मदतुन साटि जोर्ते कोर्वल
पाटा वारुस्वन साटि: कोरहुना संतांदुर वार्ता कीर्तन
88
1 येहोवा देवा, नाकुन बचि किय्वल बगवंता! नर्का-पियल नीवा चर्नते विनंति कीनेके,
2 ना पार्तना निह्गा येवि.
दया कीसि ना विनंतितुन केवि सीसि केन्जा.
3 नना आपतिनगा कोंडे मासि मंतोन.
ना परन साना लोकमुन करुम येव्सेर मंता.
4 वीच्ना कोल डोडोतगा इर्ता कूरदुन मोडि नाकुन लेकते येत्तेर.
नना जिगि सेलोर वोर माय्नन मोडि आतोन.
5 सानलिर नड्डुम नाकुन सुटि किय्वल जर्ग्ता.
नना वीच्नगा अर्सि मंवलिर सानलिर्गटल वोरोन मोडि आतोन.
नीकुन उंडे बस्केन हेतु वाय्वक मंवन मोडि आतोन.
अनि नी केय्दल सुटे मातुर मोडि नना आतोन.
6 निमे नाकुन अंत लागो अद कोल डोडोतगा वाडि सीति.
कह्चर सिकटि मंवल अद कोल जागतगा वाडि सीति.
7 नीवा सोङ ना पोरो बेय वजन आसि मंता.
नीवङ हेल्वङ नाकुन मुडुसेर मंतङ.
रेला.
8 नावुर लाक्तुरकुन नह्गटल लङ कीति.
वूर सूड्सि दच्के मानल नाकुन इर्ति.
नना बह्रि वाया पर्वक्ने कोंडे मासि मंतोन.
9 दुक्सतुन हिंदल ना कड्क डोप्पोङ सोत्तङ.
येहोवा देवा, हर दिवोस नीकुन विनंति कीसेर मंतोन.
नीवा बाजुन नावङ केय्क चह्चेर मंतोन.
10 सातुर वूर साटि निमे मय्मतङ कार्यङ कींति कि?
वूरङ कूर्क तेच्चि, नीकुन डगुर-पान सींतङ कि?
रेला.
11 नीवा मारियो अद पेर्मतुन बारेते वीच्नगा मंवलिर वड्कंतेर कि?
सेलेते साना लोकम्नगा* नीवा बरोसतुन बारेते बोरे वेहंतेर कि?
12 नीवङ मय्मतङ कार्यन बारेते सिकटितगा वड्क्वल जर्गंता कि?
सेलेते सम्दो मरुङ्वल साना लोकम्नगा नीवा नियतुन बारेते वड्कंतेर कि?
13 बति ननते येहोवा देवा, मदतुन साटि जोर्ते नीकुने विनंति कीसेर मंतोन.
हर दिवोस सक्रेन नावा पार्तना नीवा चर्नते वांता.
14 येहोवा देवा, नाकुन बारि सुटि कीति?
नी मोकोम दिस्वक्ने नाकुन बारि पेरे-गेह्ति?
15 चुडु-गादल नना दुक्सा बोगे मासि, सायन साटि तयर आतोन.
निमे वेरुसिय्वडुन हिंदल नना कुसुम्ने आसि मंतोन.
16 नीवा सोङ्ना तड्मि नाकुन डुंडुसि वाड्ता.
नीवा वेरेते नना दड्कि तिन्जि सातपिनय आतोन.
17 येतुन मोडि दिवोस पूरो ना सिर्मुट अव गेर-पासि,
नाकुन मुडुसेर मंतङ.
18 नाकुन पेर्मते सूड्वलिरकुन अनि सोप्तलिरकुन निमे नह्गटल हब्रि कीति.
अनि सिकटितुन दोस्तलिर मोडि ना करुम इर्ति.