तंवा पर्जतुन चोकोट सूड्वल बगवंतल
106
1 येहोवा देवल वेले चोकोट्नोर आंदुर.+ वोना मारियो अद पेर्मा बस्केट निल्सि मंदंता.
अदेन साटि वोर येहोवन दनेवाद वेह्चेर डगुर-पान सीम्ट!
2 येहोवा देवनङ पेर्सङ कार्यन बोर पोडि कीसि वेहा परनुर?
अनि वोना कीर्ति सम्दोतुन बोर पचर किया परनुर?
3 नायम्ने अनि बस्केट नियतुन पिय्सि ताक्वलिर आसिर्वाद येत्वलिर आंतेर.
4 येहोवा देवा, निमे नी पर्जत पोरो दया तोह्नेके नाकुन हेतु कीम.
वूरकुन बचि कीनेके नाकुन गिर बचि कीम.
5 निमे नेमि कीति वूरकुन चोकोट जर्ग्वल नाकुन सूडा सीम.
नीवा जाय्जत आय्वल पर्जत सङा नाकुन आनंद्ने मंदा सीम.
नीवुर लोकुर सङा नी बारेते डगुक गोस्टिङ वेहा सीम.
6 मावुर तोत्तुर मोडि ममोट गिर पाप कीतोम.
कसुकुन पिय्सि ममोट तप कीतुर वूर आतोम.
7 ईजिप्ट्नगा वोर बगवंतल कीतङ अव मय्मतङ कार्यन मा तोत्तुर अर्तम किय्मकि.
वोना मारियो अद पेर्मतुन वूर हेतु इर्मकि.
बति रगल सम्दुरतगा सर्वा सक्तिवालेन वूर मर्ला बड्तेर.+
8 तेर बति, तंवा महा सक्तितुन तोह्ले
तंवा पोरोडुन हिंदल वूरकुन बचि कीतोर.
9 बगवंतल रगल सम्दुरतुन दम्कि सीनेके अद आटे माता.
वत्ता बोमितगा ताक्तपिनय वूरकुन अद सम्दुर्ता अड्गनल ताकुस्तोर.+
10 अद तीर्दे वूरुर पगा-दार्क्ना केय्दल वूरकुन बचि कीतोर.
दुस्मन-दार्क्ना ताकदनल वूरकुन सुटि कियुस्तोर.
11 येर वूरुर पगा-दारकुन मुडुसि वाड्ता.
वूर्गटल वोरोर गिर तपुसिय्मकि.
12 अस्के मा तोत्तुर वोनङ गोस्टिङ नम्तेर.
अनि वोन डगुर-पान सीसेर वार्तेर.+
13 बति वूर सप्नेने वोर कीतङ कार्यन मरुङ्तेर.
वोना सोन्च-विचरतुन साटि वूर सूड्सेर मन्मकि.
14 बोडि गुटनगा वूरङ आसङ बडे मातङ.
अद उस्के बोमितगा बगवंतना हवड सूड्तेर.+
15 वूर आसा कीततुन वोर वूरकुन सीतोर.
बति वूरङ परनकुन नुक्सन किय्वल बेमरि रोह्तोर.
16 वूर तम्वा डेरना टिकनतगा मोसेन पोरो अनि
येहोवनोर पवित्रा पेर्सोर कटोडल अहरोंतुन पोरो कुटा कुटा आतेर.+
17 अस्के बोमि तोड्डि सरिसि, दातन इंवन मिङ्ता.
अबिराम अनि वोन बरोबर मर्ला बड्वल गेंडेतुन मिन्जुस्ता.
18 वूर करेबलिरा गुब्डत नड्डुम पोरोडल तड्मि अर्ता.
अद तड्मितङ जार्क वूरकुन डुंडुसि वाड्तङ.+
19 सिनायि गुटतगा* कुरता पुत्ला सोनेते निव्डि कियुस्तेर.
अनि वूर अद पुत्लता पूजा-पतेरा कीतेर.+
20 तम्वोर मय्मा वाले बगवंतन
जाडि मेय्वल उंदि कोंदता रूप सीतेर.
21 ईजिप्ट्नगा बेय डगुक कार्यङ कीसि,
तमकुन बचि कीतोर वोर बगवंतन वूर मरुङ्तेर.
22 हामुना देस्नगा मय्मतङ कार्यङ कीतोर वोन
अनि रगल सम्दुरतगा बाव-बक्तिता वेरे पुटुसनल
चमत्कार्क कीतोर वोन मरुङ्तेर.
23 अदेन साटि बगवंतल, “नना वूरकुन मूरि कींतोन” इन्जेर इत्तोर.
बति वोना सोङुन आरुसि, वूरकुन मूरि किय्वडल आपुस्ले
बगवंतनोर सेव्कल मोसे, वोना चर्नते निल्तोर.
24 अस्के वूर पर्जा बेय सोबता कनान देस्नगा सोंले वोप्मकि.
वोर बगवंतना वाग्दंतुन पोरो नमकम इर्मकि.+
25 येहोवा बगवंतना गोस्टि केन्ज्वक्ने,
वूर तम्वङ डेरनगा गोल्ग्तेर.
26 अदेन साटि बगवंतल,
‘वूरा जीवा बोडि गुटनगा येतंतोन्’ इन्जेर वोट वाट्तोर.
27 अनि वूरा संतांदुरकुन दुस्रोक जातिनुर नड्डुम
पग्रि कीसि जीवा येतन साटि वोट वाट्तोर.+
28 अस्के वूर पेयोर्ता बाल पेंदा पूजा पतेरा कीसि,
सानलिर साटि बलिदान सीतङ अव बक्रनङ सविङ तित्तेर.+
29 वूर तम्वङ कामकुन हिंदल बगवंतन सोङ वायुस्तेर.
ते वूर पोरो बेमरिता गंडम वायुस्तोर.
30 बति पिनेहस तेच्चि गल्ति कीतुरकुन जक्तोर.
अस्के अद गंडमुन बगवंतल आपुस्तोर.
31 पिनेहस कीता अद काम बगवंतना नदुडे नियत्ना आता काड्कि,
अदेन बारेते पिडिनङ पिडिङ हेतु इर्वल जर्गंता.
32 मेरिबा इंवल येतङ जलनगा बगवंतन सोङ वायुस्तेर.
अदेन साटि वूर हिंदल मोसेन पोरो सिक्सा वाता.+
33 बहन इत्तेके वूर बगवंतना आत्मतुन मर्ला बड्ता काड्कि,
वोर मोसे तंवा तोड्दे येड्डिन मोडि वड्क्तोर.
34 येहोवा देवल वूरकुन आगे सीतपिनय,
वूर दुस्रोक जातिनुरकुन मूरि किय्मकि.+
35 बति वूर दुस्रोक जातिनुर सङा मीरे मासि,
वूर किय्वलिक काम्क वीर इज्रयेल पर्जा गिर करितेर.
36 वूरङ मूर्तिन पूजा-पतेरा कीतेर.
अव वूरकुन पासङ आसि निल्तङ.
37 वूर इज्रयेल पर्जा तम्वुर मरि-मियडा जीवा येच्चि,
बूतकुन साटि वूरकुन बलिदान सीतेर.+
38 बे-कसुर वालिरा इतेके तम्वुर मरि-मियडा नेतुर तुह्तेर.
अद कनान देस्नुरङ मूर्तिन साटि वूरा बलिदान सीतेर.
अद नेतुडुन हिंदल अद देस बे-सुदुड आता.+
39 तम्वङ कामकुन हिंदल वूर बे-सुदुड आतेर.
तम्वा पिस्वल तरिका पीर कीतुरा लेकते वाता.
40 अस्के येहोवा देवल तंवा पर्जत पोरो सोङुन वातोर.
तंवा जाय्जत आय्वल पर्जा इतेके पसंद सेल्वक आता.+
41 ते वूरकुन दुस्रोक जातिनुरा केय्दे हव्लि कीतोर.
वूरुर पगा-दार्क वूर पोरो राज ताकुसीतेर.
42 वूरुर पगा-दार्क वूरकुन दुक्सा सीतेर.
वूर पगा-दार्क्ना केयदुन बूड, दाबे माय्वल जर्ग्ता.
43 वेले जोकङ आतङ गट्ननल वूरकुन तपुस्तोर.
तेर बति वूर तम्वङ पिलनकुन पिय्सि मर्ला बड्सेर वातेर.
तम्वा पाप्ने तम्वा पोरो नासेडम तत्तेर.
44 तेर बति वूर आड्सेर कीता विनंतितुन केन्चि,
वूरकुन वाता तक्लिबुन वोर सूड्तोर.
45 वूर बारेते सोन्च कीसि तना वोप्ता नियमुन हेतु कीतोर.
तंवा मारियो अद पेर्मतुन पिय्सि, वूर पोरो वोन किवुल वाता.
46 वूरकुन दासि-पांदे इर्ले पिय्सि वोतुरकुन,
वीर पोरो किवुल वानल कीतोर.
47 मा येहोवा देवा माकुन बचि कीम.
ममोट नीवा पवित्रा पोरोडुन पिय्सि नीकुन दनेवाद वेहनल,
नीकुन डगुर-पान सीसेर ममोट आनंद येतनल,
माकुन दुस्रोक जातिनुर नड्डुमनल मीरि कीम.+
48 इज्रयेल पर्जतोर येहोवा बगवंतन पिडिनङ-पिडिङ डगुर-पान वायि.
पर्जा सम्दिर गिर आमेन* इंनिर.
येहोवा देवन डगुर-पान सीम्ट.