मदतुन साटि किय्वल पार्तना
दाविद्ना कीर्तन: इदेन दाविद उंदि बुयरितगा मन्जि अनुबव कीतङ गोस्टिन पिय्सि कीता पार्तना आंदु.+
142
1 नना येहोवा देवन जोर्ते विनंति कीसेर मंतोन. वोना दयतुन साटि जोर्ते येहोवा देवन जुल्मा कीसेर मंतोन.
2 वोना चर्नते नना बोगे मातङ तक्लिबकुन
अनि कस्टलकुन बारेते वेहंतोन.
3 नावा परन ना रोपो केलि सेल्वक आसि मनेके, नावा सरदुन सूड्ति.
नाकुन उरुसन साटि नना ताक्वल सर्दगा,
नावुर पगा-दार्क चंदोडङ मांडि कीतेर.
4 ना बाजुन नेह्ना सूडा.
नाकुन मदत किय्वलिर्गटल वोरोर गिर सेलुर.
नना विच्चि सोन्जि मक्ले, नाकुन बदे जागा सेले.
ना पोरो किवुल वाय्वल वोरोर गिर सेलोर.
5 ते येहोवा देवा नना जोर्ते लेङ तह्चि,
“नावा जीवा काबाड्ले नना मक्वल जागति निमेय आंदि.
अनि जीवते मंवलिरा दर्तुरित पोरो, निमे नाकुन मत्तेके आयर.
6 नना बेय नारज आसि मंतोन.
नीवा मदतुन साटि नना आड्सेर कीता विनंति केन्जा.
नाकुन पूड्वलिर नह्गटल गिर ताकद वालिर आंदिर.
वूरा केय्दल नाकुन तपुसीम.
7 नना नीवा पोरोडुन दनेवाद वेहन साटि,
नावा परंतुन जेल्दल मोक्डो सुटि कीम.
इहिन ना साटि निमे किय्वल डगुर मदतुन पिय्सि,
नना नियत्नुर सङा मीरे मासि,
नीकुन डगुर-पान सींतोन” इन्जेर नीकुने विनंति कीसेर मंतोन.