɓhagaghata ɗa gita ta wa vavrəm, ka yu mantsa: “Yawe! Lazglafta daŋahəga ɗa Abraham, ka ŋwaɗifta ka ta na mbaɗa ɗa na. 43 Wana yu ta wa na vavrəm na. Dzaʼa ɗawaŋ ɗawa yu da makwa dzaʼa sab da ta imi kazlay na: Kdəkkdək, vliha vla reuʼ ta imi ma bəzleghwa gha ka saʼata yu, ka yu. 44 Kaʼa dzaʼa zlghiɗiftá wi mantsa: Saʼasa gha, ka zakanaf zaka yu ta ŋalibwaha gha guli, kaʼa, tsaya dzaʼa nzakway ka marakw ya payaf Yawe ŋa zwaŋa daŋahəga ɗa,” ka yu. 45 Ta la a yu kɗiŋtá mna tsa gwaɗa ya ma ghəŋa ɗa wu, ka lagha Rebeka nda fatá bəzleghwa ni ta badzaga. Ka laha tsi ta wa vavrəm, ka tamtá ima ni. Ka yu nda tsi mantsa: “Kdəkkdək vliha vla ta imi ka saʼata yu,” ka yu nda tsi. 46 Ka gi fagatá tsi ta bəzleghwa ni ta badzaga ni kaʼa nda iʼi mantsa: “Saʼasa! Ka sunus sa yu ta ŋalibwaha gha guli,” kaʼa. Ka saʼatá yu, sasunusha ta ŋalibwaha guli. 47 “Makwa wa ka na?” ka yu ɗawaŋta da tsi. “Makwa Betwel zwaŋa Nahur ta yata nda Milka yu,” kaʼa. Ka fanamtá yu ta halagar ma htsiŋ, pghanafha yu ta tsuhwalha ta dzvu. 48 Ka dzatá yu ta ghəŋ ka tsəlɓata ta kəma Yawe. Ka rfanaghatá yu ta Yawe, Lazglafta daŋahəga ɗa Abraham, ta kla iʼi ta vərɗa tvi, ŋa kla makwa zwaŋama ni ma daŋahəga ɗa ŋa zwaŋa ni. 49 Ndanana tama, ka ta kumay kuni ta zɗaku nda nzaku tɗukwata daŋahəga ɗa katsi, mnihawa mna. Ka magava a tsi guli wu, mnihawa mna, ka mbəɗa yu ta vgha nda ga zeghwi, ka nda ga zlaɓa a tsi, » kaʼa.
50 Ka i Lavaŋ nda Betwel zlghanaftá wi mantsa: « Nana skwi na ná, Yawe ta payafta. Laviŋ a aŋni ta mnay kazlay mantsa nzakwa ni, aʼ mantsa a nzakwa ni wu kəʼa wa. 51 Wana Rebeka ta vata kagha, kla ka dzaʼa ka, ka nzakwa tsi ka markwa zwaŋa daŋahəga gha manda ya mna Yawe, » ka həŋ. 52 Manda snanata tsa kwalva Abraham ya ta gwaɗa taŋ, ka tsəlɓatá tsi ka dzatá ghəŋ ta haɗik ta kəma Yawe. 53 Ka hlagaptá tsa kwalva ya ta huzla ka kfura tsedi nda ya la dasu, nda lgutha, ka vlaŋtá Rebeka. Valaŋha guli ta mbəhuha ta ɗinuta ta i zwaŋama ni nda ma ni.
54 Ka zutá həŋ ta skwa zay, suha həŋ ta skwa say nda sa, tsatsi nda gwal kawadaga nda tsi tani. Ka han həŋ hada. Tsaɗakwa vli ga sərɗək sliʼafər həŋ, kaʼa mantsa: « Vlihawa tvi nda vra yu da daŋahəga ɗa, » kaʼa. 55 Ka i zwaŋama ni nda ma ni mantsa: « Ka nzəɗava nzəɗa na makwa na ka fitik kwitikw kawadaga nda aŋni, ka fitik ghwaŋ mana mana. Tahula tsa ŋa sliʼa ni, » ka həŋ. 56 Kaʼa nda həŋ mantsa: « Ma gərɗ kuni ta iʼi, ya payaf paya Yawe ta mbaɗa ɗa ya, vlihawa vla ta tvi ka vra yu da mghama ɗa, » kaʼa. 57 Ka həŋ mantsa: « Hgagapma na makwa na ka ɗawaŋta mu ta gwaɗa da tsi, » ka həŋ. 58 Ka hgagaptá həŋ ta Rebeka, ka həŋ nda tsi mantsa: « Ta dzaʼa ka mista na mndu na ra? » ka həŋ. « Ta dzaʼa yu, » kaʼa.
Klədanaghatá makwa ta Izak
59 Ka zliŋtá həŋ ta Rebeka makuma taŋ, kawadaga nda matagla ni, ka laghu həŋ mista kwalva Abraham nda tsa mnduha mista ni ya. 60 Ka tfanaghatá həŋ ta wi ta Rebeka, ka həŋ mantsa: « Kagha, makuma ŋni, ka nzata ka ka midza dəmbuʼ dəmbuʼata mnduha. Zivira gha katsi zatá luwaha ghumaha taŋ! » ka həŋ.
61 Ka sliʼaftá i Rebeka kawadaga nda kurɗuha ni ka laf ta ŋalibwa, ka dzaʼa mista tsa kwalva ya. Ka laghu həŋ kawadaga.
62 Ma tsa fitik ya, ka sliʼaftá Izak ta wa Beʼer Lahay Ruʼi ka laghwi da nzata ta haɗika Negev. 63 Ta fitik hawu tama ka sab tsi da ziwa ghəŋa ni ta wa mtak. Kəʼa kəʼa klaŋtá ghəŋ ná, ka nghaŋtá tsi ta ŋalibwaha ta sagha. 64 Kəʼa ka Rebeka klaŋtá ghəŋ guli ná, ka nghaŋtá tsi ta Izak, gi ka saha tsi ta ŋalibwa. 65 Ka ɗawaŋtá tsi da tsa kwalva ya: « Wa a mndu ta sagha ta wa mazawa da guya amu a na? » kaʼa. Ka tsa kwalva ya mantsa: « Daŋahəga ɗa ya, » kaʼa. Ka klaftá tsi ta skwa bukwa ghəŋa ni, ka bukwamtá kuma ni nda tsi.