देस्नुर चोकोट मंदना इन्जेर किय्वल पार्तना
पाटा वारुस्वन साटि: कोरहुना संतांदुर वार्ता कीर्तन
85
1 येहोवा देवा, निमे नी देसेमुन पोरो दया तोह्ति. याकोब्ना संतांदुन साटि सम्दो चोकोट जर्गुसीति.
2 नी पर्जतङ तपकुन मापि कीति.
अनि वूरङ सम्दो पापकुन मापि कीति.
रेला.
3 नीवा पूरो सोङुन रोकि कीति.
नीवा सोङ इंवल तड्मितुन पिह्चि वाड्ति.
4 माकुन बचि किय्वल बगवंता!
मोदोल मत्तपिनय माकुन सुद्रन कीम.
मा पोरो मंवल नीवा सोङुन रोकि कीम.
5 बस्केट मा पोरो सोङुन वांति कि?
पिडिनङ पिडिङ निमे सोङ पिय्सि मंदंति कि?
6 नी पर्जा नीवा गोस्टितुन पिय्सि आनंद येतनल
माकुन पूना जिन्गनि सिय्वि कि?
7 येहोवा देवा, नीवा मारियो अद पेर्मतुन माकुन तोहा.
नीवा बचि किय्वल कार्या मा साटि जर्गुसा.
8 बगवंतल आय्वल येहोवा देवल वेह्वल गोस्टितुन नना केन्जंतोन.
वोर तंवा पर्जा अनि तंवुर बक्तलिर बह्के माय्वक मंदना इन्जेर
चोकोट्ना वचन वेहंतोर.
9 तंवा बाव-बक्तिता वेरे मंवलिरकुन वोर वेय्ने बचि कींतोर.
अस्के वोना मय्मते मा देस पूरो निन्चि मंदंता.
10 मारियो अद पेर्मा अनि सतेम मीरे मासि मंतङ.
नियत अनि सांति उंदितुन उंदि तोड्डि बुर्तङ.
11 बोमितल सतेम पिरंता.
आगसनल नायम बूड सूडंता.
12 येहोवा देवल माकुन आसिर्वाद्क सींतोर.
मावा बोमि ताना पंडि अदिक सींता.
13 नियत वोन मुने मुने ताकंता.
वोर दापिङ वाट्ले सरि तयर कींता.