बगवंतले इद जग्नोर अदिकारि आंदुर
उंदि कीर्तन
98
1 येहोवा देवन साटि उंदि पूना कीर्तन वारट. बारितेके वोर डगुक कार्यङ कीतोर.
वोना तिना केय अनि पवित्रा वाले बुजा* वोन मेयुसीता.
2 येहोवा देवल तंवा बचि किय्वल कार्यतुन वेह्चि तोह्तोर.
दुस्रोक जातिनुर मुने, तंवा नियतुन तोह्तोर.
3 इज्रयेल्ता कांदांतुर पोरो तना तोह्ता मारियो अद पेर्मतुन अनि बरोसतुन हेतु कीतोर.
दर्तुरितङ नालुङ कोन्क्नुर पर्जा मा बगवंतना बचि किय्वल कार्यतुन सूड्तेर.
4 दर्तुरितुर लोकुर्निट! आनंद्ने किलिसेर येहोवा देवन डगुर-पान सीम्ट.
बेय कुसिते कीर्तन्क जोर्ते वारट.
5 चोंड्कना लेङ्ने येहोवा देवन डगुर-पान सीसेर वारट.
वोन साटि चोंड्कङ नेकुसेर वारट.
6 कालिकोम अनि तुरन नेकुसेर
राजल आय्वल येहोवा देवना चर्नते आनंद्ने किलियट.
7 सम्दुर अनि तान्गा मंवलिक सम्दो कुसिते आवज सियिङ.
दर्तुरि अनि तान्गा मंवलिर आनंद्ने किलियिर.
8 वोना चर्नते लव्डिङ कुसिते चपटिङ पायिङ.
गुटङ आनंद्ने किलियिङ.
9 बारितेके, येहोवा देवल दर्तुरितुरकुन तस्वा किय्ले वासेर मंतोर.
वोर नियतुन पिय्सि परिपन्चम्नुरकुन
अनि नायमुन पिय्सि सम्दो जातिनुरकुन तस्वा कींतोर.