बगवंतना पेर्मा
दाविद्ना कीर्तन.
103
1 ना परंति! येहोवा देवन डगुर-पान सीम. ना रोपो मंवल सम्दोति, वोना पवित्रा पोरोडुन डगुर-पान सीम.
2 ना परंति! येहोवा देवन डगुर-पान सीम.
वोर दयते कीता बदे कार्यतुन मरुङ्मा.
3 वोर नीवङ सम्दो पापकुन मापि कींतोर.
नीवङ सम्दो बेमरिन हटि कींतोर.
4 वीच्ना डोडोतल नी परंतुन तपुसंतोर.
वोर किवुल अनि मारियो अद पेर्मा इंवल किरिटुन नी पोरो केरुस्तोर.
5 गंदडुन मोडिता जवन-पांदा ताकदुन नीकुन मल्सि सींतोर.
अनि नीवा जिन्गनित साटि चोकोट्नङ वस्तुङ सींतोर.
6 येहोवा देवल नियत्नङ काम्क कीसेर,
दाबे मासि दुक्सते मंवलिर सम्दिरकुन नायम कींतोर.
7 बगवंतल तंवा सरि-मारगुन बारेते मोसेन वेह्चि तोह्तोर.
इज्रयेल पर्जतुन तंवङ कामकुन तोह्तोर.
8 येहोवा देवल बेय दया वाले अनि किवुल तोह्वल आंदुर.
वोर वेय्ने सोङुन वायोर अनि मारियो अद पेर्मते बर्पुर निन्चि मंवल आंदुर.+
9 वोर मा पोरो बस्केट कसुक वाट्सेर मंवल आयोर.
अनि बस्केट सोङुन पिय्सि मंवल आयोर.
10 वोर मावङ पापकुन पिय्सि माकुन सिक्सा किय्मकि.
मावङ तपकुन पिय्सि माकुन वाय्वल सिक्सतुन वाट्मकि.
11 दर्तुरितल आगस बचोर ते पोरो मंतयो,
तान तेर अदिक तन्गा बाव-बक्ति वालिर पोरो वोना मारियो अद पेर्मतुन तोहंतोर.
12 सिडयिङ बाजनल पोरयिङ बाज बचोर्ते लङ मंतयो,
अचोर लङ मावङ पापकुन टेंड्सि वोर वाडि सीतोर.
13 बाबो तंवुर मरकुन पोरो दया तोह्तपिनय,
येहोवा देवल तंवा बाव-बक्तिता वेरेते ताक्वलिर पोरो दया तोहंतोर.
14 मरट निव्डे माता तरिका वोन टावये.
मरट तोडितल निव्डे मातट इंवडुन वोर हेतु कीसेर मंतोर.
15 नरिमन्कना आवुस जाडित मोडि मंता.
जाडिता पुङर पोय्तपिनय वोर पोयंतोर.
16 तान वडि पाता इत्तेके, अद दिस्वक सोडियंता.
अद आता पेजे अद मंवल जागये तान वोड्कि पियो.
17-18 बति वोर येहोवनङ नियम्क अनि आगेन पिय्सि ताक्वलिर पोरो,
वोना बाव-बक्तिता वेरेते पिस्वलिर पोरो,
वोना मारियो अद पेर्मा पिडिनङ-पिडिङ मंदंता.
वोना नियत बस्केट निल्सि मंदंता.
19 येहोवा देवना कचुरि स्वर्ग्नगा मंता.
अगटल वोर सम्दोतुन पोरो राज ताकुसेर मंतोर.
20 येहोवल आगे सीता तीर ताक्वलिर दूतलिर्निट!
इतेके वोना वचंतुन बर्पुर पूरि किय्वलिर ताकद वालिर्निट!
वोन डगुर-पान सीम्ट.
21 येहोवा देवनुर स्वर्ग्नङ दलम्क्नुर सिपायिर्निट!
इतेके वोना इचतुन पूरि किय्वलिर सेव्कलिर्निट!
मिरट सम्दिर वोन डगुर-पान सीम्ट.
22 येहोवल राज ताकुस्वल हर जागतगा मंवलिक्निट!
वोन डगुर-पान सीम्ट.
ना परंति येहोवन डगुर-पान सीम.