चोकोट्नोर माय्नना आनंद
112
1 येहोवा देवन डगुर-पान सीम्ट. येहोवा देवनङ आगेन पिय्सि ताक्वलिर
अनि वोना बाव-बक्तिता वेरेते पिस्वलिर आसिर्वाद येत्वलिर आंतेर.
2 वूरा कांदांतुर बोमितगा मज्बुत वालिर आंतेर.
अनि वूर नियत्नुरा कांदांतुर आसिर्वाद येतंतेर.
3 वूरङ कुटुंबनगा दन-दव्लत मंदंता.
वूरा नियत बस्केट निल्सि मंदंता.
4 नियत्ने मंवलिर साटि बगवंतल, सिकटितगा वेड्चितुन पुटुसंतोर.
वूर पेर्मता-दयते, किवुल वासेर, नियत्ने ताकंतेर.
5 दया तोह्वलिर अनि पोकोट बाकि सिय्वलिर आसिर्वाद येत्वलिर आंतेर.
तस्वा किय्वडगा वूरय गोस्टि करल आंता.
6 आतुर माय्नलिरकुन बस्केन बदे हालि किया परो.
नियत्नुर बस्केट हेतु मंदंतेर.
7 वूर करब्नङ गोस्टिन वेरियुर.
बारितेके येहोवा देवनगा बरोसा इर्सि नमकम्ने मंदंतेर.
8 वूरा दिल येहोवन पोरो आदर आततुन हिंदल वूरकुन वेरे सेले.
तम्वा आसा तीर जर्गनल वेरि तम्वुर पगा-दारकुन मेयंतेर.
9 पह्जे मत्तुरकुन बर्पुर वोर सींतोर.
वोनङ दर्मतङ काम्क बस्केट निल्सि मंदंतङ.
वूरा डगुर-पान बस्केट गिर बडे मासेर मंदंता.+
10 करेबलिर अद सूड्सि, रंदि कीसेर मंदंतेर.
वूर पल्क कोर्क्सेर मूरे मासि दांतेर.
वूर करेबलिरङ आसङ बततुने कामि सिय्वक आंतङ.