बगवंतल अनि वोना पर्जा
105
1 येहोवा देवन डगुर-पान सीम्ट. वोना पोरोडुन पचर कीम्ट.
सम्दो जातिनुर नड्डुम वोनङ कार्यन बारेते वेहट.
2 वोन बारेते वारट अनि वोन डगुर-पान सीम्ट.
वोनङ सम्दो मय्मतङ कार्यन बारेते वेहट.
3 वोना पवित्रा पोरोलदुन पिय्सि पोके माम्ट.
येहोवा देवन मह्क्वलिरा दिल कुसिते मनि.
4 येहोवा देवन अनि वोना ताकदुन मह्कट.
वोर बस्केट सङा मंदना इन्जेर वोना चर्नतुन मह्कट.
5-6 वोनोर सेव्कल अब्राहम्ना कांदांतुर्निट!
वोर नेमि कीतोर याकोब्ना कांदांतुर्निट!
वोर कीतङ मय्मतङ कार्यन हेतु कीम्ट.
वोर कीतङ चमत्कारकुन
अनि वोर नायम्ने तस्वा कीतङ गोस्टिन हेतु कीम्ट.
7 वोरे मावोर येहोवा देवल आंदुर.
वोनङ तस्वङ दर्तुरि पूरो जर्ग्सेर मंतङ.
8-9 अब्राहामुन सङा इर्ता नियमुन,
हजर पिडिङ वेरि हेतु इरंतोर.+
अनि इसकुन सङा वोट वाड्ता गोस्टितुन
वोर बस्केट हेतु इरंतोर.
10 वोर अदेन याकोब्ना कांदांतुरकुन कानुंतुन मोडि इर्तोर.
अदेन इज्रयेल पर्जत साटि तंवा बस्केट मंवल नियमुन मोडि इर्तोर.+
11 “कनान देसुन मी साटि सींतोन.
अद मीवा जाय्जतुन मोडि मीवा ईसा आंता” इन्जेर वेह्तोर.
12 अहन वेह्नेके वूर वेले कमि मांदि मत्तेर.
अद देस्नगा सिरिप वूर मुसपरिर दात मत्तेर.
13 वूर उंदि देसनल उंडे उंदि देस
अनि उंदि राजनल उंडे उंदि राज तिरिसेर मत्तेर.
14-15 बति “नना नेमि कीतुरकुन मिरट इट्वा.
अनि ना पर्वक्तलिरकुन दुक्सा सिय्वा”
इन्जि दुस्रुर राजलिरकुन दम्कि सीतोर.+
ते वूर बोना केय्देन दुक्सा बोगे माय्मकि.
16 वोरे कनान देस्नगा करु अरनल कीतोर.
वूर तिंदन साटि चंदि सेल्वक कीतोर.+
17 वूरकुन तेर मुने वोरोन अगा रोह्तोर.
इतेके दासिन मोडि वोम्तेर वोर योसेपुन रोह्तोर.+
18 वोनङ कालकुन सकलिने दोह्तेर.
वोना गोटितगा लोकोंड्ना कडे केरुस्तेर.+
19 वोर योसेप वेह्ता गोस्टि* गडे मानल वेरि,
येहोवा देवल वोना गुंतुन परिक्सा कीतोर.
20 अस्के राजल कबुर सारि कीसि टानेतल वोन सुटि कियुस्तोर.
पर्जत पोरो राज ताकुस्वल वोन मोक्डो सुटि कीतोर.+
21 अनि वोन तंवा रोतुन सूड्वल कारोबारिन मोडि
तंवा जाय्जतुन पोरो अदिकारिन मोडि नेमि कीतोर.+
22 अह्ने तंवुर अदिकारकुन ताकुस्ले
अनि तंवुर पेदोलकुन बुदि वेह्ले वोन नेमि कीतोर.
23 अस्के इज्रयेल कांदांतुर ईजिप्ट देस्ने वातेर.
वोर याकोब्ना कांदांतुर हामुना देस्नगा* मुसपरिर मोडि पिसेर मत्तेर.+
24 येहोवा देवल तंवा पर्जता संतांदुन बडि कीतोर.
ते पगा-दार्कनल तेर वूर वेले ताकद वालिर आतेर.+
25 तंवा पर्जत पोरो वूर ईजिप्ट्नुर पगा पियनल
अनि तंवुर सेव्कलिरकुन पसि किय्वलिक पिलन्क वाटनल
वूर पगा-दार्क्ना दिलतुन कटिन कीसि वाड्तोर.
26 बति येहोवा देवल तंवोर सेव्कल मोसेन
अनि तना नेमि कीतोर वोर अहरोंतुन अगा सारि कीतोर.+
27 वूर ईजिप्ट्नुर नड्डुम, वोनङ मय्मतङ कार्यन
अनि हामुना देस्नगा वोनङ चमत्कार्क कीसि तोह्तेर.
28 येहोवा देवल वूर ईजिप्ट्नुरा देस्नगा सिकटितुन रोह्चि बतय दिस्वक कीतोर.
बति वोना गोस्टि तीर वूर केन्ज्मकि.+
29 वूरा येतुन नेतुडुन मोडि मार्युसीतोर.
ते वूरङ सम्दो मीन्क सातङ.+
30 वूरा देस पूरो पेनेङ पग्रि कीतोर.
अव पेनेङ राजलिरङ कम्रनगा गिर नेङ्तङ.+
31 वोना आगेतुन हिंदल गोङेरा वीसिङ वातङ.
वूरा देस्नगा पूरो गुड्डिक मुच्ले अर्तङ.+
32 वूर पोरो गार-बंडङ
अनि तड्मितङ पिड्ग अरुस्तोर.+
33 वूरङ आङुर वेलिन अनि अन्जुरि मरन पासि वाड्तोर.
वूरा देस्नगा मंवलिक सम्दो मरकुन उरुसि वाड्तोर.
34 वोर आगे सीता काड्कि, डगुक जाडि-कोडङ
अनि लेका परुर अच्चोङ पुड्क वातङ.+
35 अव वूरा देस्नङ सम्दो हिर्वलिक मरकुन तित्तङ.
वूरङ पंटङ सम्दोन तिन्जि मह्तङ.
36 वूरा देस्नुर सम्दिर मडनुर मर्क्ना
इतेके ईजिप्ट्नुर ताकद वालिर सम्दिरा जीवा येत्तोर.+
37 ईजिप्टनल सोने-चांदितुन पिय्सि तंवा पर्जतुन बह्रि तत्तोर.
अस्के वूरङ कांदान्क्नुर्गटल जिगि सेल्वा वोरोर गिर अर्मकि.+
38 वूर हिंदल ईजिप्ट्नुरकुन वेरे पुट्ता.
वूर अगटल बह्रि सोनेके ईजिप्ट्नुर आनंद येत्तेर.
39 वूरकुन साव्लि किय्ले टेपतुन तार्तोर.
रात्ना येलते वेड्चि सिय्ले तड्मिता टेपतुन डङल निपुस्तोर.+
40 वूर कानेतुन साटि पूसि कीतेके ऊतिन वूर्गा वायुस्तोर.
हाबडल काने सीसि, वूरा पेटि बर्पुर निह्तोर.+
41 बंडतुन चीरि कीतेके, येर बुड्कि पासेर पोरो वाता.
अद येर बोडि गुटनगा लव्डिङ आसि पार्ता.+
42 बारितेके तंवोर सेव्कल अब्राहामुन सीता पवित्रा वाग्दंतुन हेतु कीतोर.
43 अनि तंवा पर्जतुन ईजिप्टनल कुसिते बह्रि तत्तोर.
तना नेमि कीतुरकुन वाजा-गाजता आनंद्ने, बह्रि पिय्सि वातोर.
44-45 वूर तंवङ नियमकुन पिय्सि ताकनिर इन्जेर
अनि तंवा दर्मा-ग्रंत्ना कानुन तीर पिसनिर इन्जेर
दुस्रोक जातिनुरङ बोमिन अनि पंटन गिर वूरकुन सीतोर.+
दुस्रुर मेह्नत कीता अद बोमितुन वूर आगुटि कीतेर.
वोर येहोवा देवन डगुर-पान सीम्ट.