पगा-दार्कनल बचि कीम इन्जेर किय्वल पार्तना
दाविद्ना कीर्तन
108
1 ये बगवंता, नी पोरो बरोसा इर्सि, नावा दिल गटि-दीर्यते मंता. अदेन साटि नना नीकुन कीर्तन वार्सेर डगुर-पान अनि मान सींतोन.
2 ये ना परंति तेदा! कर्नाट अनि चोंड्कत्निट तयर आम्ट!
नना सक्रेन तेच्चि कीर्तन वारंतोन.
3-4 नीवा मारियो अद पेर्मा आगसनल गिर डगुर मंता.
नीवा सतेम हाबडङ टेपङ वेरि लागंता.
अदेन लासि येहोवा देवा! दुस्रोक जातिनुर नड्डुम नीकुन दनेवाद वेह्चेर डगुर-पान सींतोन.
अनि पर्जत नड्डुम नीकुन कीर्ति वानल कींतोन.
5 बगवंता, पोरो हाबडगा गिर निमे डगुर-पान वालेना आंदुन इन्जेर तोहा.
बगवंता, नीवा मय्मा पूरो दर्तुरित पोरो तोहा.+
6 निमे पेर्मा किय्वल पर्जतुन मुक्ति पुटनल,
माकुन जवब सीसि नीवा तिना केय्दे बचि कीम.+
7 तंवा पवित्रा जागतल बगवंतल गोस्टि सीतोर.
नना सेकेमुन आनंद्ने तूसि सींतोन.
अनि सुकोत लोदितुन नना पाकि कीसि सींतोन.
8 गिलादु अनि मनसे येरियनुर नावुरे आंदिर.
येप्रायिम येरियतुर नावा तलदगा केर्वल कचि टाटत मोडितुर आंदिर.
यूदना कांदांतुर राजना आय्वल नना पिय्वल डुड्डु आंदिर.*
9 मोयबियुल्क नना काल्क नोर्वल परतुन मोडि आंतेर.
येदोमियुल्क नावङ चेपुल्क पिय्वलिर दासिर आंतेर.
पिलिस्तियुलकुन नना हारि कीता काड्कि हंकत कींतोन.
10 सिर्मुट बंदोबस्त गोडा मंवल नगुडगा नाकुन बोर पिय्सि वोंतोर?
येदोमुन सङा लडेय कीसि मेय्ले नाकुन बोर ताकुसनुर?
11 बगवंता! निमे माकुन वोप्वक्ने, पाकि कीसि वाड्ति कि?
बगवंता, लडेय किय्ले मा सिपायिर सङा निमे वासेर सेल्वि कि?
12 माय्नलिरा मदत माकुन बततुने कामि सियो.
पगा-दारकुन मेय्ले माकुन नीवय मदत पह्जे.
13 बगवंतना मदतुन हिंदल ममोट मेयंतोम.
पगा-दारकुन मा कालकुन बूड दाबि किय्वल वोरे आंदुर.+