पोद्रेक्ना पार्तना
दाविद्ना कीर्तन
141
1 येहोवा देवा, नना दुक्सते नीकुन जोर्ते पार्तना कीसेर मंतोन. नना विनंति कीनेके, निमे केवि सीसि केन्जा.
अनि नाकुन मदत किय्ले नह्गा वेय्ने वरा.
2 नावा पार्तना नी साटि दूप सिय्वडुन मोडि मनि.
नना केय्क तह्चि पार्तना किय्वल
नुल्पेडा निवोदुन मोडि मनि.+
3 येहोवा देवा, नावा तोडदुन जरब्ने इरनल नाकुन मदत कीम.
नावङ सिव्लिनल बह्रि वाय्वलिक गोस्टिन सूड्सेर मन.
4 पापेस्तलिर सङा मीरे मासि,
करेबलिक काम्क्ना जोलित सोंवक,
नावा मंदुन करब्नेके मला सिय्मा.
बेय सवद मंवल वूरा काने तिंवक नाकुन मदत कीम.
5 नियत्ने ताक्वलिर नाकुन पातेके, अद नाकुन चोकोट्ना बुदि वेह्तप आंता.
वूर नाकुन दम्कि सीतेके, अद नावा तलदगा निय सोक्तप आंता.
नावा तला अहन निय सोक्वडुन वटिय इंनो.
वूर किय्वलिक करेबलिक कामकुन उल्टा नावा पार्तना मंदंता.
6 बस्केते करेबलिरुर अदिकारिरकुन गुटना टिक्रितल बूड डग्लि किय्वल जर्गंतयो,
अस्के पर्जा नावङ गोस्टिङ बेय चोकोट्नङ इन्जेर वोपंतेर.
7 वोरोर मायनल बोमितुन ऊड्सि रोपोडा तोडितुन बह्रि वाट्तपिनय,
मावङ बोकङ वीचकुन करुम रीक्सि मंतङ.*
8 येहोवा देवा, ना पर्बु! नावङ कड्क नी बाज सूड्सेर मंतङ.
निमे काबाड्कि इन्जेर नीवा चर्नते वातोन.
नावा परन सोंदा सिय्मा.
9 ना साटि, वूर मांडि कीता जार्दल नाकुन बचि कीम.
पाप्नङ काम्क किय्वलिर करेबलिर दोस्तङ पासनल नाकुन तपुसि काबाडा.
10 वूर करेबलिर तम्वङ जार्क्नगा तमय अरिर.
बति नावा सरिय नाकुन सोंदा सीम.