राजना वाग्दन
दाविद्ना कीर्तन
101
1 नीवा मारियो अद पेर्मतुन अनि नायदुन बारेते नना वारंतोन. येहोवा देवा, नीकुन डगुर-पान सीसेर वारंतोन.
2 बे-कसुर वाले सर्दगा ताक्सेर दिहंते वागे मांतोन*.
निमे बस्के मदत किय्ले नह्गा वांति?
नावा रोतगा नना सुदुड दिल्ते पिसंतोन.
3 नावा नदुडुन मुने बवे आगम्नङ कार्यन इरोन.
नीवा बाव-बक्तिता सर्दल बह्के मातुरङ कार्यन नना मेच्चोन.
अव नाकुन बह्कि किय्वक्ने दिहंते सूडंतोन.
4 करेबलिक सोन्च्क नावा दिल्तल लक मनिङ.
नना करेबलिक काम्कनल लङ मंदंतोन.
5 तंवोर आजु-बाजुतोन मक्डिते राङि सिय्वन नासेडम कींतोन.
पोक्डते सूड्वलिरकुन अनि गर्वता दिल वालिरकुन नना सोसि कियोन.
6 ना सङा मनल बरोसा वालिर साटि नना मह्क्सेर मंतोन.
सिरिप बूर्ते बे-कसुर वाले सरि ताकंतेरो, वूर्कुने नावा सेवा किय्ले वोपंतोन.
7 पसि किय्वन ना रोतगा मंदा सियोन.
लबड वड्क्वन ना नदुडुन मुने निला सियोन.
8 हर दिवोस सक्रेन देस्नगा* मंवलिर करेबलिर सम्दिरकुन नासेडम कींतोन.
येहोवा देवना नगुडगा पापेस्तलिर मंवक्ने कींतोन.