बगवंतले सम्दोत पोरो राज ताकुस्वल आंदुर
97
1 येहोवा देवल राज ताकुसेर मंतोर. दर्तुरि पूरो आनंद येति.
लंकङ सम्दो गिर कुसि आयिङ.
2 टेपङ अरिक कह्चर सिकटि वोन गेर-पासि मंदंता.
नियत अनि नाय वोना कचुरितुन आदर आसि मंतङ.
3 वोन मुने तड्मि ताक्सेर मंदंता.
सिर्मुट मंवलिर वोनुर दुस्मन-दारकुन अद डुंडुसि वाटंता.
4 वोनङ तीज-बीज्क कलितुन वेड्चि सींतङ.
दर्तुरि अवेन सूड्सि वेरिसेर मंता.
5 येहोवा देवन मुने, पूरो कलितोर माल्कन मुने,
गुटङ मियोडत दात उग्रे मांतङ.
6 आगस्क वोना नियतुन पचर कीसेर मंतङ.
सम्दो जातिनुर वोना मय्मतुन सूडंतेर.
7 पर्जा तमा निव्डि कीतङ मूर्तिन सूड्सि पोके मांतेर.
चेक्तङ बोमन पूजा किय्वलिर सम्दिर लजे मांतेर.
बारितेके वूरङ सम्दो पेन्क येहोवने डंडोस कींतङ.
8 येहोवा देवा! सियोंतगा मंवलिर केन्चि,
नीवङ नायम्नङ तस्वन पिय्सि आनंद येच्चेर,
यूदतङ चहर्क्नुर पर्जा कुसि आसेर मंतेर.
9 बारितेके येहोवा देवा! पूरो जग्दुनियतुन पोरो निमेय अदिकारिनि आंदि.
निमे सम्दो पेन्कनल वेले डगुनि आंदि.
10 येहोवा देवना बक्ति पेर्मते किय्वलिर्निट! करबुन पसंद किय्मट.
तंवुर बक्तलिरा परंतुन वोरे काबाड्सेर मंतोर.
करेबलिरा केय्दल वोर वूरकुन तपुसंतोर.
11 नियत्नुर साटि वेड्चि सींतोर.
सुदुड दिल्ते ताक्वलिरकुन आनंद सींतोर.
12 नियत्ने ताक्वलिर्निट! येहोवा देवन हिंदल कुसिते मंट.
वोना पवित्रा पोरोडुन पिय्सि, वोन दनेवाद वेह्चेर डगुर-पान सीम्ट.