मदतुन साटि किय्वल पार्तना
दाविद्ना पार्तना
86
1 येहोवा देवा, कमि-पान वालेना अनि दिक सेलोर वोना आंदुन. नावा विनंति केन्चि नाकुन जवब सीम.
2 नना नीवोर बक्तना आता काड्कि ना परंतुन काबाडा.
ना बगवंता, निह्गा बरोसा इर्सि मंतोन.
नी सेव्कल आय्वल नाकुन बचि कीम.
3 पर्बु दिवोस पूरो नीकुन आड्सेर विनंति कीसेर मंतोन.
ना पोरो दया तोहा.
4 पर्बु ना परंतुन नी केय्दे इर्सेर मंतोन.
नी सेव्कना परंतुन आनंद सीम.
5 पर्बु निमे दया वालेनि आंदि.
मापि किय्ले तयर मंवनि आंदि.
नीकुन आड्सेर विनंति किय्वलिर पोरो मारियो अद पेर्मतुन तोह्वनि आंदि.
6 येहोवा देवा, ना पार्तनतुन केवि सीसि केन्जा.
नना आड्सेर विनंति किय्वलिक गोस्टिन केन्जा.
7 निमे नाकुन जवब सिय्वनि आता काड्कि,
नना आपतिते मनेके नीकुन आड्सेर विनंति कींतोन.
8-9 ये पर्बु, नी मोडि बदे पेन सेले.
नी दात मय्मतङ काम्क किय्वल बोरे सेलोर.+
दुस्रोक सम्दो जातिनुरकुन निमेय गडि कीति.
वूर सम्दिर नीवा पार्तना-विंति कींतेर.
वूर नीवा पोरोडुन डगुर-पान तरंतेर.
10 निमे बेय डगुनि आंदि.
अनि मय्मतङ कार्यङ कींति.
सिरिप निमे वोरोनिय बगवंतनि आंदि.
11 येहोवा देवा, नना नी सतेमुन पिय्सि ताकनल
नीवा सरि-मारगुन नाकुन करुसीम.
नी पोरोडुन पिय्सि वेरिसि ताकनल
नावा दिलतगा सिरिप उंदिय उदेस मनल कीम.
12 पर्बु ना बगवंता! नावा बर्पुर दिल्दे नीकुन डगुर-पान सींतोन.
नीवा पोरोडुन बस्केट कीर्ति सींतोन.
13 पर्बु, ना बगवंता! ना पोरो तोह्वल नीवा मारियो अद पेर्मा वेले डगुर आंदु.
साना लोकम्ना अंत लागो अद डोडोतल नावा परंतुन तपुस्ति.
14 बगवंता, गर्वते मंवलिर ना पोरो तेत्तेर.
अनेलम्ने दाबि किय्वलिर मीरे मासि,
नावा परन तेंड्ले सूड्सेर मंतेर.
निमे इतेके वूरकुन असले वेरे सेले.
15 बति निमे, किवुल अनि पेर्मता-दयते सूड्वल बगवंतनि आंदि.
निमे वेले जेल वोर्चि सूड्सेर मंवनि आंदि.
मारियो अद पेर्मते अनि बरोसते बर्पुर निन्चि मंवनि आंदि.
16 बगवंता! ना बाजुन तिरिसि नीवा दया ना पोरो तोहा.
नना नीवोर सेव्कना आता काड्कि, नाकुन नीवा ताकद सीम.
नीवा सेवा किय्वल नावा अवन मोडि नना गिर कीसेर मत्ता काड्कि, नाकुन बचि कीम.
17 येहोवा बगवंता, निमे नाकुन मदत कीसि,
नाकुन सुम्जि कीसेर मंति इंवल नाकुन टावा.
बति निमे नाकुन चोकोट सूड्सेर मंति इंवल उंदि निसनि तोहा.
अद सूड्सि नाकुन पसंद कियुर वूरकुन लजन वाटेङ आयना.