Zlrafta 25

Klafta Abraham ta Ketura

1 Ka klaftá Abraham ta sana marakw guli, Ketura hga ni. 2 Ka yayanatá tsi ta zwani: I Zimraŋ nda Yuksaŋ nda Medaŋ nda Midyaŋ nda Yisbak nda Suwah. 3 Ka yatá Yuksaŋ ta i Sava nda Dedaŋ. Wya zivira Dedaŋ: I la Asur nda la Letus nda la Leʼum həŋ. 4 Wya zwana Midyaŋ: I Ghefa, nda Ghefer, nda Hanuk, nda Abida, nda Ildagha. Inda tsaha ya zwana Ketura.

5 Ka vlaŋtá Abraham ta inda skwa ni ta Izak. 6 Ka valaŋtá Abraham ta mbəhuha ta zwani ya yaya tsi nda miʼa sanagha. Ama ta ma nzakwa ni nda hafu, ka ghwaniŋtá tsi ta həŋ ta sana haɗik diʼiŋ nda Izak nda ma mndəra luwa.

Mtakwa Abraham

7 Gwagwata ima Abraham nda hafu ná, dərmək nda ndəfáŋ mbsak hutaf mida həŋ. 8 Ka sab hafu ma Abraham. Ka mtutá tsi ma halaku katakata nda zɗaku guli. Ka laghu tsi da dzidzíha ni. 9 Ka paɗamtá i Izak nda Ismayel ma galigha Makpela, ma vwaha Ifruŋ zwaŋa Tsuhar mnda la Het ta nzakway ndusa nda Mamre, 10 ma tsa vwaha Abraham ta skwata da zwana Het. Hada lamta lu ta i Abraham nda markwa taŋ Sara. 11 Tahula mtatá Abraham, ka tfanaghatá Lazglafta ta wi ta Izak zwaŋa ni. Ka nzatá Izak ndusa nda Beʼer Lahay Ruʼi.

Mndəra la Ismayel

12 Wya rusa ta ghəŋa mndəra la Ismayel zwaŋa Abraham, ya yana makwa la Masar Hagar, kurɗa Sara. 13 Wya hga zwana Ismayel ta tva na yayagatá həŋ. Taŋtaŋa zwaŋa Ismayel tsaya Nevayut, Kedar, Adbeʼel, Mivsam, 14 nda Misma nda Duma nda Masa, 15 nda Hadat nda Tema, nda Yetur nda Nafis nda Kedma. 16 Tsaha ya zwana Ismayel ghwaŋpəɗ his. Inda taŋ ka mgham ta ghəŋa mndəra mndu turtuk turtuk. Ka tsatsaftá həŋ ta həga luwa taŋ nda vla nzakwa taŋ, nda hga taŋ. 17 Wya mbsaka vakwa Ismayel nda hafu: Dərmək nda hkən mbsak ndəfáŋ mida, ka sab hafu mida, ka mtutá tsi. Ka laghu tsi da dzidzíha ni. 18 Ka nzatá zivira Ismayel ta haɗik sliʼafta ni ndusa nda Havila dikw ta vata Sur, mbəŋ ya mbəŋ ya nda Masar ta lab lu nda ma Asur. Diʼiŋ nda inda zwana ma taŋ nzata həŋ.

Mndəra la Izak

19 Wya rusa ta ghəŋa mndəra la Izak zwaŋa Abraham. Abraham ta yatá Izak. 20 Fwaɗ mbsak ima Izak ta klaftá tsi ŋa markwa taŋ ta Rebeka, makwa Betwel la Aram ma Padaŋ Aram. Si makuma ni ma Lavaŋ mnda la Aram ya guli. 21 Ndiʼa ndiʼa Izak ka maga duʼa da Yawe ta ghəŋa markwa taŋ, kabga tsutsa ka dzəghəŋ. Ka tsuʼaftá Yawe ta duʼa ni, ka zlghaftá Rebeka markwa taŋ ta huɗi. 22 Ka lmu zwani ta lmu ma huɗi ni. Kaʼa mantsa: « Ka si manda tsa tsi, kabgawu kəl tsi ka sliɗaghatá na? » ka Rebeka, ka laghu tsi ɗaway da Yawe. 23 Ka Yawe nda tsi mantsa:

« His mndəra mndu ma huɗa gha,

his mndəra mndu dzaʼa yata ka.

Dzaʼa malaghu mala sani nda mbraku ta ghəŋa sani.

Mali dzaʼa nzakway ka kwalva sagəŋ, » kaʼa.

24 Ka sagha fitika dgakwa ni. Gurzlalaʼ mbuhwali ma huɗa ni. 25 Ka saha taŋtaŋa ni lbək ka swida dva dzeʼdzeʼ vgha ni manda huta. Ka tsanaftá lu ta hga ni ka Ghesav^ª. 26 Tahula tsa, ka saha zwaŋama ni nda ŋatá durama Ghesav ma dzvu. Ka tsanafta lu ta hga ni ka Yakubu^ª. Mkuʼ mbsak ima Izak ta yatá lu ta həŋ.

Skwapta Ghesav ta mamali mala ni

27 Ka galaku tsa zwani ya, ka nzaku Ghesav ka mnda raya viɗviɗ, mndu ta nzaku ma mtak. Ka nzatá Yakubu ka mndu nda hana ghəŋ ni mintgha ma tumpul. 28 Ta ɗvu ɗva Izak ta Ghesav kabga zɗəgana zɗa sluʼa mtak. Ama ta ɗvutá Rebeka ta Yakubu.

29 Ma sana fitik, ka datá Yakubu ta skwa zay. Ka vraktá Ghesav ma mtak. Nda hərfa katakata. 30 Kaʼa nda Yakubu mantsa: « Kdəkkdək zliɗiŋ tvi ka niʼuta yu ta na ɗali ka dva na, kabga nda hərfa yu, » kaʼa. Tsaya kəl lu ka tsanaftá hgu ka Idum^ª. 31 Ka Yakubu mantsa: « Skwaɗip skwa karaku ta má mali mala gha, » kaʼa. 32 Ka Ghesav mantsa: « Wana yu dzaʼa mtuta da maya, nu dzaʼa katifta má mali mala ɗa na? » kaʼa. 33 Ka Yakubu mantsa: « Waɗiha waɗa karaku, » kaʼa. Ka waɗanatá tsi, ka skwanaptá mamali mala ni ta Yakubu. 34 Ka vlaŋtá Yakubu ta Ghesav ta buradi nda datá mbiza. Ka zutá tsi, suha ta imi, ka sliʼaftá tsi ka laghwi. Ka hərtətatá Ghesav ta má mali mala ni.