डगुर-पान सीसेर वार्वल कीर्तन
डगुर-पान सीसेर दाविद वार्ता कीर्तन.
145
1 ना बगवंता, ना राजा! नीकुन डगुर-पान सींतोन. नीवा पोरोडुने बस्केट डगुर-पान सींतोन.
2 हर दिवोस नीकुन डगुर-पान सींतोन.
नीवा पोरोडुने बस्केट डगुर-पान सींतोन.
3 येहोवल डगुर-पान वाले आंदुर अनि पर्जा वोन डगुर-पान सींतेर.
वोर किय्वलिक डगुक कार्यन, मरट लेका किया पर्वट.
4 उंदि पिडितुर उंडे उंदि पिडितुरकुन, नीवङ कार्यन बारेते वेहंतेर.
वूर नीवङ डगुक कार्यन बारेते दुस्रो पर्जतुन वेहंतेर.
5 नीवा डगुर कीर्तितुन, मय्मतुन
अनि चमत्कार्दङ कार्यन बारेते नना द्यान कींतोन.
6 पर्जा नीवङ वेरिनल मंवलिक मय्मतङ कार्यन बारेते पचर कींतेर.
अनि नना गिर निमे बच्चोर डगुनि आंदियो अदेन बारेते वेहंतोन.
7 नीवा दया वाले गुंतुन बारेते पर्जा पोडि कीसि वेहंतेर.
वूर नीवा नियतुन बारेते वारंतेर.
8 येहोवा देवल बेय दया वाले अनि किवुल तोह्वल आंदुर.
वोर वेय्ने सोङुन वायोर अनि मारियो अद पेर्मते बर्पुर निन्चि मंवल आंदुर.+
9 येहोवा देवल सम्दिरकुन चोकोट सूड्वल आंदुर.
वोर तंवा दया तना गडि कीतङ अव सम्दोन पोरो तोहंतोर.
10 येहोवा देवा! निमे गडि कीतङ अव सम्दो नीकुन डगुर-पान सीसेर मंतङ.
नीवुर बक्तलिर नीकुन डगुर-पान सींतेर.
11 वूर पर्जा नी मय्मता राजुन बारेते वेहंतेर.
निमे बचोर सक्ति वालेनि आंदियो अदेन बारेते वेहंतेर.
12 इदेन हिंदल नीवा ताकद्नङ कार्यन बारेते
अनि मय्मता राज्ना डगुर-पांदुन बारेते सम्दिरकुन करे मांता.
13 नीवा राज बस्केट निल्सि मंवल आंदु.
निमे पिडिनङ-पिडिङ राज ताकुसेर मंदंति.
14 येहोवा देवल दुक्सते मंवलिर सम्दिरकुन मदत कींतोर.
दाबे मासि मंवलिर सम्दिरकुन मदत कींतोर.
15 निमे बरोबर येलते काने सींति इन्जेर
जीवते मंवलिक सम्दो गिर नी बाज आसते सूड्सेर मंतङ.
16 निमे नीवा मुट्टितुन कोलि कीसि, जीवते मंवल हर उंदितुन
जुरत मत्ता अचोर सिय्वनि आंदि.
17 येहोवा देवल किय्वलिक सम्दो काम्क नियत्नङे आंदुङ.
अनि तंवङ सम्दो काम्क्नगा दया तोह्वल आंदुर.
18 तनकुन कोर्वलिर सम्दिरकुन,
सतेम्ने पार्तना-विंति किय्वलिर सम्दिरकुन,
येहोवा देवल करुमे मंतोर.
19 तंवा बाव-बक्तिता वेरेते पिस्वलिर कोर्ततुन पूरि कींतोर.
वूरा विनंतितुन केन्चि वूरकुन बचि कींतोर.
20 येहोवा देवल तंवा बाव-बक्ति किय्वलिर सम्दिरकुन काबाडंतोर.
बति करेबलिर सम्दिरकुन नासेडम कींतोर.
21 नावा वेन्जेर येहोवा देवन डगुर-पान सींता.
जीवते मंवलिक सम्दो वोना पवित्रा पोरोडुन डगुर-पान सियना!