वोरोरे सत्ते बगवंतल मंतोर
115
1 येहोवा देवा, नीवा मारियो अद पेर्मतुन अनि बरोसतुन पिय्सि, नीवा पोरोडुने डगुर-पान वायना.
अद माकुन असले वाय्वा. सिरिप नीकुने वायना.
2 “वूरोर बगवंतल बगा मंतोर?”
इन्जेर सम्दो जातिनुर बारि इंदना?
3 बति मा बगवंतल स्वर्ग्नगा मंतोर.
तनकुन पसंद वाता अद किय्वल आंदुर.
4 वूरङ पेन्क्नङ मूर्तिङ, सोने-चांदितङ आंदुङ.
अव माय्नलिरा केय्दे निव्डे मातङ आंदुङ.
5 अवेन तोड्डिङ मंतङ बति, अव वड्का परोङ.
अवेन कड्क मंतङ बति, अव सूडा परोङ.
6 अवेन केव्क मंतङ बति, अव केन्जा परोङ.
अवेन मोसोक मंतङ बति, अव वास येता परोङ.
7 अवेन केय्क मंतङ बति, इटा परोङ.
काल्क मंतङ बति, ताका परोङ.
अनि अवेन गुड्न्गङ मंतङ बति, आवज किया परोङ.
8 अवेन निव्डि किय्वलिर अनि अवेनगा बरोसा इर्वलिर
सम्दिर गिर आक्रित अवेन दाते बततुने कामि सिय्वक आंतेर.+
9 इज्रयेल लोकुर्निट! येहोवा देवनगा बरोसा इरट.
वोरे मीकुन मदत किय्वल अनि काबाड्वल डाल आंदुर.
10 अहरोंता कांदांतुर्निट! येहोवा देवनगा बरोसा इरट.
वोरे मीकुन मदत किय्वल अनि काबाड्वल डाल आंदुर.
11 येहोवा देवना बाव-बक्तिता वेरेते पिस्वलिर्निट! वोन्गा बरोसा इरट.
वोरे मीकुन मदत किय्वल अनि काबाड्वल डाल आंदुर.
12 येहोवा देवल माकुन मरुङ्मकि.
वोर माकुन आसिर्वाद सींतोर.
वोर इज्रयेल्ता कांदांतुरकुन आसिर्वाद सींतोर.
वोर अहरोंता कांदांतुरकुन आसिर्वाद सींतोर.
13 येहोवा देवना बाव-बक्तिता वेरेते पिस्वलिर
चुडुक, डगुक सम्दिरकुन वोर आसिर्वाद सींतोर.+
14 येहोवा देवल मीकुन अनि मी मरि-मियडा जनोबतुन बडि कियिर!
15 आगस-दर्तुरितुन गडि कीतोर वोर येहोवा देवल,
मीकुन आसिर्वाद सियिर!
16 आगस्क येहोवा देवना केय्देन मंतङ.
बति दर्तुरितुन नरिमन्कन सीतोर.
17 सासि वीच्नगा दब मंवलिर बोरे गिर,
येहोवा देवन डगुर-पान सियुर.
18 बति ममोट इङेडल ते बस्केट येहोवा देवने डगुर-पान सींतोम.
मिरट गिर येहोवा देवन डगुर-पान सीम्ट.