बगवंतना रोतुन साटि आसते कोर्वल
पाटा वारुस्वन साटि: कोरहुना संतांदुर वार्ता कीर्तन.
84
1 स्वर्ग्नङ दलम्क्नोर अदिकारि आय्वल येहोवा देवा! नीवा मंदिर्ता जागा बेय सोबते मंता.
2 येहोवा देवना पार्तना-विंति किय्वल डेरतगा आव्रतुन सूड्ले नावा परन बेय आसते मंता.
नावा मन-दिल बेय जीवा कीसेर बेय तरतुरा आसेर मंता.
जीवा वाले बगवंतन साटि नावा दिल
अनि नावा मेंदोल बेय कुसिते वार्सेर मंतङ.
3 स्वर्ग्नङ दलम्क्नोर अदिकारि आय्वल येहोवा देवा!
ना राजा, ना बगवंता! नीवा बोव्लतगा कोट्का पिटेन
अनि जाकर पिटेन गूडङ दोह्ले जागा मंता.
अगा अवेनङ पिलङ गिर मंदंतङ.
4 नीवा मंदिरतगा पार्तना-विंति किय्वलिर आसिर्वाद येत्वलिर आंदिर.
बारितेके वूर बस्केट नीकुन डगुर-पान सीसेर मंदंतेर.
रेला.
5 नी पोरो आदर आसि, नीवा ताकद्ना मदत येत्वलिर आसिर्वाद येत्वलिर आंतेर.
बारितेके वूर तम्वा बर्पुर दिल्ते नीवा सरि-मारग ताकना इन्जेर पर्पेडे मांतेर.
6 वूर बाका* इंवल वत्ता लोदितल सोन्जेर मनेके,
तान येतङ जलन मोडि मार्युसंतेर.
मिर्ग्ने अर्वल मोदोडा पिर्दा आसिर्वाद्ने अगटङ डुंकङ येते निंदंतङ.
7 वूर बहन बहन यात्रा कींतेरो, अहन अहन वूरा ताकद बडे मासेर दांता.
वूर्गटल हर वोरोर सियोंतगा बगवंतना चर्नते दिसंतेर.
8 स्वर्ग्नङ दलम्क्नोर अदिकारि आय्वल येहोवा देवा! ना पार्तना केन्जा.
ये याकोब्नोर बगवंता! नीवा केवि सीसि केन्जा.
रेला.
9 ये बगवंता! निमेय मावा डालदुन मोडितोनि आंदि.
ना बाज तिरिसि, निमे नेमि कीति वोर राजन पोरो दया तोहा.
10 बगवंता! नीवा मंदिर्ता आव्रतगा उंदि दिवोस मंवल
हजर दिवोस्क दुस्रो जागतगा मंवडुन तेर वेले चोकोट्ना आंदु.
करेबलिरङ रोह्क्नगा मंवडुन तेर,
ना बगवंतना मंदिर्ता डेरोटतगा निल्सि मंवल नाकुन वेले पसंद.
11 येहोवा देवल माकुन बचि किय्वल डाल आंदुर.
अनि माकुन वेड्चि सिय्वल पोड्द आंदुर.
वोर माकुन पेर्मता-दया अनि डगुर-पांदुन सींतोर.
नियत्ने पिस्वलिरकुन बततय कमि कियोर.
12 स्वर्ग्नङ दलम्क्नोर अदिकारि आय्वल येहोवा देवा!
निह्गा बरोसा इर्वलिर आसिर्वाद येत्वलिर आंतेर.