बद वहितुरकुन बतल करुसना
2
1 बति इव चोकोट्नङ बोदन पिय्सि ताकना इन्जेर निमे वूर पर्जतुन करुसीम.
2 “बुदि-गियंते मंदना, दुस्रुर मान सीनल पिसना, आसन मेय्सि मंदना, बर्पुर बरोसते मंदना, सम्दिरकुन पेर्मते सूडना अनि वोर्च्वल गुंते मंदना” इन्जेर वेडिलकुन करुसीम.
3 अदे तीर्दे मातरिकुन, “पवित्रा जिन्गनिते पिसना, दुस्रुरकुन राङ सिय्वा, कल-पिदेडलिर आय्वा अनि सिरिप चोकोटुने वेहना” इन्जेर करुसीम.
4-5 अस्केने अव मातरिक, डिया पेकिन, “मी माड्सतुन अनि मरि-मियडुन पेर्मा कियना.
मीवा मिरट जरब्ने अनि पवित्रा* मंदना.
मीवा रोता काम कियना.
दया गुन मंदना अनि मीवुर माड्सुरा गोस्टि पिय्सि ताकना” इन्जेर बोदा करुसींतङ.
अद तरिकता डियना पिस्वल सूड्सि, बोरे गिर बगवंतना गोस्टितुन उल्टा वड्का परुर.
6 अदे तीर्दे डियुरकुन, “मीवा मिरट जरब्ने मंदना” इन्जेर गटि-दीर्या सीसेर करुसीम.
7 नीवा निमे चोकोट्नङ काम्क कीसेर, वूर डियुरकुन ताकुसियना.
निमे करुस्वलिक गोस्टिङ बेद-बाव तोह्वक्ने, मान सीनल मंदना.
8 पगा-दार्क नीकुन तप्नगा पिय्वक्ने दिहंते करुसीम.
अस्के निमे तप्नगा साप्डे माय्वा सोन्जि, वूर लजे मांतेर.
9-10 दासिरकुन, “मीवुर माल्कलिर वेह्ता तीर ताक्सि आनंद सीम्ट.
वूरकुन बस्केन मर्ला बड्मट अनि वूर्गटल बतय कल्सि वोय्मट.
बति वूर माल्कलिर मी पोरो नंमकम इरनल बरोसते चोकोट पिसट” इन्जेर करुसीम.
अहन वूर पिस्तेके, मावोर बचि किय्वल बगवंतना गोस्टि दुस्रुरकुन तंवा बाजुन ऊमा परंता.
11 वूर सम्दिरे अहन पिसना, बारितेके सम्दिरकुन पापनल बचि किय्ले बगवंतना पेर्मता-दया उजगिरि अर्ता.
12 अद पेर्मता-दया माकुन, “बदे पेन सेले इंवलिक गोस्टिन अनि दुनियतङ आसन सुटि कीम्ट.
मावा मंदुन जरब्ने इर्सेर, चोकोट-पांदे ताकना अनि इंके इद दुनियते मावा आत्मता बाव-बक्तिते पिसेर मंदना” इन्जेर करुसींता.
13 माकुन बचि किय्वल सक्ति वाले बगवंतल आय्वल येसु किरिस्तु मय्मते वाय्वल दिवोसुन साटि, मरट सम्दिर आसते सूड्सेर मंतट.
14 सम्दो करब-पांदल माकुन सुटि कियुसना इन्जेरेन येसु किरिस्तु तंवा जीवा सीतोर.
इदेन हिंदल माकुन सुदुड कीसि सत्नङ काम्क कीसेर पर्पेडे माय्ले नेमि कीतोर.
15 इंके वेरि वेह्तङ गोस्टिनल, “बव गोस्टिङ पिय्सि ताकना अनि बवेन सुटि कियना” इंवलिकुन अदिकार्दे लोकुरकुन कडक करुसीम.
बोरे नीकुन चुडुर-पांदे सूड्वक्ने सूडा.