काबाडा इन्जेर किय्वल पार्तना
पाटा वारुस्वन साटि: दाविद्ना कीर्तन
140
1 येहोवा देवा, करेबलिरा केय्दल नाकुन सुटि कियुसीम. आड्मुट्यलिरा केय्दगा अर्वक्ने नाकुन काबाडा.
2 वूर तम्वा दिलतगा करब कियना इंवलिक पिलन्क सोन्च कींतेर.
वूर बस्केट जग्डङ पुटुस्ले सूडंतेर.
3 तरस्ना वेन्जेडुन मोडि वूर तम्वङ वेन्जेकुन मेसियंतेर.
वूरङ वेन्जेकुन बूड तरस्ना विक मंदंता.
रेला.+
4 येहोवा देवा, करेबलिरा केय्दे अर्वक्ने नाकुन काबाडा.
दाबि कीसि इर्वलिरा केय्दल नाकुन बचि कीम.
नना काल गसुर्क्सि अरनल वूर पिलन वाट्सेर मंतेर.
5 गर्वते मंवलिर ना साटि पासङ वाड्सि इर्तेर.
वूर सरदुन पोरो चंदोडङ मांडि कीतेर.
नाकुन पियन साटि जार्क गिर वाड्तेर.
रेला.
6 तेर बति नना येहोवा देवन सङा,
“निमेय ना बगवंतनि आंदि.
नावा पार्तनतुन केवि सीसि केन्जा” इन्जेर विनंति कीसेर मंतोन.
7 पर्बु आय्वल येहोवा देवल, नाकुन बचि किय्वल ताकद आसि मंतोर.
लडेय जर्गन नेटि, निमे ना तलतुन काबाडंति.
8 येहोवा देवा, करेबलिरङ आसन पूरि किय्मा.
वूर पोके माय्वक मंले वूरङ पिलनकुन रोकि कीम.
रेला.
9 ना सिर्मुट मंवलिर पगा-दार्क पोके मानिर्ते,
वूर तम्वा तोड्दे कीता नुक्सन वूर्गन मल्सि वायि.
10 रमा रमा पोत्वल तड्मि गोकङ वूर पोरो अरिङ.
तड्मिता गुंडम्नगा वूरकुन वाट्वल जर्गि.
तिरिसि तेदा वाय्वक्ने, चिक्ला मंवल बेय कोल डोड्डोतगा अरिर.
11 चह्डिङ वड्क्वलिर दर्तुरित पोरो वेले जेल पिस्वक मंनिर.
वूर आड्मुट्यलिर पोरो गंडम वासि नुक्सन कियि.
12 गरिबकुन हिंदल आसि येहोवा देवल वड्कंतोर,
अनि दिक सेलुर वूरकुन वोर नायम कींतोर इंवल नाकुन टावा.
13 नियत्नुर तप्वक नी पोरोडुन दनेवाद वेह्चेर डगुर-पान सींतेर.
सत्ने ताक्वलिर नीवा चर्नते पिसंतेर.