सर्वा सक्तिवंतल बगवंतन डगुर-पान सिय्वल
147
1 येहोवा देवन डगुर-पान सीम्ट. मा बगवंतन कीर्तन वार्वल चोकोट आंद.
अहन डगुर-पान सिय्वल गोस्टि चोकोट्ना अनि आनंद सिय्वल आंद.
2 येहोवा देवले येरुसलेमुन मल्सि दोह्वल* आंदुर.
दासि-पांदे सोत्तुर वूर इज्रयेल पर्जतुन* मीरि किय्वल आंदुर.
3 दिलतगा गायल आतुरकुन चोकोट किय्वल आंदुर.
वूरङ गावकुन पटि दोह्वल आंदुर.
4 सुकुक बचोङ मंदना इंवल लेका नेमि कीसि इर्तोर.
हर उंदि सुकुमुन पोरोल पिय्सि केय्वल आंदुर.
5 मावोर पर्बु वेले डगुर अनि बेय सक्तिवंतल आंदुर.
वोन्गा बच्चोर गियन मंता इंवल वेहा पर्वट.
6 येहोवा देवल कमि-पांदे मंवलिरकुन मदत कींतोर.
बति करेबलिरकुन बूड दाबि कीसि नासेडम कींतोर.
7 दनेवाद वेह्चेर डगुर-पान सीसेर येहोवन साटि वारट.
चोंड्का नेकुसेर मा बगवंतन साटि वारट.
8 वोर हाबडुन टेपने मुह्वल आंदुर.
दर्तुरित साटि पिरदुन रोह्वल आंदुर.
गुटन पोरो जाडि पिरुस्वल आंदुर.
9 जिव्रसुन अनि कानेत साटि आड्वलिक काकड पिलन,
वोर कानेता इंता जाम किय्वल आंदुर.
10 वोर ताकद वालेक कोडना बलमुन पोरो आदर आसि आनंद येतोर.
अनि सिपायिरा बलमुन पोरो गिर आदर आसि कुसि आयोर.
11 बति बगवंतल तंवा बाव-बक्तिता वेरेते पिस्वलिर
अनि तंवा मारियो अद पेर्मतगा बरोसा इर्वलिर हिंदल आनंद येतंतोर.
12 येरुसलेम्नुर लोकुर्निट! येहोवा देवन डगुर-पान सीम्ट.
सियोंतुर लोकुर्निट! मी बगवंतन डगुर-पान सीम्ट.
13 वोर मी नगुडङ पाटक्नङ दर्वजन मज्बुत कीतोर.
मी नगुडुन रोपो मंवलिरकुन बगवंतल आसिर्वाद सीतोर.
14 मी देस्नङ सिवन रोपो सांति इर्वल वोरे आंदुर.
मी साटि चोकोट्ना गोह्क्ना पंटतुन बर्पुर सिय्वल वोरे आंदुर.
15 दर्तुरितुन आगे सिय्वल वोरे आंदुर.
वोना वचन बगा येवनयो अगा सप्ने येवंता.
16 गोरे बूरत दात्ना बर्पितुन वोरे अरुसंतोर.
नीरदुन दात्ना मचुन वोरे पग्रि कींतोर.
17 हाबडल गार-बंडङ अरुस्वल वोरे आंदुर.
वोर पुटुस्वल पीनितुन बोर सोसि किया परनुर?
18 वोर वडिदुन आगे सीतेके,
अव सम्दो गार-बंडङ उग्रे मासि पोङंतङ.
19 वोर तंवा वचंतुन याकोब्ना संतांदुन वेह्चि तोह्तोर.
अनि तंवङ नियमकुन अनि कानुनकुन इज्रयेल पर्जतुन वेह्तोर.
20 दुस्रो बदे जातितुरकुन वोर इहिन किय्मकि.
वोनङ कानुनकुन बारेते दुस्रुरकुन टावा सेले.
येहोवा देवन डगुर-पान सीम्ट.