104
1 ना परंति, येहोवा देवन डगुर-पान सीम. येहोवा, ना बगवंता, निमे वेले डगुनि आंदि.
निमे मय्मा अनि कीर्तितुन पोंड्तोनि आंदि.
2 निमे वेड्चितुन पाङुडुन मोडि मुच्चि मंति.
निमे पड्दतुन तार्तप पूरो हाबडुन तारंति.
3 अद हाबडङ जलन पोरो नीवा रोतङ दुलम्क वाड्ति.
हाबडङ टेपन नीवा रतुन मोडि वाप्रि कींति.
वडिदङ मारेल्क्नगा निमे यात्रा कींति.
4 बगवंतल तंवुर दूतलिरकुन वडिद दात
अनि तंवुर सेव्कलिरकुन तड्मितङ जारकुन दात किय्वल आंदुर.+
5 वोर दर्तुरितुन ताना बुनदितल मेलिवक्ने निपुस्तोर.
इदेन हिंदल बस्केट्के, अद हाले मायो.
6 अद दर्तुरित पोरो कोल येतुन दुपटित मोडि मुच्ति.
ते अव सम्दुर्क डङलिक गुटन मुडुस्तङ.
7 बति निमे दम्कि सीनेकेन अव सम्दुर्क परर आतङ.
नीवा कडक लेङ केन्चि, अव पिटेडम सोत्तङ.
8 निमे नेमि कीता अद जागतगा सोंले,
अव सम्दुर्क गुटङ वर्सेर अनि लोंद्कनगा रेय्सेर सोत्तङ.
9 अव मर्ला बोमित पोरो वासि मुडुस्वक्ने,
अवेन वीडा वायो आतङ दूरङ नेमि कीति.
10 येहोवा देवल लोदिनगा जलङ पुटुसंतोर.
ते अव लव्डिङ आसि गुटन नड्डुम पारंतङ.
11 अव केडता सम्दो जिव्रस्ना येता तापुन पूरि कींतङ.
अवेनगा उंडन साटि केडतङ गादिङ गिर वांतङ.
12 अवेन बग्लतङ मरक्नगा पिटेङ जागा पियंतङ.
कांदन नड्डुम अव पिटेङ सोबते वडुसंतङ.
13 बगवंतल स्वर्गनल गुटन पोरो पिर अरुसंतोर.
वोर कीतङ काम्क्ना पंडितुन हिंदल दर्तुरि आनंद येतंता.
14 जिव्रसुन साटि जाडितुन, माय्नलिर साटि बाजि-पालन पिरुसंतोर.
अद तीर्दे बोमितल माय्नलिर साटि चंदि सीसेर मंतोर.
15 नरिमन्कना दिलतुन आनंद सिय्वल आङुर्क्ना रसतुन,
वूरा मेंदोडुन गुडा गुडा किय्वल नियदुन
अनि नरिमन्कन ताकद सिय्वल कानेतुन सीसेर मंतोर.
16 येहोवा देवल उर्स्तङ मरकुन इतेके,
अव लेबनोंतङ देवदार मरकुन बर्पुर येर मंता.
17 अव मरक्नगा पिटेङ गूडङ कींतङ.
मरकुन पोरो कोङलिक जागा पियंतङ.
18 डेङलिक गुटनगा केडा गोरेङ मंदंतङ.
मोलोक बंडनङ चेर्किनगा वोलंतङ.
19 कालमकुन तोहन साटि नेलेन्जुन गडि कीतोर.
तना बस्के सोंदना इंवल पोडदुन टावय.
20 निमे सिकटि कीता काड्कि रात आसेर मंता.
अद रात्ने केडता जिव्रस वेलियंता.
21 चिहोङ सिकरि किय्ले हंकत कीसेर मंतङ.
तम्वा कानेत साटि बगवंतन कोर्तपिनय अद मंता.
22 पोड्द पेसिता पेजे अव जिव्रस मल्सि सोन्जि,
तम्वङ बुयरिनगा आरम कींतङ.
23 अस्के पर्जा तम्वा काम किय्ले बह्रि दांतेर.
अनि पोड्द सोनल वेरि काम कींतेर.
24 येहोवा देवा, निमे गडि कीतङ अव बेय वेले तीर्क्नङ मंतङ.
नीवा तेलिवि-गियंते अवेन निव्डि कीति.
अव सम्दोने दर्तुरि निन्चि मंता.
25 अचुला! अद पेर्सा सम्दुर वेले डगुर मंता.
अदेनगा लेका किया पर्वट अचोर चुडुक-डगुक जिव्रस मंता.
26 तान्गा रूकङ यात्रा कींतङ.
तान्गा कर्स्ले निमे निव्डि कीतङ वेरिनल दिस्वल जिव्रस मंता.+
27 बरोबर वकत्ने अवेन तिंले काने सीकि इन्जेर,
अव सम्दिय आसते नी बाज सूड्सेर मंतङ.
28 निमे अवेन बस्केते काने सींतियो, अस्के अव मीरि कींतङ.
निमे बस्केते मुटि कोलि कींतियो, अस्के अव बर्पुर काने तिंतङ.
29 निमे पेरे-गेह्किते, अव वेरिसि तरतरा आंतङ.
अवेना जीवता हूकुर तेंड्तेके, अव परन सुटि कीसि तोडितगा तोडि आंतङ.
30 बति नीवा जीवता हूकुर उह्ककिते, अवेना जल्मा आंता.
दर्तुरिता पोरोडा बागमुन पूना कीसेर मंदंति.
31 येहोवा देवना मय्मा बस्केट निल्सि मंदना.
वोर देवल तना कीतन सूड्सि आनंद येतिर.
32 वोर दर्तुरित सूड्तेके आयर, अद तरतरा आंता.
वोर गुटन इट्तेके आयर, अवेनल पोया पेसियंता.
33 ना जिन्गनि पूरो येहोवा देवन पाटङ वारंतोन.
नना पिसि मनल वेरि, ना देवन डगुर-पान सिय्वलिक कीर्तन्क वारंतोन.
34 वोन बारेते नना हेतु कीसेर मंवलिक वोन आनंद सियिङ.
नना येहोवा देवन करि किय्वडुन हिंदल कुसिते मंतोन.
35 पापेस्तलिर बोमित पोरोडल चिल्के मूरे मायिर.
करेबलिर बस्केट मंवक्ने पूरो नासेडम आयिर.
ना परंति येहोवा देवन डगुर-पान सीम.
सिरिप वोने डगुर-पान सीम.