बगवंतन डगुर-पान सिय्वल कीर्तन
111
1 येहोवा देवन डगुर-पान सीम्ट. नियत्नुर मीरे माय्वडगा अनि नीवुर बक्तलिर मुने,
नावा बर्पुर दिल्तल येहोवा देवन डगुर-पान सींतोन.
2 येहोवा बगवंतनङ काम्क बेय डगुक आंदुङ.
अवेन करि कीका इंवलिर अवेन बारेते सम्जे माय्ले कोसिद कींतेर.
3 वोनङ काम्क मय्मतङ अनि कीर्ति वालेक आंदुङ.
वोना नियत बस्केट निल्सि मंदंता.
4 वोर माय्नलिर हेतु इरनल बेय डगुक कार्यङ कीतोर.
वोर येहोवा देवल पेर्मता-दया अनि किवुल वाले आंदुर.
5 तंवा बाव-बक्तिता वेरेते ताक्वलिरकुन काने सींतोर.
वोर तना इर्ता नियमुन बस्केट हेतु इरंतोर.
6 वोर तंवा जाय्जत आय्वल पर्जतुन,
दुस्रोक जातिना बोमितुन हव्लि कीतोर.
इद तीर्दे तंवा मय्मता सक्तितुन वूरकुन वेह्चि तोह्तोर.
7 वोनङ काम्क सतेम्नङ अनि नायम्नङ आंदुङ.
वोनङ नियम्क सम्दो बरोसतङ आंदुङ.
8 अव बस्केन मारिवलिक आयोङ.
सतेम्ने अनि नियत्ने वूर सम्दिर ताका लागर.
9 वोर तंवा पर्जतुन मोक्डो सुटि किय्वल आंदुर.
तंवा नियम बस्केट मंदना इन्जेर निर्नय कीतोर.
वोना पोरोल पवित्रा अनि बाव-बक्तिता वेरे पुटुसनल मंता.
10 येहोवा बगवंतना बाव-बक्तिता वेरेये गियंतुन बुनदि आसि निलंता.
वोनङ नियमकुन पिय्सि ताक्वलिर सम्दिर चोकोट्ना बुदि-गियन वालिर आंदिर.+
वोन बस्केट गिर डगुर-पान वायना.