कीर्तना 83

#इज्रयेल पर्जतुर पगा-दार्क हारे मायना इन्जेर कीता पार्तना

आसप वार्ता कीर्तन

1 ये बगवंता! बतय वड्क्वक्ने दब मन्मा.

नीवङ केव्क मुह्‍चि असले मन्मा.

ये बगवंता! पटि किय्वक मन्मा.

2 नी पगा-दार्क हंकत कीसेर मंतेर.

नीकुन पसंद कियुर वूर गर्वते तला तह्‍चेर मंतेर.

3 नी पर्जत पोरो वूर कपेटलिक पिलन्क वाड्सेर मंतेर.

नीवा चर्ना पिय्तुरकुन, नुक्सन किय्ले सोन्च कीसेर मंतेर.

4 वूर, “इज्रयेल इंवल पोरोल इङेडल हेतु वाय्वक्ने कीकट.

अनि वूरा जातिता विजा सेल्वक्ने वूरकुन मूरि कीकट” इन्जेर इंतेर.

5 वूर उंदि मंदे येकि आसि सोन्च कीसेर मंतेर.

नीकुन उल्टा मनल नियम तयर कीसेर मंतेर.

6 वूर बूर बूर इतेके, डेरनगा मंवलिर येदोम जातितुर, इस्मयेल जातितुर,

मोयब जातितुर, हग्रि जातितुर,

7 गेबल जातितुर, अंमोन जातितुर, अमलेकि जातितुर, पिलिस्तिया जातितुर, तूरु देस्नुर इंवलिर नीकुन उल्टा मनल नियम तयर कीसेर मंतेर.

8 वूर सम्दिर अस्सुर देस्नुर सङा मीरे मातेर.

लोतुनेर कांदांतुरकुन वूर मदत कीसेर मंतेर.

रेला.

9 निमे मिद्यानियुलकुन कीतपिनय, कीसोन लविडगा

सिसेरन अनि अबियन कीतपिनय, वूरकुन गिर कीम.⁺

10 वूर येंदोर चहरतगा नासेडम आतेर.

बोमित पोरो वूरङ कूर्क कडितङ.

11 होरेबु अनि जेयेबु इंवलिरकुन निमे कीतपिनय, वूरेर पेदोलकुन गिर कीम.

जेबहु अनि सल्मुंना इंवलिरकुन कीतपिनय, वूरेर सम्दिर राजलिरकुन गिर कीम.⁺

12 बारितेके वूर, “बगवंतना बोमितुन आगुटि कीसि,

मा सोंतम कीकट” इन्जेर वूर वड्क्सेर मंतेर.

13 ना बगवंता! वूरकुन माय्टडे तिरिवल डुर्डतुन मोडि,

अनि वडिते सोंवल पोटुन मोडि कीम.

14 तड्मि केडतुन डुंडुस्तपिनय, मिन्गुल गुटन डुंडुस्तपिनय,

15 नीवा तुपांतुन हिंदल वूरकुन पूडि सीम.

निमे रोह्‍वल माय्टडुन हिंदल, वूरकुन दड्कि पुटुसीम.

16 येहोवा देवा, वूरा हिजत सोनल कीम.

अस्के वूर नीवा पोरोलदुन मह्‍कना इंवल कोरंतेर.

17 वूर बस्केट गिर वेरिसेर मन्जि, दड्कि तिनिर.

वूरा हिजत सोन्जि नासेडम आयिर.

18 येहोवा देवा इंवल पोरोल मंवनि सिरिप निमेये,

पूरो जग्दुनियतुन रोपो, सम्दोत पोरो मंवनि इंवल वूर करि कियिर.