मरंतल पिस्तोर मायनल बगवंतन डगुर-पान सिय्वल
116
1 येहोवा देवन ना पोरो दया तोहा इन्जेर कीतङ पार्तनन केन्ज्तोर. अदेन साटि वोना बाव-बक्ति नना पेर्मते कीसेर मंतोन.
2 वोर नावा दुक्सतुन केवि सीसि केन्ज्ता काड्कि,
नना पिसि मनल वेरि, वोन विनंति कीसेर मंदंतोन.
3 परन तेंड्वलिक पासङ ना सिर्मुट आव्रि कीसि मंतङ.
साना लोकम्नङ दुक्सङ नाकुन पिय्सि मंतङ.
तक्लिब अनि दुक्सतुन नना बोगे मातोन.
4 अस्के, “येहोवा देवा! दया कीसि ना परंतुन बचि कीम” इन्जेर,
वोना पोरोल मुट्सि, केय्तोन.
5 येहोवा देवल दया वाले अनि नियत्ने ताक्वल आंदुर.
मावोर बगवंतल किवुल गुंते निन्चि मंवल आंदुर.
6 येहोवा देवल सादरन माय्नलिरकुन काबाड्वल आंदुर.
नना बोनय मदत सेल्वा कुसुम्ने आसि मनेके वोर नाकुन बचि कीतोर.
7 ये ना परंति! येहोवा देवल नी साटि चोकोट जर्गुसीतोर.
अदेन साटि ना परंति तकपिका आय्मा.
8 बारितेके बगवंता, ना परंतुन मरंतल तपुसीति.
ना कड्कनल काडेर तुह्वक आपु सीति.
नावङ दापिङ गसुर्क्वक पिय्सि ताकुस्ति.
9 इद दुनियतगा पिसि मंवलिर नड्डुम,
येहोवा देवना सेवा कीसेर मंदंतोन.
10 नना बेय दुक्सते नासेडम आता गट्कते गिर
नना निह्गा नमकम इर्तोन.+
11 ना पोरो वेरे जोमे माता पेजे,
“माय्नलिर सम्दिर गिर पकट्क आंदिर” इन्जेर इन्जि मत्तोन.
12 येहोवा देवल नाकुन मदत कीता सम्दोतुन बद्लि,
नना वोन बतल सिया पर्का?
13 नाकुन बचि कीता कार्यतुन पिय्सि,
सिरिप वोर येहोवा देवना पोरोडे पार्तना कींतोन.
14 येहोवा देवन नना काल-कर्तङ अव मोकुलकुन कंडि कींतोन.
वोना पर्जा सम्दिर मुने अव सम्दोन कंडि कींतोन.
15 तंवुर बक्तलिरा मरन आतेके,
येहोवा देवल बेय दुक्सा येतंतोर.*
16 येहोवा देवा, नना करेलेन नीवोर सेव्कना आंदुन.
हो, नावा अवल नीवा सेवा कीतपिनय नना गिर कीसेर मंतोन.
नाकुन आव्रि कीसि मंवलिक मरन इंवलिक सकलिन नमुसि वाड्ति.
17 येहोवा देवना पोरोल मुट्सि पार्तना कींतोन.
नना नीकुन दनेवाद वेह्चेर बलिदान सींतोन.
18-19 येहोवा देवन नना काल-कर्तङ अव मोकुलकुन वोना मंदिर्ता आव्रत रोपो कंडि कींतोन.
येरुसलेम्नुर पर्जत नड्डुम अव सम्दोन कंडि कींतोन.
येहोवा देवन डगुर-पान सीम्ट.