मदतुन साटि किय्वल पार्तना
दाविद्ना कीर्तन
143
1 येहोवा देवा, ना पार्तना केन्जा. नना विनंतिङ कीनेके नीवा केवि सीसि केन्जा.
नीवा बरोसतुन अनि नियतुन पिय्सि नाकुन जवब सीम.
2 नी सेव्कल आय्वल ना पोरो तस्वा किय्ले कसुर वाट्मा.
जीवते मंवलिर्गटल वोरोर गिर नी नदुडे नियत्नोर आयोर.+
3 पगा-दार्क नाकुन पूड्सेर मंतेर.
वूर नाकुन बूड अरुसि चेच्रि कीसेर मंतेर.
सानलिर मंवल कह्चर सिकटि वाले जागतगा
नाकुन डग्लि किय्ले सूड्सेर मंतेर.
4 अदेन साटि ना आत्मा ना रोपो बेय कुसुम्ने आसि मंता.
ना रोपो, ना दिल दड्कि तिन्जि मंता.
5 तोत्तङ दिवोसकुन बारेते हेतु कीसेर मंतोन.
नीवङ सम्दो कामकुन बारेते द्यान कीसेर मंतोन.
नीवा केय्दे कीतङ कार्यन बारेते सोन्च कीसेर मंतोन.
6 नीवा बाज नावङ केय्क चह्चेर मंतोन.
वच्चि सोत्ता बोमि येतुन साटि आसा कीतपिनय,
नावा परन नी साटि आसा कीसेर मंता.
रेला.
7 येहोवा देवा, ना आत्मा बेय कुसुम्ने आसेर मंता.
नाकुन वेय्ने जवब सीम.
नना वीच्ना कोल डोडोत रोपो अर्सि मंवलिर मोडि आय्वक्ने
नीवा मोकोम नाकुन दिस्वक्ने पेरे-गेह्मा.
8 नना नी पोरो बरोसा इर्सि मंतोन.
हर दिवोस सक्रेन नीवा मारियो अद पेर्मतुन बारेते नाकुन हेतु वायुसा.
ना मंदुन नी काक तिरुसेर मंतोन.
नना ताक्वल सरि-मारग नाकुन तोहा.
9 येहोवा देवा, नना नी कोरते वासि मंतोन.
ना पगा-दार्क्ना केय्दल नाकुन सुटि कीम.
10 निमेय ना बगवंतनि आंदि.
नीवा इचा तीर ताक्ले नाकुन करुसीम.
नीवा दया वाले आत्मते नाकुन सपय सरि-मारग्ने ताकुसा.
11 येहोवा देवा, नीवा पोरोडुन हिंदल नावा जीवतुन तावा.
नीवा नियतुन हिंदल ना परंतुन गंडमनल तपु सीम.
12 नना नी सेव्कना आता काड्कि,
नीवा मारियो अद पेर्मतुन हिंदल,
ना पगा-दारकुन मूरि कीम.
अनि ना परंतुन दुक्सा सिय्वलिरकुन नासेडम कीम.