दुक्सते मंवल जवन-पांदुर किय्वल पार्तना
येहोवा देवना चर्नते दुक्सतुन तोह्वल कीर्तन
102
1 येहोवा देवा, नावा पार्तना केन्जा. नना आड्सेर किय्वल विनंति निह्गा येवा सीम.
2 नना आपतिते मंवल दिवोसुन नेटि, नाकुन पेरे-गेह्चि मन्मा.
नावा गोस्टि केन्चि, नना आड्सेर कीता विनंतितुन वेय्ने जवब सीम.
3 पोया पेसिसि सोत्तपिनय नावङ दिवोस्क वीड्सेर मंतङ.
सोदेडगा मंवलिक वेतपिनय नावङ बोकङ वेसेर मंतङ.
4 येदिते वार-जूर्ता जाडित मोडि, नावा दिल नारज आसि मंता.
इदेन हिंदल, नाकुन काने तिंदा वसेर सेल्ले.
5 नना दुक्सते कुह्च्वडुन हिंदल,
नावा मेंदोल बोकनगा बोका आता.
6 नना बोडि गुटनगा वोंटरि मंवल गुबुडुन दात्नोना आंदुन.
पाड आतङ अव जागनगा मंवल गुबुडुन मोडि मंतोन.
7 नना रात पूरो चेतो मन्जेर,
रोत पोरो मंवल वोंटरि कोट्का पिटेत मोडि मंतोन.
8 दिवोस पूरो ना पगा-दार्क नावा अडिबोसंतेर.
ना पोरो बेय सोङ मंवलिर नावा पोरोल मुट्सि सापेना सींतेर.
9-10 नीवा सोङुन हिंदल, नना नीरदुन कानेत मोडि तिन्जेर मंतोन.
नावा उंवल येतगा कड्दा काडेर मिस्डि कीसि उन्जेर मंतोन.
निमे नाकुन तह्चि लङ वाडि सीति.
11 पोड्द सोनेकेडा दड्मित मोडि नावङ दिवोस्क वीड्सेर मंतङ.
नना जाडित मोडि वार-जूर्सि मंतोन.
12 येहोवा देवा, निमे बस्केट कचुरितगा उच्चि मंवनि आंदि.
नीवा पोरोडुन पिडिनङ-पिडिङ हेतु कींतेर.
13 निमे तेच्चि सियोन नगुडुन पोरो किवुल वांति.
तान पोरो दया तोह्वल वकत वाता.
तान साटि निर्नय कीसि मत्ता अद वकत वाता.
14 अद नगुडङ उल्टे मातङ अव बंडन गिर नी सेव्कलिर वेले पसंद कींतेर.
अद नासेडम आता नगुडा दुबतुन गिर वूर दयते सूडंतेर.
15 अस्के दुस्रोक जातिनुर येहोवा देवना पोरोडुन वेरियंतेर.
दर्तुरितुर सम्दिर राजलिर नीवा मय्मतुन सूड्सि वेरियंतेर.
16 बारितेके येहोवा देवल सियोंतुन मर्ला दोहंतोर.
वोर तंवा मय्मते पावे मांतोर.
17 वोर दिक सेलुर वूर गरिब्ना पार्तनतुन वटिन इंवक्ने
वूर कोर्ततुन केन्जंतोर.
18 वाय्वलिक पिडिनुर साटि इवेन लिहि कीसि इरा.
अस्के बविसत्ने जल्मा आय्वलिर येहोवा देवन डगुर-पान सींतेर.
19-20 येहोवा देवल तंवा पवित्रा जागतल बूड सूडंतोर.
जेल बोगे मासेर मंवलिरा दुक्सते कुह्च्वडुन केन्जन साटि,
अनि मरंता सिक्सा येत्वलिरकुन सुटि कियुसन साटि
स्वर्गनल दर्तुरितुन सूडंतोर.
21 अस्के सियोंतुर येहोवा देवना पोरोडुन हेतु कींतेर.
वूर येरुसलेम्नगा वोना डगुर-पांदुन बारेते वेहंतेर.
22 बस्केते दुस्रोक जातिनुर अगा मीरे माय्वल जर्गंतयो,
अस्के राज्क्नङ राज्क येहोवना पार्तना-विंति किय्ले मीरे माय्वल जर्गंता.
23 नना अर्दो वहिते मनेके, बगवंतल नावा ताकद कमि कीतोर.
वोर नना पिस्वलिक दिवोसकुन कमि कीतोर.
24 बति नना इहिन,
“ना बगवंता, निमे बस्केट पिडिनङ-पिडिङ पिसि मंवनि आंदि.
नना पिस्वलिक दिवोस्कनल नड्डुम कीसि नाकुन वोय्मा.
25 तोलेने निमे दर्तुरितुन गडि कीतोनि आंदि.
अनि आगस्क गिर नीवा केय्देने गडे मातङ आंदुङ.+
26 अव सम्दो मूरे मासि दांतङ.
बति निमे बस्केट गिरे मंवनि आंदि.
अव सम्दो पोंड्तङ कप्डिन दात पडनङ आंतङ.
अनि मेंदोडा पाङुडुन कुडुसीतपिनय अवेन तेंड्सि वाटंति.
अस्के अव बद्ले मांतङ.
27 बति निमे बस्केट गिरे उंदि तीर मंवनि आंदि.
नीवङ पिस्वलिक साल्क बस्केन मारोङ.
28 नीवुर सेव्कलिरा मरि-मियड नीवा कोरते पिसेर मंदंतेर.
वूरा संतान नीवा चर्नते गट बडे मांतेर”
इन्जेर विनंति कीतोन.