बचि किय्वल बगवंतन डगुर-पान सिय्वल
146
1 येहोवा देवन डगुर-पान सीम्ट. नावा परंति, येहोवा देवन डगुर-पान सीम.
2 नना पिसि मनल वेरि, येहोवा देवन डगुर-पान सींतोन.
नावा जिन्गनि पूरो ना बगवंतन डगुर-पान सींतोन.
3 राजलिरे आयि, माय्नलिरे आयि मीकुन बचि किया परुर.
अदेन साटि वूर पोरो बरोसा इर्मट.
4 वूर परन सुटि कीता पेजे, वूरङ कूर्क तोडितगा तोडि आंतङ.
अद नेटिने वूरङ पिलन्क कामि सिय्वक आंतङ.
5 बोंते याकोब्नोर बगवंतल मदत कींतोरो,
अनि बोर्ते तंवोर बगवंतल येहोवन पोरो आदर आसि मंदंतोरो,
वोर आसिर्वाद येत्वल आंतोर.
6 वोर बगवंतले हाबडुन, दर्तुरितुन, सम्दुरकुन अनि अवेनगा मंवल सम्दोतुन गडि कीतोर.+
वोर गोस्टि सीतोर इतेके, बस्केट तप्वल आयोर.
7 येहोवा देवल दाबे मासि मंवलिर साटि, नायम जर्गुसंतोर.
करुते मंवलिरकुन काने सींतोर.
कोंडे मासि मंवलिरकुन सुटि कींतोर.
8 येहोवा देवल, गुड्डिरकुन नदुर सिय्वल आंदुर.
वोरे तक्लिब्क्ने वरिसि मंवलिरकुन मदत किय्वल आंदुर.
वोरे नियत्ने ताक्वलिरकुन पेर्मा किय्वल आंदुर.
9 येहोवा देवले पर्देसिरकुन काबाड्वल आंदुर.
वोरे पोसटिरकुन अनि रांडे वेय्लोकुन साया वाय्वल आंदुर.
वोरे करेबलिरङ पिलन्क कामि सिय्वक किय्वल आंदुर.
10 येहोवा देवल बस्केट राज ताकुसंतोर.
ये सियोंतुर लोकुर्निट! मी बगवंतल पिडिनङ-पिडिङ राज ताकुसंतोर.
येहोवा देवन डगुर-पान वायि.