कीर्तना 95

#बगवंतन डगुर-पान सिय्वल कीर्तन

1 वरट! येहोवा देवन साटि कुसिते वार्कट.

माकुन बचि किय्वल बंडत मोडि मंवन आनंद्ने वार्कट.

2 दनेवाद वेह्‍चेर डगुर-पान सीसेर वोना चर्नते दाकट.

वोन पोरोडे कुसिते कीर्तन्क वार्कट.

3 बारितेके येहोवा देवल बेय डगुर पेन आंदुर.

सम्दो पेन्क्नोर महा राजल आंदुर.

4 दर्तुरित रोपोडङ कोल जागङ

अनि डङलिक गुटङ सम्दोय वोनङे आंदुङ.

5 सम्दुर गिर वोना केय्देन गडे माता आंद.

वोनङ केय्क्नेने दर्तुरितुन निव्डि कीतोर.

6 वरट दंडोस कीसि गप्ने काल कर्कट.

माकुन गडि कीतोर वोर येहोवना चर्नते मुर-टोङ्रङ कोट्कट.

7 वोरे मावोर बगवंतल आंदुर.

वोर पोसि किय्वल पर्जा अनि वोर मेह्‍वलिक गोरेना मंदा आंदट.⁺

मिरट नेंड वोना गोस्टि केन्चि ताक्मड इतेके, वेले चोकोट मंदु:

8 बोडि गुटनगा मंवल मेरीबतगा

अनि मस्सातगा मी तोत्तुर मुंडिर आतपिनय,

नेटा दिवोस्ने मिरट मीवङ दिलकुन मूजोर किय्मट.⁺

9 अगा मी तोत्तुर बोडि गुटनगा नावा हवड सूड्तेर.

तेर बति नना अस्के बतल किया पर्तोनो, अव कार्यङ सूड्तेर.

10 बति चालिस साल्क वेरि अद पिडितुरकुन दुक्सते वोर्च्तोन.

वूरङ दिल्क नह्‍गटल बह्‍के मातङ.

नना वेह्‍ता सरि-मारग पिय्सि ताक्ले वूर वोप्मकि.

11 अदेन साटि सोङुन वासि,

“वूरकुन नावा आरम्ना जागतगा बस्केन वाया सियोन”

इन्जि सोङ्ने आडा वाड्तोन.⁺