Mtatá Sara markwa Abraham
23
1 Dərmək nda hisambsak ndəfáŋ mida na ima Sara. Tsaya gwagwata ima Sara nda hafu. 2 Ka mtutá Sara ma Kiriyatʼarba, tsaya Hevruŋ ma haɗika Kanʼana. Ka taw Abraham ta ghəŋ ta ghəŋa Sara, ka tawamtá tsi.3 Ka sliʼaftá Abraham ma tsa vla mbla markwa taŋ ya da gwaɗa nda zwana Het, kaʼa mantsa: 4 « Wana ka mayəm yu ta nzaku mataba ghuni, tsaɗifwa tsa da kaghuni ŋa ŋa ɗa ta vla kulu, ka paɗamta yu ta markwa ini, ka kliŋta yu ta mbla ni diʼiŋ ta wa ira ɗa, » kaʼa. 5 Ka zwana Het nda Abraham mantsa: 6 « Faŋna fa ta sləməŋ mghama ɗa! Mndu dagala fa Lazglafta kagha mataba ŋni, paɗam paɗa ta markwa ghuni ma ŋərma vli ya mataba kuluha ŋni, haɗ mndu mataba aŋni dzaʼa kwalaghutá vlaghatá vla kulu ŋa paɗamtá mbla markwa ghuni wa, » ka həŋ.
7 Ka sliʼaftá Abraham ka tsəlɓata ta kəma la Het, mnduha ma tsa haɗik ya. 8 Kaʼa nda həŋ mantsa: « Ka ɗvaf ɗva kuni ta paɗamta ɗa ta markwa ini diʼiŋ ta wa ira ɗa katsi, fihawa fa ta sləməŋ, kdəkwa kdək ndəɓanawa ndəɓa ta dzvu ka ŋa ɗa, ta Ifruŋ zwaŋa Tsuhar. 9 Ka vlihata tsi ta galigha Makpela, ta nzakway ka ŋa ni, ta wa vwaha ni ya. Ka skwaɗipta tsi manda ya ta raku ta wa ira ghuni, kada nzakwa tsa kulu ya ka ŋa ɗa, » kaʼa.
10 Tsaw, ta nzaku Ifruŋ hada ma tsa fitik ya mataba la Het. Ka Ifruŋ mnda la Het nda Abraham ta snay sləməŋa la Het, inda gwal ta lagha tskavata ta wa tgha tsa luwa ya mantsa: 11 « Mantsa a mghama ɗa wa! Fiha fa ta sləməŋ. Ta vlagha vla yu ta tsa vwah ya nda tsa galigha ya tani, ta vlagha vla yu. Ta vlagha vla yu ta wa ira la ini. Paɗam paɗa ta markwa ghuni, » kaʼa.
12 Ka tsəlɓata Abraham ta kəma mnduha ta tsa haɗik ya. 13 Kaʼa nda Ifruŋ ta snay sləməŋa inda mnduha tsa haɗik ya mantsa: « Kdəkkdək! Fiha fa ta sləməŋ! Ta vlagha vla yu ta tseda tsa vwah ya, zlghaf zlgha ka dzaʼa yu paɗamtá markwa ini, » kaʼa. 14 Ka Ifruŋ nda Abraham mantsa: 15 « Rvera ɗa, sniha sna ɓa! Vwah ta maga sulay fwaɗ dərmək tseda ni ná, sana wu tsaya mataba u nda kagha na? La paɗamtá markwa ghuni, » kaʼa. 16 Ka tsuʼaftá Abraham ta gwaɗa Ifruŋ. Ka granaft᪠Abraham ta Ifruŋ ta tsa tsedi mna tsi ta snay sləməŋa zwana Het ya. Sulay fwaɗ dərmək manda va ya snu lu ta skwaptá skwi.
17 Mantsa tama, tsa vwaha Ifruŋ ma Makpela ndusa nda Mamre ya, nda tsa galigha mida ya guli, nda inda fuha ma huɗa kuraghuta tsa vwah ya, 18 ka vlaŋtá lu ta Abraham, ka nzaku tsi ka ŋa ni ta wa ira la Het inda gwal ta lagha da tskavata ta wi tgha luwa ni.
19 Tahula tsa, ka paɗamtá Abraham ta Sara markwa taŋ, ma tsa galigha ma tsa vwah ma Makpela ndusa nda Mamre ta hgə lu ka Hevruŋ, ta haɗika Kanʼana ya. 20 Tsa vwah ya nda tsa galigha mida ya tani, nzəgla a ka ŋa la Het wu nuna nda dzrafta taŋ ka ŋa Abraham ka vla kulu, ŋa laviŋta ni ta paɗa mnduha ni.