5वा बागम
(कीर्तन्क 107-150)
बगवंतना चोकोट-पांदुन पिय्सि डगुर-पान सिय्वल
107
1 येहोवा देवल वेले चोकोट्नोर आंदुर. वोन दनेवाद वेह्चेर डगुर-पान सीम्ट.
वोना मारियो अद पेर्मा बस्केट मंदंता.+
2 येहोवा देवना केय्दे बचे मातुर वूर अद तीर्दे वेहिर.
वोना केय्दे पगा-दार्क्ना अदिकार्दल सुटे मातुर वूर,
3 इतेके, सिडयिङ, पोरयिङ, काल्वडा अनि तलवडा बाज मंवलिक
वेले देस्कनल मीरि कियुस्तोर वूर सम्दिर अद तीर्दे वेहिर.
4 वूर्गटल कहितुर बोडि गुटनगा तिरिसेर मत्तेर.
वूर मंदन साटि उंदि गिर नगुर वूरकुन पुट्मकि.
5 करुतुन हिंदल अनि येर वट्क्ततुन हिंदल,
वूरा परन पूरो कुसुम्ने आता.
6 वूर आपतितगा मनेके येहोवा देवन जोर्ते विनंति कीतेर.
ते वोर वूरा आपतितल वूरकुन सुटि कियुस्तोर.
7 वूर पिसनल मंवल नगुडे येवनल वेरि,
वूरकुन चोकोट्ना सरिय बरोबर ताकुस्तोर.
8 येहोवा देवना मारियो अद पेर्मतुन पिय्सि,
माय्नलिर साटि कीतङ मय्मतङ कार्यन पिय्सि,
येहोवा देवन दनेवाद वेह्चेर डगुर-पान सियिर.
9 बहन इतेके येर वट्क्सि मंवन येर सींतोर.
अनि करु सासि मंवन चोकोट्ना काने सींतोर.
10-11 बगवंतना आगेतुन मर्ला बड्ता काड्कि,
सर्वा सक्तिवंतना गोस्टितुन माने माय्वा काड्कि,
कहितुर पर्जा दुक्सते, लोकोंड्नङ सकलिने कोंडे मासि मत्तेर.
कह्चर सिकटितगा अनि परन सोंवल जागतगा अर्सि मत्तेर.
12 अदेन साटि काया-कस्टमुन हिंदल बगवंतल वूरा दिलदुन कुसुम्ने कीतोर.
अदेन हिंदल वूर कोदा पासि बूड अर्तेर.
वूरकुन मदत किय्वल बोरे सेल्वक आसि मत्तेर.
13 वूर आपतितगा मनेके येहोवा देवन जोर्ते विनंति कीतेर.
वोर वूरा आपतितल वूरकुन बचि कीतोर.
14 वूरकुन दोह्चि मंवलिक लोकोंड्नङ सकलिन नमुस्तोर.
अद कह्चर सिकटितगा अनि परन सोंवल जागतगा मंवलिरकुन बह्रि तत्तोर.
15 येहोवा देवना मारियो अद पेर्मतुन पिय्सि,
माय्नलिर साटि वोर कीतङ मय्मतङ कार्यन पिय्सि,
येहोवा देवन दनेवाद वेह्चेर डगुर-पान सियिर.
16 बहन इतेके जेल्क्नङ पितुडङ पाटकुन काच-कूच कीतोर.
अनि अवेनगा मंवलिक कचिता अड्डम मंवलिक पटिन टुक्डेङ कीसि वाड्तोर.
17 कहितुर बगवंतनङ कानुनकुन तप्सि मर्ला बड्वलिर आतेर.
अनि तम्वङ कसुकुन पिय्सि तम्वा पोरो दुक्सा तत्तेर.
18 कानेतङ चीज्क सम्दो गिर वूरकुन तिंदा वस्वक आतङ.
अनि वूर मरंतङ पाटकुन करुम सोन्जेर मत्तेर.
19 वूर आपतितगा मनेके येहोवा देवन जोर्ते विनंति कीतेर.
वोर वूरा आपतितल वूरकुन बचि कीतोर.
20 वोर तंवा वचंतुन रोह्चि वूरकुन चोकोट कीतोर.
वूर सोंवल मरंता पाटकनल वूरकुन काबाड्तोर.
21 येहोवा देवना मारियो अद पेर्मतुन पिय्सि,
माय्नलिर साटि वोर कीतङ मय्मतङ कार्यन पिय्सि,
येहोवा देवन दनेवाद वेह्चेर डगुर-पान सियिर.
22 वूर दनेवाद वेह्चेर बलिदान्क सियिर.
बेय कुसि-आनंद्ने वोनङ कार्यन पचर कियिर.
23 वूर्गटल कहितुर रूकङ उच्चि सम्दुरतगा यात्रा किय्वलिर,
बेय कोल येतल सोन्जेर बेपरि किय्वलिर आसि मत्तेर.
24 वूर येहोवा देवनङ कार्यन
इतेके सम्दुरतगा वोर कीतङ मय्मतङ कार्यन सूड्तेर.
25 वोर आगे सीनेके सम्दुरतगा तुपान तेत्ता.
अदेने सम्दुर्तङ हेल्वङ उंडे इचुर बडे मातङ.
26 ते अवेने वूर पोरो आगस्नेके ताच्चेर अनि अड्ग्नगा रेय्सेर मत्तेर.
अद गट्कते वूर जिगि सेल्वक आसि वूरा परन आगस परिता.
27 वूर जिङ्डे मातुर दात मुने-पेजे डोले मासेर,
हिके-हके हाले मासेर, बतय सोन्च वाय्वक आसि मत्तेर.
28 वूर आपतितगा मनेके येहोवा देवन जोर्ते विनंति कीतेर.
वोर वूरा आपतितल वूरकुन बह्रि वाड्तोर.
29 वोर तुपांदुन आपुसीता पेजे,
तानङ हेल्वङ सिम-सम दबे मातङ.
30 अव सिम-सम आततुन हिंदल वूर आनंद येत्तेर.
वूर कोर्ता अद रूकङ आग्वल जागते वूरकुन येवुस्तोर.
31 येहोवा देवना मारियो अद पेर्मतुन पिय्सि,
माय्नलिर साटि वोर कीतङ मय्मतङ कार्यन पिय्सि,
येहोवा देवन दनेवाद वेह्चेर डगुर-पान सियिर.
32 वोनुर बक्तलिरा गुब्डत नड्डुम वूर डगुर-पान सियिर.
पेदोल्क्ना समाज्नगा वोन वूर कीर्ति सियिर.
33-34 अद देस्नगा मंवलिरा करब-पांदुन पिय्सि,
अगटङ लव्डिन वतुसि उस्के बोमित मोडि कीतोर.
येतङ जलन वत्ता बोमितुन मोडि कीतोर.
चोकोट्ना बोमितुन बर्कड बोमित मोडि मार्युस्तोर.
35 बति तंवा पर्जत साटि वोर बोडि गुटन येता डोहोत मोडि,
अनि वत्ता बोमितुन येता जलत मोडि मार्युस्तोर.
36-37 वोर करुदे मंवलिरकुन अद देस्नगा मंले ताकुस्तोर.
अगा वूर मंदन साटि चहर्क दोह्तेर.
अनि अगा वूर बेय चोकोट वहुक कीतेर.
आङुर्क्नङ वाडिङ उर्स्तेर.
अवेन हिंदल वेले पंटा पंडुस्तेर.
38 वोर वूरकुन आसिर्वाद सीतोर.
वूरा कांदान्क्नुरा जनोबा वेले बडे माता.
वूरा डोर-जंवर गिर वेले बडे माता.
39 वूर आपतितुन हिंदल, कस्टमुन हिंदल अनि दुक्सतुन हिंदल,
वूरा कांदान्क्नुरा जनोबा कमि आसि मत्ता.
40 बति मीकुन उल्टा तेद्वलिर राजलिर पोरो बगवंतल पगा येत्तोर.+
अनि सरि सेल्वक मंवलिक बोडि गुटनगा वूरकुन वेलिसेर मनल कीतोर.
41 बति जुरत अर्सि मंवलिरकुन बगवंतल आद्वा वासि काबाड्तोर.
वूरङ कांदान्क्नुर गोरेना मंदतुन मोडि बडे मातेर.
42 नियत्ने ताक्वलिर इद सूड्सि आनंद येतिर.
पसि किय्वलिर सम्दिर तोड्डिङ मुह्चि दब मंनिर.
43 गियन वालिर इव गोस्टिन बारेते सोन्च कीसेर,
मावुर साटि येहोवा देवल तोह्ता मारियो अद पेर्मतुन करि कींतेर.