तीतु
तीतुन लिहि कीता चिटि
पव्लुनगटल चोकोट-वायुट्ना कबुर
1
1 इद चिटि पव्लुनगटल वाता आंद.
नना बगवंतनोर दासि माय्नना अनि येसु किरिस्तुनोर अपोस्तुल्ता आंदुन.
बगवंतनुर बक्तलिरा* बरोसतुन बडि किय्ले अनि वूरा मंदुन मार्युसि, मरट ताक्वल बगवंतना सते सर्दे ताकुस्ले, नाकुन नेमि कीतोर.
2 इद सत्ना गोस्टि, बस्केट पिस्वल जीवा पुटंता* इंवल बरोसतुन पोरो आदर आसि मंता.
लबड वड्कोर वोर बगवंतल माकुन इदेन सींतोन इन्जेर मुनेन वाग्दन सीतोर.
3 बरोबर वकत्ने इद तंवा मर्मता कबुडुन माकुन वेह्चि तोह्तोर.
माकुन बचि किय्वल बगवंतल अद कबुडुन पचर कियना इन्जेर हुकुम सीसि, नाकुन हव्लि कीतोर.
4 उंदि तीर्दा बरोसतुन पिय्सि, नना मिय्तोर मरिन दात मंवल तीतुन इद चिटि लिहि कीसेर मंतोन.
बाबो बगवंतल अनि माकुन बचि किय्वल येसु किरिस्तु नीकुन पेर्मता-दया अनि सांति सियिर.
केरेतु लंकतगा तीतु किय्वल काम
5 तपकुन सुद्रि कियन साटि अनि नना वेह्ता तीर हर उंदि चहर्ता चर्चितुर्गा पेदोलकुन नेमि कियन साटिने नीकुन केरेतु लंकतगा सुटि कीसि वातोन.
6 चर्चितुरकुन पेदोल आय्वल बे-कसुर वाले आसि मंदना.
वोन उंदिय बाय्को मंदना.
वोनुर मरि-मियड मान गूंते मन्जेर, पुले-गांडलिर आय्वक्ने अनि मर्ला बड्वक्ने बरोसा वालिर आसि मंदना.
7 वोर अदिकारि बगवंतना कार्यतुन मुने ताकुस्वल आता काड्कि, वोन्गा गर्वा मंवा, वोर सिर्डल आय्वा, कल-पिदेडल आय्वा, जग्डा-पोय्टल आय्वा, लबड-लप्डते कोतङ कमय किय्वा इंवलिक गुन्क्नगा वोर बे-कसुर वाले आसि मंदना.
8 बति वोर अदिकारि, वातोर-सोत्तोना चोकोट-वायुट पूसि कियना.
चोकोट्नङ काम्क कीसेर मंदना.
मंदा आसतुन आपुसा परना.
नियत्ने मंदना अनि पवित्रा गुन्क्ने, तंवा हद्ने मंदना.
9 तंवा साटि वेह्ता बोदतुन पोरो गट बरोसा इरना.
अस्केन इद मय्मता सतुन लोकुरकुन वेह्चि सुद्रि किया परंतोर.
बूर्ते इद मय्मता सतुन पोरो बरोसा इरुरो, वूर कीतङ तपकुन गिर वोर तोहा परंतोर.
10 तमोय बगड-नियत्ने ताक्सेर मर्ला बड्वलिर, दुस्रुरकुन नमि सिय्ले पोक्डतङ गोस्टिङ वेह्चि, पसि किय्वलिर वेलेटिर मंतेर.
ईतङ लबड गोस्टिङ वेह्वलिर मुके बूर इत्तेके बचे मायन साटि तप्वक तोल कत्रि कियुसना इंवलिर, यूदुल्क्ना जातितेर किर्चन्क.
11 बगड-नियत्ने कोतङ कमय कियन साटि, लबड बोदा वेह्चेर कुटुंबल्क्नङ कुटुंबलकुन सत्ना सर्दल बह्कि कीसेर मंतेर.
आतुरा बोदतुन आपुस्वल जुरत मंता.
12 वूर लबड बोदा वेह्वलिर बारेते, “केर्तियुल्क लबड वड्कंतेर, केडता जंवरतुन दात्नुर, गह्ललिर अनि पुदेललिर आंदिर” इन्जेर केर्तियुल्क्नोरे वोरोर पर्वक्तल वेह्तोर.
13 अद वोना गवा करलेन आंद.
वूरकुन दम्कि सीसि आपुसा लागर.
अस्केन वूर सते बरोसतगा मल्सि वांतेर.
14 अहन मल्सि वातेकेन यूदुल्क बनि कीसि वेह्वलिक कतन वूर मरुङ्सि, मावा सतुन बय्मन आसि ताक्वलिरङ आगेन लेका किय्वक्ने मंदा परंतेर.
15 सुदुड दिल वालिरकुन सम्दिय सुदुड दिसंतङ.
बति करेबलिरकुन अनि बरोसा सेलुर वूरकुन बदे गिर सुदुड दिसो.
वूरा बुदि अनि मन-दिल्क गिरे पूरो करब्ने निन्चि मंतङ.
16 वूर तम्वकुन बगवंतन बारेते टावा इंतेर, बति वूरा ताक्वल बगवंतन बय्मन आतपिनय दिसंता.
वूर मान-मर्यदा सेल्वक्ने मोंडिर आसि, बदे चोकोट्ना काम किया परुर.