कीर्तना 91

बगवंतल काबाड्वल आंदुर

1 सम्दोत पोरो मंवल बगवंतना चर्नते पिस्वल माय्नले,

सर्वसक्तिवंतना दड्मिते आरम येत्वल आंदुर.

2 “वोरे नाकुन आदर आसि मंतोर.

अनि नाकुन बचि किय्वल किला आसि मंतोर.

नना बरोसा किय्वल ना बगवंतल वोरे आंदुर”

इन्जेर नना येहोवा देवन बारेते वेह्‍चेर मंतोन.

3 सिकरिदारल मांडि कीतङ पासनल वोर नीकुन काबाडंतोर.

मरन तर्वल रोगमनल वोर नीकुन बचि कींतोर.

4 वोर तंवङ मारेल्क्ने नीकुन मुचंतोर.

वोनङ मारेलकुन बूड नीकुन दड्मि पुटंता.

कवच अनि डालदुन मोडि वोना सतेम नाकुन काबाड्वल आसि मंता.

5 रात्ना येलते वेरुस्वलिर बारेतेन आयि,

दिहता येलते परिवलिक बान्कुने आयि निमे वेरिवक मंदंति.

6 सिकटिते वेलिसेर मंवल रोगमुने आयि,

दुपरिता येलते नुक्सन किय्वल सडेसातितुने आयि निमे वेरिवक मंदंति.

7 नी बग्ला हजर (1,000) मांदि बूड अर्तेके गिर,

नी तिना बग्ला दहा हजर्क (10,000) मांदि बूड अर्तेके गिर

बति अद गंडम नी करुम वायो.

8 निमे कड्मेन सूड्सेर मनेके,

करेबलिरकुन सिक्सा पुटंता.

9 उंदि मोका निमे, “येहोवा देवा, निमेय नाकुन काबाड्वनि आंदि”

इन्जेर सम्दोत पोरो मंवल बगवंतना कोरते दाकिते,

10 नी पोरो बदे गंडम वासि अरो.

नीवा रोन बदे सडेसाति वासि चेट्गूडो.

11 बारितेके निमे ताक्वलिक सम्दो सरिनगा नीकुन काबाड्ले,

बगवंतल नी बारेते तंवुर दूतलिरकुन आगे सींतोर.⁺

12 वूर दूतलिर नीवङ कालकुन बंडा लाग्वक्ने

नीकुन आन्ज्चि पियंतेर.⁺

13 निमे चिहोन अनि विक वाले तरसकुन पोरोडल ताकंति.

जवन मंवलिक चिहोन अनि बेय विक वाले तरसकुन गिर दीव्सि दाबि कींति.⁺

14 येहोवा देवल, “वोर नह्‍गा बरोसा इर्सि बाव-बक्तिते ताक्ता काड्कि,

नना वोन काबाडंतोन.

वोर नावा पोरोल करि कीसि मत्ता काड्कि,

नना वोन डगुर-पान सींतोन.

15 वोर नाकुन विनंति कीतेके, नना वोन जवब सींतोन.

तक्लिब्नगा मनेके नना वोन सात मंदंतोन.

वोन नना काबाड्सि, डगुर-पान सींतोन.

16 वोना आवुस बडि कीसि वोन बर्पुर आनंद सींतोन.

नना बचि किय्वल कार्यतुन वोन तोहंतोन” इन्जेर वेह्‍चेर मंतोर.