कीर्तना 94

बगवंतले सम्दिरोर नायदिकारि आंदुर

1 येहोवा देवा, तपुन पिय्सि सिक्सा किय्वल बगवंता!

माय्नलिरा तपुन पिय्सि सिक्सा किय्वल बगवंता!

नीवा सोङुन तोहा.

2 निमे जग्दुनियतुन नायादिकारिनि आंदि.

निमे तेच्चि गर्वते मंवलिरकुन वूर कीततुन पिय्सि सिक्सा कीम.

3 येहोवा देवा, करेबलिर उंडे बचेजेल आनंद येतनिर?

करेबलिर उंडे बचेजेल कुसि आनिर?

4 वूर वदुर्सेर वेले करब्नङ गोस्टिङ वड्क्सेर मंतेर.

करब किय्वलिर सम्दिर पोके मासेर डगुक गोस्टिङ वेहंतेर.

5 येहोवा देवा, वूर नीवा जाय्जत आय्वल पर्जतुन दुक्सा सींतेर.

निमे नेमि कीति वूर पर्जतुन तक्लिब सीसेर मंतेर.

6 वूर रांडे वेय्लोकुन अनि पर्देसिरकुन जकंतेर.

पोसटि मरि-मियडा जीवा येतंतेर.

7 “येहोवा बगवंतल इव सम्दोन सूड्सेर सेलोर.

याकोब्नोर बगवंतल इव सम्दोन सूडोर” इन्जेर अहन कींतेर.

8 हेर्मित दात्नुर्निट! इदेन बारेते सोन्च कीम्ट.

बुदि-गियन सेलुर वूर्निट! मीकुन बस्के बुद्दि वायर?

9 सम्दिरङ केव्क निव्डि कीतोर वोर केन्ज्वक मंदनुर कि?

सम्दिरङ कड्क निव्डि कीतोर वोर सूड्वक मंदनुर कि?

10 दुस्रोक जातिनुरकुन सिक्सा किय्वल,

माय्नलिरकुन तेलिवि करुस्वल, मा अदिकारिरकुन सिक्सा किय्वक मंदनुर कि?

11 माय्नलिरङ सोन्च्क बततुने कामि सियोङ इंवल येहोवा देवन टावा.⁺

12 येहोवा देवा! नी हिंदल जरब्ने पिस्वलिर आसिर्वाद येत्वलिर आंतेर.

दर्मा-ग्रंत्ना कानुंतुन नी हिंदल करिवलिर आसिर्वाद येत्वलिर आंतेर.

13 करेबलिर साटि डोडो ताडनल वेरि,

आसिर्वाद येत्तुरङ दुक्सतङ दिवोस्कनल वूरकुन आरम सींति.

14 येहोवा देवल तंवा पर्जतुन टूटि किय्वल आयोर.

तंवा जाय्जत आय्वलिरकुन सुटि किय्वल आयोर.

15 नियतुन निपुसन साटि नाय्दा तस्वा जर्गंता.

नियत्ना दिल वालिर सम्दिर तान पिय्सि ताकंतेर.

16 ना हिंदल आसि करेबलिर सङा बोर लडेय कीनुर?

नाकुन उल्टा आसि गल्ति किय्वलिर सङा बोर लडेय कींतोर?

17 येहोवा देवल, नाकुन मदत किय्वक इत्तेके,

नावा परन अदे गट्कते वीच्नगा सोन्जि मंदु.

18 नावा काल गसुर्क्ता इन्जेर नना इनेकेते,

येहोवा देवा, नीवा मारियो अद पेर्मा नाकुन अर्वक्ने पिय्ंदु.

19 नावा मन-दिलतगा दुक्सते सोन्च-विचर्क बडे मानेके,

निमे नाकुन सुम्जि कीसि ना परंतुन पह्‍जे मत्ता अद सांति-आनंद सीति.

20 करेबलिरा ताकुस्वल राज्नगा नीकुन बतल पोत मंता?

“करब कीकट” इन्जेर वूर कानुन्क तयर कींतेर.

21 नियत्नुरा परन येत्ले, करेबलिर वूर पोरो मुच्लि अरंतेर.

कसुर कीतुर इन्जेर बे-कसुर वालिरकुन मरंता सिक्सा वाटंतेर.

22 बति येहोवा देवल नाकुन बचि किय्वल डङल किला आसि मंतोर.

ना बगवंतल नाकुन काबाड्वल डङल बंडा आसि मंतोर.

23 वोर वूरङ तपकुन वूरङ तलन पोरो वायुसंतोर.

वूरा करब-पांदुन पिय्सि वूरकुन मूरि कींतोर.

मा बगवंतल आय्वल येहोवल वूरकुन सत्ते नास कींतोर.