बक्तलिर किय्वलिक काम्क
3
1 “राज ताकुस्वलिरकुन अनि अदिकारिरकुन मर्लबड्वक्ने वूर आगे सीतपिनय ताकना” इन्जेर लोकुरकुन हेतु कीम.
अनि, “मान-मर्यदते ताक्सेर चोकोट्नङ काम्क कियन साटि तयर मंदना.
2 बोने राङि सिय्वक्ने अनि जग्डङ किय्वक्ने सांतिते मंदना.
सादु गुन वालिर आसि, सम्दिर पोरो दया तोहना” इन्जेर वूरकुन करुसीम.
3 बारितेके मरट गिर तोले वूर दाते मोंडिर आसि बोनय गोस्टि केन्ज्वक्ने तप्ने ताक्तट.
दुस्रुर माकुन कपट्ने ताकुस्ता काड्कि, मावा मंदङ आसन अनि सुकुन साटि कोर्सेर मंदट.
मावा जिन्गनि पूरो करब अनि कुटा कुटा गुंते निन्चि, वोरोन वोरोर पगते सूड्ंदट.
4 अहन मरट पाप्ने ताक्सेर मनेके तेर बति, बचि किय्वल बगवंतल मा पोरो पेर्मतुन अनि दयतुन तोह्तोर.
5 वोर मावङ नियत्नङ कामकुन हिंदल माकुन बचि किय्मकि.
बति तंवा दयतुन हिंदले माकुन बचि कीतोर.
बगवंतल मावङ पापकुन नोर्तोर.
अनि पवित्रा आत्मतुन हिंदल, माकुन उंदुंदि जोका जल्मा सीसि, पूना जिन्गनि सीतोर.
6 माकुन बचि किय्वल येसु किरिसतुन हिंदले, अद पवित्रा आत्मतुन बर्पुर मा पोरो वेडितोर.
7 वोना पेर्मता-दयतुन हिंदले, मावङ पापकुन पासि वाट्सि, तंवा सङा नियत्ने मंले अनि मरट स्वर्ग्नुर ईसदार्क आयना इंवल इचतेन इहिन जर्ग्ता.
इद तरिकते मरट आसा किय्वल बस्केट पिस्वल जीवा माकुन पुटंता.
8 इद सतेम आंद.
इव गोस्टिन निमे कडक वेहना.
अस्केने बगवंतन पोरो बरोसा कीतुर दिहंते मन्जेर, चोकोट्नङ काम्क कींतेर.
ईतङ गोस्टिङ चोकोट्नङ अनि लोकुरकुन पाय्दा सिय्वलिक आंदुङ.
9 बति जुरत सेलेङ अव गोस्टिना चर्चा, कांदानकुन बारेते चर्चा अनि यूदुल्क्ना कानुंतुन बारेतङ लोलिङ अनि जग्डनगटल लक मन.
इव बततुने कामि सियोङ अनि इदेन हिंदल बतय पाय्दा पुटो.
10 अहन लोलिङ जग्डङ कीसि पाकि किय्वन उंदि रंड जोकङ दम्कि सीम.
केन्ज्वेके सोत्तेके वोना सोप्ति सुटि कीम.
11 आतोर मायनल सत्ना सरि सुटि कीसि, पाप्नगा कोंडे मासि तंवा तना सिक्सा बोगे मायना इंवल गोस्टि नीकुन टावये.
आक्रिता गोस्टि
12 नना अर्तेमांतुन सेलेके तुकिकुन इविर्गटल बोन तेर वोरोन निह्गा सारि कींतोन.
अस्के येंटने निकोपोलि चहर्ते वाय्ले निमे कोसिद कीम.
बारितेके इद पीनि-गालुम नना अगा मंद्का इन्जेर निर्नय कीतोन.
13 वकिल जेनल अनि अपोलो वायन साटि पेसिनेके वूरकुन पह्जे मत्ता सम्दोता इंतजम कीसि सारि कीम.
14 मावुर चोकोट्नङ काम्क करिसि, दुस्रुरङ जुरतकुन पूरि कीसेर मंदना.
पंडि पुटनल चोकोट पिसना.
15 ना सङा मंवलिर सम्दिर नीकुन दंडोस वेह्चेर मंतेर.
बरोसतुन हिंदल सोप्तलिर आतुर सम्दिरकुन नावा दंडोस वेहा.
मी सम्दिर पोरो बगवंतना पेर्मता-दया सात मनि.