Lam da gwaɗa
Nana defteri na na: Lfiɗa dzratá wi hga ni, ta gwaɗay ta gwaɗa ta ghəŋa Yesu Kristi. Ta gwaɗay ta gwaɗa ta ghəŋa lfiɗa dzratá wa Lazglafta nda mnduha ni. Ma gwaɗa Grek, saba tsa gwaɗa ya na: Sləkaɗ ya, ta mnay lu guli ka dzratá wi.
Tsa dzratá wi ya ná, tsaya lfiɗa gwaɗa ta ghəŋa tata imi tanaf Lazglafta ta mndu ta sləməŋ ŋa mbanaftá gwal ta zlghaftá Mgham Yesu Kristi, ka mnda mba mndu guli.
Lfiɗa dzratá wi na: Ta ghəŋa snanamtá skwi ta mnduha yeya a ta gwaɗa tsi ta gwaɗa ta ghəŋa ni wa. Ta psay da gwal ta dzaŋa na lfiɗa dzratá wi na ta kurata hahəŋ ka ghəŋa taŋ ta dzaŋay, ta hgay ta həŋ guli ŋa fata taŋ ta ghəŋa taŋ.
Nda ndəgha gwal ta vindaftá defteriha hisambsak ndəfáŋ mida ta slanaghata lu ma lfiɗa dzratá wi. Dzaʼa magay mbsaka taŋ ta təmbay. Mataba vaku ta klaftá hutaf mbsak vivindafta həŋ.
Aŋ mndani, kavghakavgha nzakwa taŋ, ama skwiha mida ná, ta gwaɗ ta ghəŋa skwi turtuk həŋ ta gwaɗa, tsaya ta nzakway ka ɗvuta Lazglafta ta mndu ka marigiŋtá tsi nda ma Yesu Kristi. Ta gwaɗay guli ta ghəŋa dmaku, nda pliŋtá dmaku nda gwaɗa ta ghəŋa hafu ŋa kɗekedzeŋ.
Ta rusay lfiɗa gwaɗaha fwaɗ ta gwaɗa ta ghəŋa nzakwa Yesu, nda tagha skwa ni, nda slnaha ni, nda nzakwa ni, nda mtakwa ni guli, nda ya kəʼa sliʼagapta ma mtaku. Ka sagha Slna gwal ghunay mista taŋ. Tsa defteri ya ta rusay kinawu ka lfiɗa gwaɗa tutá ma vaku ta klafta hkən mbsak, zlrafta ni ma luwa Ursalima ha ta haɗika Ruma ta nzanaghatá inda haɗikha ya.
Tahula tsa guli, ta slanagha sla lu ta ɗelewerha ya vindaf Pwal ka tsaghafta. Vindaf vinda ŋa zlaghawa ɗaŋwaha, nda skwiha ya ta nghanaghatá gwal zlghay nda ŋuɗuf taŋtaŋ, ta tsaha ya. Defteriha tghas tahula tsaha ya guli (Hebru nda defteriha ndəfáŋ vindaf sanlaha) ya, zlahuha kavghakavgha tsaha ya. Ta gwaɗ ta inda gwal zlghay nda ŋuɗuf, ma inda vli na sanlaha. Sanlaha ya guli, nda nza ŋa Igliz, ka ŋa sanlaha ma mnduha ta ghəŋa skwi ta nghanaghatá həŋ a tsi.
Kɗavakta deftera lfiɗa dzratá wi na: Nda dga tsatsi nda hamatani. Skwi ya ta tagh tsi na: Ta taghay ta ghəŋa kinawu ka Lazglafta zatá ghwa, nda nzakwa Kristi ka Mgham marigiŋ lu manda skwi ma suni, ka fwatu, ka gray nda gra. Nda ndəgha sanlaha ma tsa skwiha ya, nda bla ka snaŋta gwal ta dzaŋay gitana. Ama hya hya gwaɗa mida ta laviŋtá nzakway guli ka klatá ghəŋa gwaɗa ma inda lfiɗa dzratá wi mnigiŋ lu tsiɗiɗ: « Ŋa Mgham Lazglafta mu nda Kristi na ga mgham ta ghəŋa haɗik daga ndanana ha ŋa kɗekedzeŋ. » (Suna Yuhwana 11:15).
Nana lfiɗa dzratá wi mbəɗap lu na ná, mbəɗanaptá mnduha ta gwaɗa Hdi lu, ŋa laviŋta taŋ ta snaŋta. Ta tva skwi ta gwaɗ lu mida mbəɗapta lu. Mbəɗapmbəɗa lu manda va skwi ta mnə gwaɗa Grek, ama ka tsislaptá lu manda va ya ka Hdi ta gwaɗa taŋ, ŋa laviŋta taŋ ta snaŋta.
Nda ma mndəra vindatá sanlaha ma fawaya defteri ya ná, dzaʼa slanagha sla lu ta sana ayaha, ŋa dzaʼa dzaŋay ma sana vliha.
Ma kɗavakta na defteri na guli, dzaʼa slanagha sla lu ta paslatá sanlaha ma gwaɗa, nda sanlaha ma hgəha ma lfiɗa dzratá wi, ŋa kataŋtá mndu ta dzaŋa vli ya ta dzaŋ tsi, ŋa snaŋta ni ta skwi ya ta rusu lu, nda vli ya ta gwaɗ lu ta gwaɗa ta ghəŋa ni. Ta lfiɗa dzratá wi vindaf lu nda gwaɗa Grek sladafta lu ka mbəɗaptá na defteri na.
Skwiha ŋaŋam lu manda ya […] ya ná, haɗ tsa gwaɗa ya ma sanlaha ma defteriha ta sab ghalya wa.
Skwiha manda (a) nda pɗakuhani ya guli na: Ta slanaghata mista fawayha lu ta tsaha ya.
Skwiha manda ya (*) ta vata gwaɗa ya ná, ŋa nghay ma kɗavakta defteri.
Fwatuha mida.