कोलसि
कोलसितुरकुन लिहि कीता चिटि
दंडोस्क
1
1-2 कोलसि नगुडे मंवलिर किरिस्तुनगा बरोसा इर्सि ताक्वलिरकुन बगवंतना इचा तीर येसु किरिस्तुनोर अपोस्तुल आय्वल पव्लुना इद चिटि लिहि कीसेर मंतोन.
नना अनि ना बरोबर्तोर बक्तल तिमोति मीकुन दंडोस दोसि, इद चिटि रोह्चेर मंतोम.
मा बाबो बगवंतल* मीकुन पेर्मता-दया अनि सांति सियिर.
दनेवाद वेह्चेर पार्तना किय्वल
3 बस्केते मी साटि पार्तना कींतोमो, अस्के मा येसु किरिस्तु पर्बुनोर बाबो बगवंतन बस्केट दनेवाद वेह्चेर मंदंतोम.
4 बारितेके, मिरट येसु किरिस्तुनगा बरोसा इर्वडुन बारेते अनि बगवंतनुर बक्तलिरकुन पेर्मते सूड्वडुन बारेते केन्ज्तोम.
5 मिरट चोकोट्ना कबुडा सतेमुन केन्ज्ता काड्कि, इद बरोसा अनि पेर्मा मी रोपो पुड्तङ.
अस्केडल, बगवंतल मी साटि स्वर्ग्नगा राकि कीसि इर्तोर अदेनगा, बर्पुर आसा इर्तिट.
6 इद चोकोट्ना कबुर दुनिया पूरो पग्रे मासेर मंता.
इद बगवंतना पेर्मता-दयता सतेम, मिरट केन्चि अर्तम कीता पेजे, बहंते मीवा जिन्गनितुन अद बद्लि कीतयो, अह्ने सम्दो जागनगा दुस्रुरङ जिन्गनिन गिर बद्लि कीसेर मंता.
7 इद चोकोट्ना कबुर मावोर लाड्नोर दादल एपपरनगटल केन्ज्तिट.
वेर मा सङा काम कीसेर मंतोर अनि मी साटि गिर बरोसते किरिस्तुना सेवा कीसेर मंतोर.
8 इदे आय्वा, दुस्रुरकुन पेर्मा किय्ले, पवित्रा आत्मा मी रोपो अद पेर्मतुन पुटुस्ता इन्जेर गिर वोर माकुन वेह्तोर.
9 इव सम्दो मी नड्डुम जर्ग्तङ इंवल गोस्टि केन्ज्तोम अंटितल, मी साटि पार्तना किय्वल मरुङ्मकि.
बगवंतना इचतुन बर्पुर अर्तम कीनल वोना आत्मा मीकुन तेलिवि अनि बुदि-गियन सियना इन्जेर कोर्सेर मंतोम.
10 इदेन हिंदल, मीवा पिस्वडगा सिरिप पर्बुन बस्केट आनंद अनि डगुर-पान सिय्वलिक चोकोट्नङ काम्क कीसि, पंडितुन तोहंतिट.
अनि मिरट बगवंतना इचतुन उंडे अदिक अर्तम किय्वल गियंतगा बडे मांतिट.
11 तंवा मय्मता लेका किया परुर आतल सक्तितल बगवंतल मीकुन लगु सियिर.
अदेने सम्दोन आनंद्ने वोर्चेर ताक्वल गुन मी रोपो अब्बंता.
12-14 मोदोल सय्तन तंवा सिकटिता राज्नगा माकुन कोंडि कीसि मत्तोर.
बति बगवंतल तंवोर मरिन हिंदल, मावङ पापकुन मापि कीसि, अवेनल सुटि कियुस्तोर.
अनि वोर बगवंतल तंवोर लाड्नोर मरिना वेड्चिता राज्नगा माकुन तचि, तंवा पर्जत बरोबर मरट गिर अदेनगा ईसा येतनल कीतोर.
अदेन साटि, बाबो बगवंतन दनेवाद वेह्कट.
किरिसतुन डगुर बोरे सेलोर
15 किरिस्तु मा कडकुन दिसोर वोर बगवंतन मोडिन मंवल आंदुर.
वोर कलि गडे मायन मुनेतले मत्ता काड्कि,
वोरे कलितोर माल्कल आंदुर.
16 बहन इत्तेके आगस्नगा मंवलिके आयि सेलेके दर्तुरित पोरो मंवलिके आयि,
दिस्वलिके आयि सेलेके दिसोङ अवे आयि,
कचुरिङे आयि सेलेके सर्कार्के आयि,
राज ताकुस्वलिरे आयि सेलेके अदिकारिरे आयि,
इव सम्दो गिर किरिसतुन डगुर-पान सियन साटि
वोर किरिस्तुना केय्दे बगवंतल गडि कियुस्तोर.
17 इव सम्दोन मुनेतले किरिस्तु मत्तोर.
इद कलितुन वोरे माल्कल आसि, सम्दोतुन ताकुसंतोर.
18 अदे आय्वा, तंवा मेंदोडुन मोडि मंवल चर्चितुरकुन तला वोरे आंदुर.
सासि-नेंड्सि बस्केट पिस्वलिर्गटल मोदोडोर वोरे आंदुर.
वोर किरिस्तुये सम्दोनगटल मुके वाले आसि मंदना इन्जेर बगवंतले इहिन कीतोर.
19 बारितेके, तन्गा मंवल बर्पुर गुन किरिस्तुनगा गिर मंदना इंवले,
बाबो बगवंतना इचा आंद.
20 तंवोर मरि आय्वल किरिस्तु मोद्नगा अर्पना सीता नेतुडुन हिंदल,
दर्तुरित पोरो मंवलिक अनि स्वर्ग्नगा मंवलिक
सम्दोन गिर तन्गा मीरि कीसि,
अवेन अनि तंवा नड्डुम सांति मंदना इंवले,
बाबो बगवंतना इचा आंद.
21 अनि मीवा गोस्टि सूड्तेके, मोदोल मिरट करब-विचर अनि करब कामकुन हिंदल बगवंतनल लङ मन्जेर, वोनुर पगा-दार्क आसि मत्तिट.
22 बति इंके किरिस्तु माय्नना रूप्ने वासि, जीवा सीततुन हिंदल बगवंतल मीकुन करुम कीतोर.
इदेन हिंदल मी सम्दिरकुन सुदुड कीसि, पवित्रा अनि बे-कसुर वालिर मोडि तंवा चर्नते मीकुन निपुसना इंवले बगवंतना इचा.
23 बति मिरट किरिस्तुनगा बरोसा इर्सेर, अविवक्ने गट निला लागर.
चोकोट्ना कबुर केन्ज्ततुन हिंदल मीकुन पुट्ता आसतल बह्के माय्मट.
इद कबुर दुनिया पूरो पचर आता.
इद कबुडुन साटि नना सेव्कना आसि मंतोन.
चर्चितुर साटि पव्लु बोगे माता काया-कस्टम
24 बहंते किरिस्तु तक्लिब्क बोगे मातोरो, अह्ने वोना मेंदोल आय्वलिर चर्चितुर गिर बोगे मांतेर.
अदेन साटि, किरिस्तु ना लासि नेमि कीतङ तक्लिब्क, नना आनंद्ने बोगे मासेर मंतोन.
25-26 बगवंतना कबुर पिडिनङ-पिडिङ मक्डिते मत्ता.
बति इंके, तंवुर पर्जा करि किय्ले, उजगिरि अर्ता.
इद तंवा कबुडुन बर्पुर मीकुन बोदा वेहना इन्जेर बगवंतल नाकुन नेमि कीतोर.
अदेन हिंदल, चर्चितुरकुन सेव्कना आतोन.
27 दुस्रुर सम्दिर साटि तंवा मक्डिते मंवल डगुर पिलंतुन बारेते, तंवा पर्जतुन वेह्चि तोहना इन्जेर, बगवंतल निर्नय कीतोर.
अद मक्डिता पिलन मिह्गा मंवल किरिस्तुय* आंदुर.
वोन हिंदल स्वर्ग्नगा मंवल बगवंतना मय्मतगा तप्वक ईसा येतंतट इंवल आसा मा रोपो पुड्ता.
28 वोर किरिसतुन बारेतेन, ममोट पचर कीसेर मंतोम.
मह्गा मंवल पूरो बुदि-गियंतुन वाप्रि कीसि, हर वोरोन बुदि वेह्चेर, बोदा कीसेर मंतोम.
इद तीर्दे हर वोरोन किरिस्तुना बाव-बक्तितगा बर्पुर कीसि, बगवंतन मुने निपुसना इंवले मावा इचा.
29 इद इचतुन पूरि किय्लेने, किरिस्तु तंवा सक्तितुन ना रोपो इर्तोर.
इदेन हिंदल, नना काया-कस्टम कीसेर मंतोन.