कीर्तना 96

बगवंतले महा राजल आंदुर

1 येहोवा देवन बारेते पूना कीर्तन वारट.

जग्दुनियतुर लोकुर्निट! येहोवा देवन बारेते वारट.

2 येहोवा देवना पोरोडुन बोंदि कीसेर डगुर-पान सीम्ट.

हर दिवोस वोना बचि किय्वल कबुडुन पचर कीम्ट.

3 दुस्रोक जातिनुर सङा वोना मय्मतुन पचर कीम्ट.

पूरो जग्दुनियतुर सङा वोर कीतङ बेय डगुक कार्यन वेहट.

4 येहोवा देवल बेय कीर्ति वाले आंदुर.

सम्दिर्गटल वेले डगुर-पान येतनल मंवल आंदुर.

सम्दो पेन्क्नगटल अदिक मानि कीनल मंवल आंदुर.

5 बारितेके, दुस्रोक जातिनुरङ पेन्क सिरिप मूर्तिङे आंदुङ.

बति येहोवा देवल आगसकुन गडि कीतोर वोर आंदुर.

6 वोर राजल आता काड्कि, कीर्ति अनि डगुर-पान वोन्गा मंतङ.

बलम अनि सोबा वोना पवित्रा जागतगा मंतङ.

7 सम्दो जातिनुर लोकुर्निट! सिरिप येहोवा देवने डगुर-पान सीम्ट.

बलम अनि मय्मा वाले इन्जेर वोने डगुर-पान सीम्ट.⁺

8 येहोवा देवना पोरोडुन बोंदि कीसेर डगुर-पान सीम्ट.

निवोदुन पिय्सि, वोना आव्रत रोपो नेङट.

9 सुदुड इंवल सोबतुन पोंड्सि येहोवा देवना पार्तना-विंति कीम्ट.

जग्दुनियतुर लोकुर्निट! वोना चर्नते तरतरा आम्ट.

10 अनि दुस्रोक जातिनुर सङा, “येहोवा देवल राज ताकुसेर मंतोर.

दुनिया हाले माय्वक निपुसि मंता.

वोर नायमुन पिय्सि सम्दिरा तस्वा कींतोर” इन्जेर वेहट.

11 अदेन साटि वोन मुने आगस्क आनंद येतिङ.

दर्तुरि कुसि आयि.

सम्दुर अनि तान्गा मंवल सम्दो आनंद्ने आवज सियिङ.

12-13 वहुक अनि अवेनगा पंड्वलिक सम्दो गिर कुसिते मंट.

केडतङ मरक सम्दो कुसिते येहोवा देवन आवज सीम्ट.

बारितेके, वोर वाय्वल मंतोर.

वोर दुनियतुरकुन नायम अनि सतेमुन पिय्सि तस्वा कींतोर.