कीर्तना 89

देसुन पोरो वाता दुक्सतुन बारेता कीर्तन

एज्रना कांदांतोर येतन लिहि कीता कीर्तन

1 येहोवा देवना मारियो अद पेर्मतुन बारेते, नना बस्केट डगुर-पान सीसेर वारंतोन.

निमे बचोर बरोसतोनि आंदियो वाय्वलिक पिडिनुरकुन वेह्‍चि तोहंतोन.

2 “नीवा मारियो अद पेर्मा बस्केट निल्सि मंदंता.

आगस्नगा नीवा बरोसतुन निपुसि इर्ति” इन्जेर नना इंतोन.

3-4 नना नेमि कीतोन सङा नियम टरि कीतोन.

ना सेव्कल आय्वल दाविदुन सङा, ⁺

“नी संतांदुन बस्केट राकि कींतोन इन्जि गोस्टि सीसेर मंतोन.

पिडिनङ-पिडिङ नीवा कचुरितुन निपुसि इरंतोन” इन्जेर वाग्दन सीति.

रेला.

5 येहोवा देवा, बेय रूंद मंवल आगस

नीवङ मय्मतङ कार्यन डगुर-पान सीसेर मंता.

निमे बचोर बरोसतोनि आंदियो अदेन बारेते

पवित्रा दूतलिरा समाज्नगा नीकुन डगुर-पान पुट्सेर मंता.

6 आगस्नगा येहोवा देवन मोडितोर बोर मंतोर?

स्वर्ग्नगा मंवलिर रोपो येहोवा देवन दात्नोर बोर मंतोर?

7 पवित्रा दूतलिरा समाज्नगा येहोवा देवल बाव-बक्तिता वेरे पुटुसनल मंतोर.

तंवा सिर्मुट मंवलिर्गटल गिर अदिक बाव-बक्तिता वेरे पुटुसनल मंतोर.

8 येहोवा, स्वर्ग्नङ दलम्क्नोर अदिकारि आय्वल बगवंता!

नी दात ताकद वाले बोर मंतोर?

येहोवा देवा निमे बर्पुर बरोसा वालेनि आंदि.

9 सम्दुर्तङ हेल्वन पोरो अदिकार वालेनि आंदि.

अव तेद्नेके सिम-सम दबि किय्वनि निमेय आंदि.

10 कूरदुन बहंते वीचुन पोरोडल जारंतेरो,

अह्‍ने निमे ईजिप्टुन^* जार्सि वाड्ति.

नीवा केय्दा ताकदुन हिंदल नीवुर पगा-दारकुन रीक्सि वाड्ति.

11 आगस-दर्तुरि नीवङे आंदुङ.

जग्दुनिया अनि तान्गा मंवल सम्दो निमेय गडि कीति.

12 तलवडा-काल्वडा बाजकुन निमेय निव्डि कीति.

ताबोर अनि हेर्मोन गुटङ नीवा पोरोडुन पिय्सि कुसि-आनंद येच्चेर मंतङ.

13 बेय ताकद वाले केय नीकुन मंता.

नीवा केय सक्ति वाले आंदु.

नीवा तिना केय वेले मुकेता आंदु.

14 नियत अनि नाय नीवा कचुरितुन बुनदि आसि मंतङ.

नीवा मारियो अद पेर्मा अनि सतेम नीकुन मुने ताकंतङ.

15 नीवा पार्तना-विंति किय्वल पर्जा आसिर्वाद येत्वलिर आंतेर.

येहोवा देवा, निमे तोह्‍वल दयता वेड्चि सूड्सि वूर ताकंतेर.

16 वूर नीवा पोरोडुन हिंदल दिवोस पूरो आनंद येच्चेर मंतेर.

नीवा नियतुन हिंदल वूरकुन डगुर-पान वांता.

17 वूरा ताकदुन कारन निमेय आंदि.

नी दयतुन हिंदले माकुन सक्ति पुट्सेर मंता.

18 माकुन काबाड्वल डालदुन मोडि येहोवा बगवंतल मंतोर.

इज्रयेल पर्जतोर पवित्रा बगवंतल मा साटि वोरोर राजन नेमि कीतोर.

19 अस्के निमे उंदि जोका दर्संते वासि, नी बक्तलिर सङा,

“नना लडेय किय्वडगा जेटि आय्वल वोरोन मदत कीतोन.

पर्जतल नेमे मातोर वोना पोरोडुन नना बडि कीतोन.

20 ना सेव्कल आय्वल दाविदुन नना मह्‍क्सि पुटुस्तोन.

ना पवित्रा निय्दे वोन आच्चि नेमि कीतोन.⁺

21 ना केय बस्केट वोन सात सींता.

नावा ताकद वोन बलम सींता.

22 बोरे पगा-दारल वोन पोरो मेया परोर.

करेबलिर वोन पोरो असले मेया परुर.

23 वोन मुने निल्वक्ने वोनुर पगा-दारकुन नना नासेडम कींतोन.

वोन पसंद कियुर वूरकुन जक्सि वाटंतोन.

24 बति नना बरोसते वोन पोरो मारियो अद पेर्मतुन बस्केट तोह्‍चेर मंदंतोन.

नावा पोरोडुन पिय्सि वोना ताकद बडे मांता.

25 उंदि सम्दुर्तल मोदोल कीसि उंडे उंदि सम्दुर वेरि,

अनि युप्रटिस लविडल सुरु कीसि दर्तुरितङ कोन्क वेरि,

नना नेमि किय्वल राजना राज बडे मानल कींतोन.

26 अस्के वोर ना सङा, ‘निमे नावोर बाबोनि आंदि.

ना बगवंतनि अनि नाकुन बचि किय्वनि आंदि’ इन्जेर वेहंतोर.

27 अदेन साटि नना वोन नावोर मडनोर मरिन मोडि तयर कींतोन.

दर्तुरितुर सम्दिर राजलिर्गटल पोरो वोन उपुसंतोन.⁺

28 नावा मारियो अद पेर्मा वोन्गटल बह्‍के माया सियोन.

नावा नियम वोन सङा बस्केट उंदि तीर इरंतोन.

29 वोना संतांदुन बस्केट मनल राकि कींतोन.

आगस मनल वेरि वोना कचुरि निल्सि मंदंता.

30 बति वोनुर मर्क नावा दर्मा-ग्रंत्ना कानुंतुन सुटि कीसि,

नावा नाय्दङ निर्नयकुन बह्‍के मासि ताकनिर्ते,

31 वूर नावङ नियमकुन बे-सुदुड कीसि,

नावङ आगेन बह्‍के मासि ताकनिर्ते,

32 वूर मर्ला बड्ता काड्कि, बेड्डेते वूरकुन पासि सिक्सा कींतोन.

वूरङ कसुकुन हिंदल वूरकुन दन्कङ पासि सिक्सा कींतोन.

33 बति नावा मारियो अद पेर्मतुन वोन्गटल अलग कियोन.

नना लबड वालेना आयोन अनि नावा सतुन सुटि कियोन.

34 नना सीता नियम्ना गोस्टितल तपोन.

ना सिव्लिनल बह्‍रि पेसिता गोस्टितुन नना बद्लि कियोन.

35-37 वोना संतांदुन बस्केट राकि कीसि इरंतोन इन्जि

नावा पवित्रा पोरोडे गोस्टि सीतोन.

नना दाविदुन सङा लबड वड्क्वना आयोन.

वोना कचुरि पोड्द मनल वेरि ना मुने मंदंता.

वोना कचुरि नेलेन्ज मनल वेरि ताकंता.

हाबडगा इद नेलेन्ज बरोसा वाले गवा आसि निलंता”

इन्जेर नावा पवित्रा पोरोडे वाग्दन सीतोन.

रेला.

38 इद तीर्दे निमे गोस्टि सीसि गिर माकुन सुटि कीति.

निमे नेमि कीति वोन पोरो वेले सोङुन तोह्‍ति.

39 नी सेव्कन सङा इर्ता नियमुन निमे तप्ति.

वोना किरिटुन बूड दुबतगा वाट्सि बे-सुदुड कीसि वाड्ति.

40 वोना नगुडुन काबाड्वलिक सिर्मुट्नङ गोडन उल्टि कीसि वाड्ति.

वोर मक्सि मंवलिक किलन लोपि कीसि वाड्ति.

41 सरिय सोंवलिर सम्दिर अगा मंवलिक वसतुन लूटि कीसि वोतेर.

चेडि कियन साटि वोर उंदि वस्तुत मोडि आसि सोत्तोर.

42 वोनुर पगा-दार्क वोन पोरो मेयनल कीति.

वोनुर पगा-दार्क सम्दिर आनंद येतनल कीति.

43 वोना तल्वर बतय कामि सिय्वक कीति.

लडेयतगा मेय्ले वोन निमे मदत किय्मकि.

44 वोना राजा-पांदा कीर्तितुन तेंड्सि वाड्ति.

वोना कचुरितुन बूड तोडितगा लोपि कीसि वाड्ति.

45 वोना जवन-पांदङ सालकुन कमि कीसि वाड्ति.

अनि वोना हिजत सोनल वोन सिर्मिंदिङ कीसि वाड्ति.

रेला.

46 येहोवा देवा, बचेजेल नीवा मोकोम तोह्‍वक मंदंति?

निमे बस्केट मक्सिन मंदंति कि?

बचेजेल नीवा सोङ तड्मित दात पोच्चेर मंदंता?

47 नावा पूरो जिन्गनिता कालम लेकतगा वाय्वक्ने

इचुसिन मंता इन्जेर हेतु कीम.

इचुसि कालम पिसि जीवा सुटि किय्वलिर माय्नलिरकुन

वटि आगय बारि निव्डि कीति?

48 मरंतुन सूड्वक्ने, पिसि मंवल मायनल बोरे मंतोर कि?

साना लोकम्नगा सोंवक्ने तपुस्वल मायनल बोरे मंतोर कि?

रेला.

49 ये पर्बु बगवंता! मोदोडङ दिवोस्क्नगा दाविदुन सङा,

मारियो अद पेर्मतुन तोहंतोन इन्जेर बरोसा इरनल वाग्दन सीति.

बति इंके बारि तोह्‍चेर सेल्वि?

50 ये पर्बु बगवंता! नी सेव्कलिरकुन बद तीर्दे चेडि कीसेर मंतेरो हेतु कीम.

वेले जातिनुर तेंड्वल नावा हिजतुन हेतु कीम.

51 येहोवा देवा, नीवुर दुस्मन-दार्क अद तीर्दे नावा हिजत तेंड्सेर मंतेर.

निमे नेमि कीति वोर राजना ताक्वडुन बारेते चेडि कीसेर मंतेर.

52 येहोवा देवन बस्केट डगुर-पान वायि.

आमेन! आमेन!