कीर्तना 92

डगुर-पान सिय्वल कीर्तन

सबत सडदुन नेटि^* वार्वल कीर्तन

1 येहोवा देवन डगुर-पान सिय्वल वेले चोकोट्ना गोस्टि आंद.

सम्दोत पोरो मंवल बगवंता, नीवा पोरोलदुन कीर्ति सिय्वल वेले चोकोट्ना गोस्टि आंद.

2 सक्रेन नीवा मारियो अद पेर्मतुन बारेते वार्वल,

हर रात नीवा बरोसता गुंतुन बारेते वार्वल वेले चोकोट्ना गोस्टि आंद.

3 दहा वारिङ मंवल कर्नाट्ने अनि जोर्ते आवज सिय्वल चोंड्कते

नीकुन कीर्ति सिय्वल चोकोट्ना गोस्टि आंद.

4 बारितेके येहोवा देवा, नीवा कार्यतुन हिंदल नाकुन आनंद सीसेर मंति.

नीवा केय्दे कीति अव कार्यन हिंदल नना कुसिते वार्सेर मंतोन.

5 येहोवा देवा, नीवङ काम्क बेय डगुक आंदुङ.

नीवङ सोन्च्क बेय वेरिनल मंदंतङ.

6 गियन सेलुर वूर अवेन सम्जे माया परुर.

हेक्डलिर अवेन करि किया परुर.

7 करेबलिर जाडित मोडि कोड्संतेर

अनि पुङकुन मोडि वूर पोयंतेर.

बति वूर बस्केट नासेडम आय्लेके अहन जर्गंता.

8 बति येहोवा देवा, निमे बस्केट राज ताकुस्वनि आंदि.

9 येहोवा देवा, नीवुर पगा-दार्क नासेडम आंतेर.

अनि करब काम्क किय्वलिर सम्दिर हारे मांतेर.

10 केडा कोंदतङ सींकुन मोडि, निमे नावा ताकदुन बडि कीति.

अनि नावा तलत पोरो निय वेडिसि आनंद सीति.

11 नावा परन तेंड्ले सूड्वलिरा हारे माय्वडुन कड्मेन सूड्तोन.

नाकुन उल्टा तेद्वलिर करेबलिरा आड्वल ना केवकुन केन्जा वाता.

12 नियत्ने ताक्वलिर कजुर मरत मोडि वेले पंडि सींतेर.

लेबनोंतङ देवदार मरकुन मोडि बेर्संतेर.

13 येहोवा देवना मंदिरतुन करुम उर्स्तङ अव मरकुन मोडि,

वूर मा बगवंतना रोता आव्रतगा बेर्संतेर.

14 वूर तम्वा वेडिल-पांदे गिर चोकोट्ना पंडि सींतेर.

अनि वूर बस्केट चिला चिला मन्जेर गट बेर्संतेर.

15 येहोवा देवल नायम्नोर आंदुर.

वोरे माकुन बचि किय्वल डङल बंडा आंदुर.

अनि वोन रोपो बगड-नियत सेले इन्जेर अद तीर्दे वूर तोहंतेर.