वोरोर दुक्सते मंवना पिरदि
पाटा वारुस्वन साटि: दाविद्ना कीर्तन
109
1 ये बगवंता! नीकुने नना डगुर-पान सीसेर मंतोन. नाकुन पटि किय्वक्ने दब मन्मा.
2 नाकुन नुक्सन कियना इन्जि करेबलिर तम्वा कपेटल तोड्डि चह्चि,
ना पोरो लबड कसुक वाट्सेर मंतेर.
3 वूर नाकुन गेर-पासि बेय सोङ्ने वड्क्सेर मंतेर.
बतय कारन सेल्वक्नेने वूर ना सङा लडेय कीसेर मंतेर.
4 नना तोह्ता पेर्मतुन बद्लि, वूर ना पोरो कसुक वाड्तेर.
बति नना वूर साटि पार्तना कीसेर मंतोन.
5 नना कीता चोकोटुन बद्लि, वूर नाकुन वायुट कीसेर मंतेर.
नना तोह्ता पेर्मतुन बद्लि, वूर नाकुन पसंद कीसेर सेलुर.
6 वोन पोरो करेबल अदिकारिन नेमि कीम.
कसुक वाट्सेर मंवल वोना तिना बग्ला निलिर.
7 वोना तस्वा जर्ग्नेके, वोर गल्ति कीतोर इन्जेर निरुपन आयि.
अस्के, वोना पार्तना पाप्ना आंद इंवल लेकते वांता.
8 वोर पिस्वलिक दिवोस्क कमि आसि सोनिङ.
अनि वोना सेवता नव्करि उंडे वोरोर आगुटि कियिर.+
9 वोनुर मरि-मियड पोसटिर आयिर.
वोना बाय्को रांडे वेय्लो आयि.
10 वोनुर मरि-मियड बिच्चे गांडलिर आसि वेलिसेर मंनिर.
पाड आतङ अव तम्वङ रोह्कनल लङ पिसेर मंनिर.
11 वोना आस्ति सम्दोतुन बाकि वालिर आगुटि कियिर.
वोना काया-कस्टम्ना कमयतुन दुस्रुर लूटि कियिर.
12 वोन पोरो दया तोह्वलिर बोरे सेल्वक आयिर.
वोनुर पोसटि मरि-मियडुन पोरो किवुल वाय्वलिर बोरे सेल्वक आयिर.
13 वोना संतान मूरे मासि सोंनि.
वाय्वल पिडितगा वूरा पोरोल नासे मासि सोंनि.
14 वोनुर तोत्तुर कीता पापुन येहोवा देवल हेतु इरिर.
वोना अवनङ पाप्क मापि किय्वक्ने बातङ अह्ने मनिङ.
15 येहोवा देवल बोमितगा वूरा हेतु मंवक्ने पासि वाटिर.
वूरङ पाप्क सम्दो येहोवा देवन मुने बस्केट दिसेर मनिङ.
16 बारितेके वोर दया तोहना इंवल गोस्टितुन मरुङ्सि,
गरिबकुन, जुरत्ने मंवलिरकुन अनि दिल टूटे मासि मंवलिरकुन
दुक्सङ सीसि, जक्ले सूड्तोर.
17 सापेना सिय्वल वोन वेले पसंद मत्ता काड्कि,
अद वोन पोरो वाता.
आसिर्वाद सिय्वल वोन जरा गिर पसंद सेल्वा काड्कि,
अद वोन्गटल लङ सोडिता.
18 सापेनतुन कप्डित मोडि पोंड्सि मंतोर.
अद सापेना येतुन मोडि वोना पेटितगा रेय्सि सोंनि.
अनि मेंदोडुन सोक्वल नियदुन मोडि बोकङ वेरि अद जीरे मायि.
19 तना बस्केट मुच्वल दुपटित मोडि,
बस्केट केर्सि मंवल नडिदा पटितुन मोडि,
अद सापेना वोन सुटि किय्वक मनि.
20 ना पगा-दारकुन, ना परंतुन उल्टा वड्क्वलिरकुन,
येहोवा देवल इद तीर्दे बद्लि येतंतोर.
21 बति येहोवा, देवा मा पर्बु!
नीवा पोरोडुन हिंदल नाकुन मदत कीम.
नीवा मारियो अद पेर्मा बेय चोकोट्ना आंद.
अदेन साटि पगा-दार्कनल नाकुन सुटि कियुसा.
22 नना गरिब आसि अनि जुरत्ने मंतोन.
नावा दिल टूटे मासि मंता.
23 नना पोद्रेक्ना दड्मित मोडि दिस्वक आतोन.
जाडि-कोडन जडि कीतपिनय नाकुन जडि कीसेर मंतेर.
24 उपस मंवडुन हिंदल नावङ टोङ्रन ताकद सेल्वक आतङ.
ना मेंदोल रेय्सि बोकतगा बोका आता.
25 वूर चेडि कीसेर मंवल उंदि वस्तुता आतोन.
वूर नाकुन सूड्सेर तलङ हालि कींतेर.+
26 येहोवा ना बगवंता! नाकुन मदत कीम.
नीवा मारियो अद पेर्मतुन हिंदल नाकुन बचि कीम.
27 अस्के नाकुन पुड्ता मदत पूरो,
येहोवा देवनल वाता इन्जेर वूर करि कींतेर.
28 वूर नाकुन सापेना सीसेर मंतेर.
बति निमे नाकुन आसिर्वाद सींति.
वूर लह्कि वर्सि मुच्लि अर्तेके वूरा हिजत दांता.
बति नी सेव्कल आय्वल नना कुसिते मंदंतोन.
29 सम्दिर मुने नावुर पगा-दार्क्ना हिजत सोंनि.
वूर पाङुक पोंड्तपिनय अद हिजतुन पोंड्सि मंनिर.
30 ना तोड्दे येहोवा देवन दनेवाद वेह्चेर वेले डगुर-पान सींतोन.
वेलेटिर लोकुर नड्डुम वोन डगुर-पान सींतोन.
31 गरिबुन पोरो कसुक वाट्सि पन्च्नगा निपुस्वलिरा केय्दल बचि किय्ले,
येहोवा बगवंतल वोना तिना बाज निलंतोर.