राजन मेयुस्ता काड्कि बगवंतन वोर दनेवाद वेह्वल
दाविद्ना कीर्तन
144
1 नाकुन काबाड्वल बंडत मोडि मंवल येहोवा देवन डगुर-पान वायि. वोर नावङ केयकुन लडेय किय्वल करुस्तोर.
नावङ बोटन लडे माय्वल ताकद सीतोर.
2 वोरे तंवा मारियो अद पेर्मतुन ना पोरो तोह्वल आंदुर.
वोरे नावा किला, अद किलतुन काबाड्वल गोडा
अनि नाकुन बचि किय्वल आंदुर.
वोरे नाकुन डालु अनि नना सोन्जि वोल्वल जागा आंदुर.
वोरे ना पर्जतुन पोरो* नना राज ताकुस्ले मदत किय्वल आंदुर.
3 येहोवा देवा, निमे नरिमन्कलिरकुन काड्जि कीसि सूड्ले,
वूर बचोडुर आंदिर?
निमे वूर बारेते सोन्च किय्ले,
वूर नरिमन्कलिर बचोडुर आंदिर?+
4 नरिमन्कलिर सिरिप वडिदा हूकुडुन मोडि मंतेर.
वूरङ दिवोस्क वीड्सि सोंवल दड्मित दात मंतङ.
5 येहोवा देवा, नीवङ आगसकुन तेरिसि बूड वरा!
डङलिक गुटनल पोया पेसिनल अवेन इटा.
6 तीज-बीजकुन मिड्चुसि, नीवुर पगा-दार्क परर आनल कीम.
नीवङ बान कोलने पासि वूर हारे मानल कीम.
7 पोरोडल नीवा केय चह्चि नाकुन तपुसा.
कोल येतुन मोडि मंवलिर पगा-दार्क्ना केय्दल नाकुन तपुसा.
8 वूरा तोड्डि पकट गोस्टिङ वड्कंता.
वूरा तिना केय लबड-लप्डते निन्चि मंता.
9 येहोवा देवा, नी बारेते उंदि पूना कीर्तन वारंतोन.
दहा वारिना कर्नाट्ने नीकुन कीर्ति सीसेर वारंतोन.
10 निमेय राजलिरकुन मेयुस्वनि आंदि.
पगा-दार्क्ना तल्वर्तल नी सेव्कल दाविदुन बचि किय्वनि आंदि.
11 पर्देसिरा केय्दल तपुसि, नाकुन बचि कीम.
वूरा तोड्डि पकट गोस्टिङ वड्कंता.
वूरा तिना केय लबड-लप्डते निन्चि मंता.
12 मावुर मर्क तम्वा जवन-पांदे बेर्स्तङ मरकुन मोडि मंनिर.
मावङ मियक राजना किलतङ चेकुस्तङ अव दारुमकुन मोडि मनिङ.
13 मावङ गोदम्क तीर-तीर्दा पंटना रासिते निन्चि बर्पुर मनिङ.
मावङ गोरेङ हजरो हजर्क बडे मासि, पिलङ वहनल मनिङ.
14 मावङ कोंदङ वेले रासिता बर्ति वोहनल मनिङ.
पगा-दार्क मावा नगुडुन रोपो वासि, माकुन दासि-पांदे वोय्वक मंनिर.
मावङ गलिनगा आड्ता लेङ उंडे केन्जा वाय्वक मनि.
15 इद तीर्दे मंवल पर्जा आसिर्वाद येत्वलिर आंतेर.
येहोवा देवन तम्वोर बगवंतल इन्जेर सेवा किय्वल पर्जा आसिर्वाद येत्वलिर आंतेर.