4वा बागम
(कीर्तन्क 90-106)
#बस्केट उंदि तीर मंवल बगवंतल
बगवंतनोर सेव्कल मोसे कीता पार्तना
90
1 ये पर्बु, पिडिनङ-पिडिङ ममोट मंवल जागा निमेय आंदि. 2 डङलिक गुटङ, दर्तुरि अनि परिपन्चम गडे मायन मुनेतल
पिडिनङ-पिडिङ बस्केट मंवल बगवंतनि निमेय आंदि.
3 निमे माय्नलिर सङा, “मिरट तोडितगा तोडि आम्ट!” इन्जेर इंति.
अनि करलेन वूरङ कूरकुन अहन मल्सि तोडित मोडि मार्युसंति.
4 नीवा नदुडे हजर वर्सङ गुज्रे मातेके गिर,
अव निनेता दिवोसुन मोडिन मंदंतङ.
अव उंदि रात्ना इचुसि टेमुन मोडि मंदंतङ.+
5 ऊसा कर्क्ने पासि वोतपिनय
निमे वूरकुन पासि वोतेके वूरा मरन आंता.
वूर सक्रे पिर्वल जाडित मोडि मंतेर.
6 अद सक्रेन पिर्सि, चिला चिला दिसंता.
अनि अद पोद्रेक्ना येलते वार-जूरंता.
7 नी सोङुन हिंदल ममोट नासेडम आसेर मंतोम.
नीवा बेय सोङुन हिंदल दड्कि तिन्जेर मंतोम.
8 मावङ सम्दो पापकुन नी मुने इर्सि मंति.
नी मोकोम्ना वेड्चिते मक्डितङ पाप्क गिर दिसेर मंतङ.
9 नी सोङुन सोसि कीसेर, मावङ दिवोस्क पूरो पिसेर मंतोम.
दुक्सते कुह्च्तपिनये मावा पिस्वल कालम गुज्रे मासेर मंता.
10 ममोट पिसि मंवलिक साल्क सत्तर (70).
जरा बलम वाले मत्तेके अस्सि (80) साल्क मंदा वचो.
तेर बति, अद जिन्गनि दुक्सते निन्चि मंदंता.
अद वहि वेय्ने गुज्रे मांता.
अनि ममोट दिस्वक परिसि दांतट.
11 नी सोङ्नगा बचोर सक्ति मंता इंवल बोन टावा?
अद नीवा सोङ्ना सक्ति पर्जतुन रोपो वेरे पुटुसंता.
12 अदेन साटि बुदि-गियंते पिसनल
मावा जिन्गनितङ दिवोसकुन लेकनल माकुन बुदि करुसा.
13 येहोवा देवा, मह्गा मल्सि वाय्वक्ने बचेजेल मंदंति?
नी सेव्कलिर आय्वलिर मा पोरो नीवा किवुल तोहा.
14 हर दिवोस सक्रेने नीवा मारियो अद पेर्मते माकुन आनंद सीम.
अस्के मावङ दिवोस्क पूरो कुसिते मंदा परंतोम.
15 निमे माकुन वेले दिवोस्क तक्लिब्क बोगि कीति.
इंके अव बोगे मातङ सालकुन पिय्सि माकुन आनंद सीम.
16 नी सेव्कलिरकुन नीवङ डगुक कार्यन तोहा.
वूरुर मरकुन नीवा कीर्तितुन तोहा.
17 मा बगवंतल आय्वल येहोवा, नीवा दया मा पोरो तोहा.
ममोट किय्वल हर काम माकुन बर्कद वानल कीम.
दया कीसि माकुन बर्कद वानल कीम.